Yohana 1
1
Cau duk ɓwa
1Kaniama Ɓakuli nǝ̀
pusǝ ɓanza ka,
Cau ni nda kam,
sǝ mǝno yì Cau ka
à nda tàrǝia andǝ Ɓakuli;
sǝ yì, yì Cau ka Ɓakuli na.
2A tite ka à nda
andǝ Ɓakuli.
3Nǝ yi sǝ Ɓakuli pusǝ agir kat.
Kǝgìr pà kàm mwashat
mana à pusǝì mǝnana
nǝ yi sǝ à pusǝì raka.
4Yì nda tǝr yilǝmu,
sǝ mǝnia yì yilǝmu
ka yiu nǝ tǎlaban
aban ɓwapǝndǝa.
5Sǝ yì tǎlaban ngga
kǝ ta aɓa pǝndǝa
sǝ pǝndǝa ka gandǝ
bwalte ɗàng!#1:5 sǝ pǝndǝa ka gandǝ bwalte ɗàng: Ko <<sǝ pǝndǝa ka pà nǝ̀ gandǝ limge ɗang.>>
6Ɓè ɓwa yiu,
mǝ'njar mǝnana
Ɓakuli túrí ka,
lùllǝì ama Yohana.#1:6 Ɓalli gbal aɓa: Mat 3:1; Mar 1:4; Luk 3:1,2.
7Yiu yi ne ɓwapǝndǝa
cau amur mǝnia
yì tǎlaban ngga,
ace mǝnana ɓǝ̀
ɓwapǝndǝa kat ok
mǝnia yì cau ka, ɓǝ̀ é.
8Yohana nǝ ɓamúrì ka
nda tǎlabanì ɗang;
yì ka, yiu ace nacau
amur tǎlabanì.
9Tǎlaban mǝ'mǝsǝcau nì,
mǝnana kǝ ta aban
ɓwapǝndǝa kat ka,
ndo kǝ yiu a ɓanza ka.
10Yì Cau ka nda a ɓanza,
sǝ kat andǝ amani ama
nǝ yi sǝ à pusǝ ɓanza ka,
ɓanza súrǝì ɗàng.
11Yiu aban aɓwana
mǝnana amale na ka,
sǝ amale é ɗàng.
12Sǝ aɓwana mǝnana kat à é,
à pa ɓamuria a baní ka,
pània wia rǝcandǝa
ɓǝà duk amuna
mala Ɓakuli.
13Ɓǝlban malea ka,
mala nkila na
andǝ nggūrǝu ɗang.
Pa aɓa kpapi
mala ɓwama andǝ
ɓwabura ɗang.
Mǝnia ka pe mala Ɓakuli na.
14Mǝnia yì Cau ka
yi duk ɓwamǝpǝndǝe,
sǝ yi duk zuku aɓalǝ sǝm.
Sǝm sǝna gulo male,
gulo mala kǝ̀ Muna
mwashat ɓǝ̀rɓǝ̀r, mana pur
nǝban Tárrí Ɓakuli ka,
lùmsǝo nǝ ɓwamuru
andǝ mǝsǝcau.
15Yohana ne aɓwana cau amurí nǝ giu mǝcandǝe ama, <<Mǝnia ka nda ɓwa mǝnana ǝn na wun cau amurí nǝma nda ban yiu a nzǝmam ngga, sǝ yì ka, kútiǎm nǝ gulo, acemǝnana yì ka, ndakam ɗiɗyal sǝ à yì ɓǝ̀lám.>> 16Aɓa ɓwamuru andǝ mǝnbu male sǝ tsǝka sǝm bu kat, kǝ pa sǝm agir mǝɓoarne a nzǝmarǝia. 17Ɓakuli pa sǝm Nggurcau nǝ bu Musa, sǝ nǝ bu Yesu Kǝrǝsti sǝ pa sǝm ɓwamuru andǝ mǝsǝcau. 18Kǝ ɓwa sǝn ma Ɓakuli àkǝ̀ pwari ɗàng, she kǝ Muni mǝnana à nda mwashat andǝ yi, sǝ nda a nkanggari ka. Yì nda tsǝa sǝ sǝm súrǝ̀ Tárrí ka.
Yohana Mǝbatisǝma nda Kǝrǝsti ɗàng
(Matiu 3:1-12; Markus 1:1-18; Luka 3:1-18)
19Aɓwana-mǝgule mala amǝ Yahudi mǝnana a Urǝshalima ka à túr apǝris andǝ Amǝ'Lawi ɓǝà kya ɗì Yohana ama, yì ka, nda yana le?
20Yohana sǝmbǝrǝia wia kǝgìr ɗàng, banggia wia mǝsǝcau ama, <<Mǝ nda Kǝrǝsti#1:20 Kǝrǝsti (nǝ kún Gǝrik) ko Mezaya (nǝ kún Ibǝru) ka ɓālǝi nda: Ɓwa mǝnana à ɗārǝì wi mùrú olif amurí, mǝnana lǝmdǝ ama Ɓakuli tsǝ́ngŋǝ̀nì a buno-gulo andǝ rǝcandǝa ka. ɗàng.>>
21À ɗì ama, <<Sǝ we ka a nda yana? A nda Iliya le?>>#1:21 Ɓalli gbal aɓa: Nggur 18:15; Mal 4:5. Yohana earia wia ama, <<Awo, mǝ nda yì ɗàng.>> Sǝ à ɗì ama, <<A nda mǝɓangnǝa mala Ɓakuli mǝnana sǝm nggǝ kundǝmuri ka le?>> Earia wia ama, <<Awo.>>
22A masǝlǝate ka à ɗì ama, <<Na sǝm cau mǝnana ɓǝ̀ sǝm nyesǝi aɓwana mǝnana à túr sǝm ngga. A kǝ twali ɓamuro ama a nda yana?>>
23Yohana earia wia nǝ cau mala Ishaya mǝɓangnǝa mala Ɓakuli ama, <<Mǝ nda gìu mǝnana kǝ hama a ɓabondo ka, ama, <Wu tsǝk njargula ɓǝ cam kporong ace Mǝtalabangŋo.> >>#1:23 Ɓalli gbal aɓa: Isha 40:3.
24Aɓea amǝ Farisi mǝnana à túriá ka, 25à ɗì Yohana ama, <<Sǝ ɓǝ̀ a nda Kǝrǝsti,#1:25 Sǝn cau amur Kǝrǝsti a 1:20. ko Iliya, ko mǝno yì mǝɓangnǝa mala Ɓakuli raka, palang sǝ a kǝ pakki aɓwana batisǝma?>>
26Yohana earia wia ama, <<Ən nggǝ pakki aɓwana batisǝma nǝ mùr, sǝ ɓeɓwa nda came aɓalǝ wun mǝnana wu súrǝì raka, 27yì ka, nda ɓwa mǝnana kǝ yiu a tam tù ka, ǝn kārǝa mǝ nǝ panzǝ anggur-nkura male ka ɗàng.>>
28Mǝnia yì gir ka à pè a Betani, a nkaring Nggeasala Jodan, àkǝ̀ ban mǝnana Yohana pakkiyi batisǝma kam ngga.
Yesu nda Mǝgam mala Ɓakuli
29Ɓè ban fana ka, Yohana sǝn Yesu aban yiu nǝ bani, sǝ pǝlǝa na ama, <<Wu sǝn Mǝgam mala Ɓakuli, mǝnana twalkiyi cauɓikea mala ɓanza ka! 30Mǝnia ka nda ɓwa mǝnana ǝn na ce ama, <Ɓè ɓwa nda kǝ yiu atàm ngga. Yì ka, kútiǎm nǝ gulo, acemǝnana yì ka, ndakam ɗiɗyal sǝ à yì ɓǝlam.> 31Nggearǝ mim ngga ǝn súrǝì ɗiɗyal ɗang, sǝ tǝr yiu mem mǝnana ǝn nggǝ pakki aɓwana batisǝma nǝ mùr ka nda ace mǝnana ɓǝà lǝmdǝì amǝ Isǝrayila rǝì ka.>>
32Pǝlǝa Yohana bang gìr mǝnana súrǝì amurí ka ani: <<Ən sǝn Bangŋo mala Ɓakuli kǝla kutu, sulǝ nǝ kuli yi do amurí. 33Ɓǝ́ pà mǝ nǝ súrǝì ɗàng, ɓǝ̀ Ɓakuli mǝnana tasǝam ama ɓǝ̀n yi pakki aɓwana batisǝma nǝ múr ka nda nam raka. Nam ama, <Ɓwa mǝnana a sǝni Bangŋo mem sulǝo yi do amurí ka, nda ɓwa mǝnana nǝ̀ pakki aɓwana batisǝma nǝ Bangŋo Mǝfele ka.> 34Ən sǝnǝni sǝ ǝn nggǝ bangcau amurí ama, yì ka, nda Muna mala Ɓakuli.>>
Alaggana mana Yesu tita tunǝia ka
35Ɓè ban fana ka, Yohana nda kano ɗǝm andǝ aɓea alaggana male ɓari. 36Lang nǝ̀ sǝn Yesu aban kutio ka, na ama, <<Wu sǝn Mǝgam mala Ɓakuli!>>
37Lang alaggana mǝnia ɓari à ongŋǝni náná anggo ka, kara à o atà Yesu. 38Yesu nǝ̀ pǝlǝ rǝì ka, kara sǝnia aban yiu atè, sǝ ɗia ama, <<Mana wu earki ce?>>
À eare ama, <<Rabbi a ya ban sǝ a pa?>> (Rabbi ka ɓālǝi nda Malǝm.)
39Yesu earia wia ama, <<Wu yiu wu yi sǝni.>>
À pǝlǝa à wario à kya sǝn ban-do male. Sǝ à kya do atè bà du. Anggo ka bu-pwari ine nǝ pwarikpǝra na.
40Ɓè ɓwa mwashat atà mǝnia yì aɓwana ɓari mǝnana à ok cau mǝnana Yohana na ka nda Andǝru, mǝ'eam Shiman Bitǝrus. 41Andǝru pǝlǝa kum mǝ'eambi Shiman, sǝ ne wi ama, <<Sǝm kumǝna Mezaya (Tǝr Mezaya nda Kǝrǝsti, Mǝ'amsǝban mǝnana Ɓakuli bang ama nǝ̀ tasǝi ka.)>> 42Sǝ yiu nǝ Shiman aban Yesu.
Yesu sǝni kyap-kyap, sǝ na ama, <<A nda Shiman muna mala Yohana. À nǝ̀ tunǝo ama, Kefas.>> (Tǝr Kefas nda Bitǝrus, ɓālǝi ama, Tali.)
Yesu tunǝ Filip andǝ Nataniyel
43Ɓè ban fana ka, Yesu twali a ɓabumi ama nǝ̀ o a Galili. Yi kum Filip sǝ ne wi ama, <<Yiu atàm.>>
44Filip ka ɓwa Beseda na, la mala Andǝru andǝ Bitǝrus. 45Filip alta Nataniyel yi kumi sǝ ne wi ama, <<Sǝm kumǝna ɓwa mǝnana Musa gilǝgir amurí aɓa malǝmce Nggurcau mala Musa, andǝ mǝnana à gilǝa aɓa malǝmce mala amǝ'ɓangnǝa mala Ɓakuli ka, yì Yesu ɓwa Nazarat, muna mala Yisǝfu.>>
46Nataniyel na ama, <<A Nazarat! Kǝ gir mǝɓoarne nǝ̀ pur a Nazarat gbal?>> Filip ne wi ama, <<Yiu sǝni.>>
47Lang Yesu sǝn Nataniyel aban yiu ka, nacau amurí ama, <<Mǝnia ka ɓwa Isǝrayila mǝɓafoe na, mǝnana pànǝ nyir arǝì raka.>>
48Nataniyel ɗì Yesu ama, <<A pak lang sǝ a súrǝàm?>>
Yesu eari wi ama, <<Mǝnana a nda a tǝta nggun vwari ka, ǝn angŋa dǝmba ǝn sǝnǝ no, sǝ Filip tunǝo.>>
49Pǝlǝa Nataniyel ne Yesu ama, <<Rabbi, a nda Muna mala Ɓakuli! A nda Murǝm mala amǝ Isǝrayila!>>
50Yesu ne Nataniyel ama, <<A earnǝ mim acemǝnana ǝn banggo nǝma, ǝn sǝno a tǝta nggun vwari ka le? A nǝ sǝn agir mǝgulke mǝnana à kútì man ngga.>> 51Yesu nyare nea wia ama, <<Ən nggǝ na wun mǝsǝcau, wun nǝ̀ sǝn kùli nǝ mǝnna, andǝ amǝturonjar mala Ɓakuli aban eauwe andǝ sulǝo amur Muna mala Ɓwa.>>#1:51 Ɓalli gbal aɓa: Tite 28:12.
હાલમાં પસંદ કરેલ:
Yohana 1: mbu
Highlight
શેર કરો
નકલ કરો
Want to have your highlights saved across all your devices? Sign up or sign in
©️2022 The Seed Company
