1 KORINTNA 16
16
Tok begera maŋ gorsegina
1Kay boy begera tokka a ɦaɗ maŋ gorsegi suu vi Lona suu ha Yerusalemma. Lagi ko an haɗ suu vina suu ha Galatina lira na may. 2Hu faɗta damassa tew tew gegelay cuk gursura ki egem zeɗ u va ma nam famma, ka ana hu buu ma an mbana ni agi hin tok tlena ni toki tuwa naɗi. 3Hu buu ma an mba ha wa ni hin sun suu agi mansina u magara a ɦal tlesuu agi tokosina ha Yerusalem. 4Lini an hin a tuɗ may ni ami hin tuɗumi ni ko tamiya.
Koyra vi Pol
5An ka tuɗ ha varagiya lini tli ha ni voɗta Masedoinda (kay an a jak ki kay Masedoin). 6Kay an a kak varagi buu goy ca, an li daɓ til semeɗna ki varagi kala, agi hin njun un tinin hu li ma an tuɗ huna aragelay. 7Ka min a gologi ɦawana jak gawɗi. Kay an min a kak varagi buu goy ca lini Bu Suuna hinin a li na.
8Ni an min a kak tani Efes na gak gak tew luu ma Pantekotna. 9Ni voɗta mal ki kan a li sunda ŋgolla tani, lini suu gonok manda ka ŋgol masi lay.
10Timote mba ha dukugi wani agi vam dukugi jiviya, kay nam li sunda vi Bu Suuna ko an na may. 11Ni sa panambi, njun ummi njuni na ɗow kay nam tuɗ koy mamba u heɓpa, a nam hoŋ ay egen tani ami ka juɓum u gorseyna.
12Wayayna Apollos an ka dam tew tew a nam tuɗ ha varagi u gorsey suu hiŋŋa, nam ka min a tuɗ ha cecemiɗi. Nam hin fi voɗta wanni nam hin tuɗ ha ni na tuwa.
Pol gaɗ suuna kay kak jivi hu vira
13Lakagi neeya, kak eŋ hu vira, lagi ɦiŋi, lakagi saɓaki. 14Li lagi megelay ni lagi u minda.
15Gi Stefanas u suu mamma agi wasiya, hu Gresna asi ni suu vi hu Boy Lonana jewna. Asi cuk tasi duk suu vina a li sunda vi Lona. An min joɓogiya gorsenna, 16ko asi na ni agi hum usiya, u suu ka li sunda ɗegee u asina lay.
17An furi ŋgolo kay mbara vi Stefanas gi Fortunatus u Akaikus, hu li ma agi ka di na ni asi ka ɦan tlesuu hawasi ka canna. 18Asi heɓen hurun ko asi heɓegi hurugira na lay. Ni saaragi jivi kay suu ko asina na.
19Suu vina hu mbassa Azira gagi deɓpa. Akilas u Prisiye u suu vi suu ka egesina gagi deɓpa ha coco u sem Bu Suuna ma taɓaygina. 20Gorseygi suu ka tanina halaŋ gagi deɓpa. Gi deɓpa duk hoŋ tagi halaŋ u furira.
21An ɓii boy namma ni u tanda, gagi deɓpa ni an Pol.
22Lini sana ka min Bu Suunaɗini, nammi sa ki baayna. Maranata (ni ana Bu Suuna mamina mbaya).
23Ko oora vi Bu Suuna Yesu kak u agiya.
24Min manda li u agi halaŋ hu Yesu Kristu.
Chwazi Kounye ya:
1 KORINTNA 16: BMS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible Moussey © Bible Society of Chad, 2002.