Bible Text in Sahu © 2015 Lembaga Alkitab Indonesia www.alkitab.or.id/
Audio recording of the Bible Text ℗ 2016 Hosanna

Sahu - 2015 Edition (NT) Non Drama

Wakutu Pentakosta ma Wangere 'i ngadolo ḏua, ngowa-ngowa'a ngaku Yesus 'aḏi malomu toma wala ḏu moi. Kage-kage, ananga 'aḏi 'isene sa'olo karawiana ma rurusu da'u diwanga tala. Ngowa-ngowa'a 'aḏi tego-tegoro toma wala gena-ge ya 'isene mo-moini. Re ananga gena-ge ya oḏi'i sa'olo u'u ma duhu sa'olo yai'i 'i lai-lairi ya'u jajange ra ananga matengo re matengo. Ananga mo-moini Ma Ngagara 'Ofi-'Ofi ya'u ḏegoro singadolo 'aḏi kanau reo ngowa'a lelegu manga demo 'i mete'e Ma Ngagara 'Ofi-'Ofi enanga ma mau.
Toma 'orasa gena-ge, ngowa'a Yahudi manga repe ga'a 'aḏi tegoro toma dungia sitabi donga, 'aḏi sapolo malomu toma limau Yerusalem sababu Pentakosta ma Wangere. Ananga mo-moini gena-ge ngowa-ngowa'a ga'a 'aḏi 'ahu di'a sisanangi Ma Jou'ongu Madutu 'ai 'akala re sinyingara. Wakutu ngowa'a Yahudi manga repe gena-ge ya 'isene iḏingi gena-ge, ananga 'aḏi malomu ya'u gowolo ngowa-ngowa'a ngaku Yesus. Ananga mo-moini gena-ge 'aḏi 'isene ngowa-ngowa'a ngaku Yesus 'aḏi makanau ya pake ngowa'a wola i'a manga demo re 'aḏi heranga masala sababu matengo re matengo ya 'isene ananga manga demo masiretene. Ananga 'aḏi heranga masala re 'aḏi kanau, “Ananga ga'a 'aḏi ka-kanau gena-ge ngowa'a Galilea! I'a sa'olo singadolo ananga nyengara 'aḏi kanau ya pake ngene nanga demo-demo, demo ga'a ngene wa pake tananga nagara matengo re matengo? Ngene ngowa'a toma Partia, Media, Elam, Mesopotamia, Yudea, Kapadokia, Pontus re Asia, Frigia, Pamfilia, Mesir, ngowa'a toma daeraha-daeraha Libia co-cori Kirene ino, 'age ḏi'i ngowa'a ra ngene, 'aḏi sapolo toma limau Roma ino, bae ngowa'a Yahudi, bae ngowa'a Yahudi ua ga'a osama 'agama Yahudi; ngowa'a Kreta re ngowa'a Arab ino. Momongolo ua, ngene mo-moini wa 'isene ananga 'aḏi kanau ya pake ngene nanga demo mangale 'ori i'a hera-heranga ga'a Ma Jou'ongu Madutu 'a si'a'a!” Ananga mo-moini 'aḏi matai heranga masala re 'aḏi ma'u sano matengo re matengo, “Maksudu 'oru gena-ge?”
Mada'a 'age ḏi'i rema ngowa'a lelegu ya'u je-jengere. Ananga 'aḏi kanau, “Ananga nena-ne pa'i 'aḏi 'etolo ḇato!”

Ḏua 'a Petrus re Yesus 'ai so-soma'a nga nyagi moi re matengo, ananga 'aḏi te'oso re 'o kanau 'o siduga-duga toma ngowa'a repe gena-ge, “Ioronongoḏu ngowa'a Yahudi re ngini mo-moini ga'a tegoro 'ane toma limau Yerusalem! Na 'isene la-la, sababu ngoi ta siajele ra ngini nena-ne 'i dadi ḏua. Awa ngini ni ta'ajiri ngomi mi 'etolo. Ngomi mi 'etolo ua sababu 'orasa aro ca'olo siworo da-daini i'a! Mada'a 'ua re 'au wali Ma Jou'ongu Madutu 'a siajele pasala ḏua ra Nabi Yoel mangale 'oru ga'a 'i dadi nena-ne:
Ma Jou'ongu Madutu 'o kanau, ‘Wakutu Kiamata ma Wangere 'i ngadolo nyangu,
Ngoi ḏuanga i'a to siḏingoto Ma Ngagara 'Ofi-'Ofi di'a ngowa'a mo-moini,
Ninga ngowa-ngowa'a, bae ngowa'a nau'u bae ngowa'a were'a ḏuanga i'a 'aḏi siajele 'Ari habari.
Ngowa'a tubaie ḏuanga i'a 'aḏi sanga tingoḏi'i ra Ngoi,
Ngowa'a bi-biri'i ḏuanga i'a 'aḏi sanga nanele ra Ngoi.
Toma 'orasa gena-ge, Ngoi to siḏingoto Ma Ngagara 'Ofi-'Ofi Tari budaka-budaka: bae we-were'a re na-nau'u,
dadi ananga ḏuanga i'a nyengara 'aḏi siajele 'Ari demo.
Ngoi ḏuanga i'a to 'a'a 'ori i'a hera-heranga toma diwanga,
re didina'o heranga toma dungia;
'age ngaunu re 'o u'u, re loworo.
Wangere ma la'o 'i taḏusu,
ngara 'i dadi ko-kolili sa'olo ngaunu.
Mada'a Ma Jou 'ai Wangere ma lamo'o 'i ngadolo nyangu.
Ḏuanga i'a Ma Jou 'o sijumu 'ai kuasa re 'ai mulia wakutu Ma Jou 'ai Wangere ma lamo'o 'i ngadolo.
Toma 'orasa gena-ge, wakutu Ma Jou 'ai wangere ma lamo'o 'i ngadolo nyangu, 'a guna ḇato 'o maḏigaro'o ra Ma Jou di'a singi-ngiranga 'ai ḏosa,
unanga sanga salamata.’ ”
Petrus dadunu 'o kanau moju, “Ioronongoḏu ngowa'a Israel! 'Oru ga'a ngoi ta siajele, balasu na 'isene. Ma Jou'ongu Madutu 'o sitantukanga Yesus, ngowa'a Nazaret, so'o ne: Unanga 'o pula'a kuasa ra Yesus, la 'o 'a'a ga'a hera-heranga, didina'o heranga re 'ori i'a hera-heranga, la ngini na waro ḏua Unanga gena-ge ra Ma Jou'ongu Madutu tala. Ngini mo-moini gena-ge ni waro masiretene 'i dadi mode-mode'e. Kalaha Ma Jou'ongu Madutu 'a waro ḏua 'oru ḏuanga i'a 'i dadi, Unanga 'o sipula'a Yesus ra ngini: Enanga gena-ge 'i mete'e Ma Jou'ongu Madutu 'ai 'akala ma mau. Wakutu gena-ge, ngini nu sisengene Unanga sababu ngini nu sipula'a Unanga toma ngowa-ngowa'a ga'a 'aḏi mete'e ua Ma Jou'ongu Madutu 'ai hukumu, kara ananga 'U salib Unanga. Mada'a, Ma Jou'ongu Madutu dadunu 'o si'ahu moju Yesus toma ngowa'a senge-sengene manga sigolona. Mete'e Ma Jou'ongu Madutu 'ai 'akala ma mau, Yesus balasu 'o basono sangisara singadolo 'O sengene, mada'a mete'e Ma Jou'ongu Madutu 'ai 'akala ma mau ḏi'i, sanga ua Unanga 'o sieanga i'a Yesus 'o sengene sikiḏanga. Mangale Yesus nena-ne, 'a Daud 'o kanau pasala ḏua,
‘Ngoi to oḏi'i tau-taunu Ma Jou 'age tari biono.
Ngoi ḏuanga i'a to mojongo ua 'a guna ḇato, sababu 'age Unanga sebanga ra ngoi.
Sababu gena-ge, 'ari 'akala re sinyingara 'i maroanga, 'ari madanga 'i puji re silamo'o,
re 'ari lese ḏuanga i'a 'i tegoro rema ngo-nganono toma kubu ma dara,
sababu ḏuanga i'a Ma Jou'ongu Madutu 'o sieanga i'a ua ngoi to tegoro toma ngowa'a senge-sengene ma ngi'i,
re ḏuanga i'a Unanga 'o sieanga i'a ua 'Ai Falalomu 'Ofi-'Ofi 'o wejere toma kubu ma dara.
Unanga 'o sijumu pasala ḏua ra ngoi ngo'omo di'a 'ahu kasingado-ngadolo i'a;
'ari 'akala re sinyingara ḏuanga i'a 'i monere sababu Ma Jou'ongu Madutu 'age ra ngoi re ngoi 'age ra Unanga tau-taunu.’
Ioronongoḏu ngowa'a Yahudi, ngoi ta siajele ra ngini rari 'akala re sinyingara mode-mode'e mangale Daud, ngene nanga ete re dotumu. Daud 'o siajele mangale unanga masiretene ua mada'a matengo i'a, sababu unanga ro sengene re 'ai maiyeti ya singosama ḏua toma kubu ma aḏu'u re 'ai obongo rema enanga tai kubu ma aḏu'u moju, singadolo 'orasa nange-ne tananga sigolona. Daud 'o dadi nabi re unanga waro ḏua mangale Ma Jou'ongu Madutu 'ai jaji pasala ḏua. Ma Jou'ongu Madutu 'o jaji re 'o masisasi pasala ḏua ra unanga gena-ge so'o ne: Ḏuanga i'a ra 'Olana Daud 'ai ju'uda ino, 'age rema ngowa'a matengo Ma Jou'ongu Madutu 'o sitede unanga 'o dadi 'olana. Dadi Daud 'a waro ḏuanga i'a Ma Jou'ongu Madutu 'o 'a'a 'oru. Sababu gena-ge, unanga 'o siajele habari da'u ra Ma Jou'ongu Madutu tala mangale 'O Kristus 'o sengene, mada'a dadunu 'O 'ahu moju toma ngowa'a senge-sengene manga sigolona. Daud 'o kanau so'o ne:
‘Ma Jou'ongu Madutu 'o sieanga i'a ua Unanga 'o tegoro toma ngowa'a senge-sengene manga sigolona
singadolo 'Ai lese enanga 'i wejere.’
Sababu gena-ge, Daud 'a siajele mangale Yesus, Unanga gena-ge Ma Jou'ongu Madutu 'U si'ahu moju toma ngowa'a senge-sengene manga sigolona. Ḏua ngomi mo-moini maoḏi'i masiretene Yesus dadunu 'o 'ahu moju. Ma Jou'ongu Madutu 'o sitede siḏegoro Yesus toma gau'u Tari giama ma kuwiḏa re Unanga dawongo Ma Ngagara 'Ofi-'Ofi ga'a Ma Jou'ongu Madutu 'o sijaji pasala ḏua. 'Orasa nena-ne, mo-moini ga'a ngini na 'isene re na oḏi'i ḏua, sababu Yesus siguci Ma Ngagara 'Ofi-'Ofi gena-ge ra ngomi. Daud masiretene 'o pere ua da'u toma soroga, mada'a unanga 'o kanau,
‘Ma Jou'ongu Madutu 'o kanau rari Ma Jou:
No tegoro Tari giama ma kuwiḏa i'a,
singadolo Ngoi ta 'a'a 'Ani lawa-lawana 'aḏi ta'aloko ra Ngana!’ ”
Petrus dadunu 'o kanau moju, “Sababu gena-ge, ngowa-ngowa'a Yahudi, ngini re ngowa'a Israel ma lelegu mo-moini balasu na waro mode-mode'e mangale Yesus ga'a ngini nu salib, Unanga gena-ge Ma Jou'ongu Madutu 'o sidadi nanga Jou re 'O Kristus.”
Wakutu ananga ya 'isene so'o gena, ananga manga 'akala re sinyingara 'i kangela masala. Ḏua ananga 'aḏi sano ra Petrus re 'a Yesus 'ai so-soma'a ma lelegu ḏi'i, “Ioronongoḏu, ngomi balasu mi 'a'a 'oru?”
'A Petrus 'a sangoro i'a ra ananga, “Ngini matengo re matengo balasu ni maḏibo toma ngo'omo boloto, kara ni sanga baptis ra Yesus Kristus 'ai lomanga, la Ma Jou'ongu Madutu 'o singi-ngiranga ninga ḏosa re ni dawongo Ma Ngagara 'Ofi-'Ofi. Ma Jou'ongu Madutu nanga Jou, Unanga 'o sijaji pasala ḏua 'O pula'a Ma Ngagara 'Ofi-'Ofi gena-ge toma ngowa-ngowa'a mo-moini ga'a Unanga cumutu ḏua: bae ngini, bae ninga ju'uda, bae ngowa-ngowa'a ga'a 'aḏi tegoro toma ngi'i toma giḏanga.”
So'o gena 'a Petrus 'a sitarangi re 'o golo'o mode-mode'e ra ananga re rai demo ma repe ḏi'i 'a sida-dadunu ma betongo so'o ne: “Ngini balasu ni maḏibo toma ngo'omo boloto, la Ma Jou'ongu Madutu 'o sisalamata ngini toma bangsa ne ga'a 'aḏi madiga'a 'ori i'a ma jira. Ḏuanga i'a Ma Jou'ongu Madutu 'o sihukumu bangsa gena-ge.” Ngowa-ngowa'a manga repe 'aḏi ngaku Petrus 'ai bobita, ḏua ananga gena-ge 'aḏi sanga baptis. Toma wangere gena-ge ngowa-ngowa'a ngaku Yesus manga nyo-nyoimi 'i dogo ḏa nga cala ro'ange. Ananga ya mete'e mode-mode'e 'a Yesus 'ai so-soma'a manga do-doto'o re 'aḏi marimoi: Ananga 'aḏi malomu taunu di'a 'aḏi oromo, sibalangu roti, re 'aḏi manyiata.

Yesus 'ai so-soma'a 'aḏi 'a'a didina'o heranga re 'ori i'a hera-heranga ma repe. Sababu gena-ge, ngowa-ngowa'a mo-moini toma limau Yerusalem 'aḏi dadi mojongo re 'aḏi silamo'o masala Ma Jou'ongu Madutu 'ai lomanga. Ngowa-ngowa'a ngaku Yesus mo-moini 'aḏi marimoi re na'o matengo rai 'ori i'a gena-ge 'i dadi di'a tamanga mo-moini.'Age mamuni'a 'aḏi wu'unu manga 'ori rana bolo manga tana'a re enanga ma ijana 'aḏi masibalangu te-tero 'i mete'e ananga matengo re matengo manga kuranga re ngadolo ua. Wange moi-wange moi, ananga 'aḏi malomu ra Ma Jou'ongu Madutu 'ai Wala ma soana. Ananga masibalangu manga roti re 'aḏi oromo mamete'e tamanga wala remanga 'akala re sinyingara ga'a maroanga re maholo, re 'aḏi puji re silamo'o Ma Jou'ongu Madutu tau-taunu. Ngowa'a mo-moini toma limau Yerusalem 'aḏi sanangi toma ngowa-ngowa'a ngaku Yesus manga 'ahu re manga de'oso re ḏegoro. Wange moi-wange moi Ma Jou'ongu Madutu 'a dogo manga nyo-nyoimi ngowa'a ngaku Yesus.

Koute Yesus 'ai so-soma'a 2