Romanji 8
8
Banã Noauã Prit Duhlu Sãmtu
1Trã atsea, tora nu ari vãrã condamnã trã atselji cai suntu tu Hristolu Isus, 2cã legea a Duhlui cai da banã tu Hristolu Isus, nã ascãpã di legea a amãrtiiljei sh-a moartiljei. 3Cã, tsi eara niputut trã legea, tu atsea tsi eara slab trã itia a truplui, Dumnidzãlu pitricu Hiljiu a lui tu undzearea a truplui amãrtios tra s-hibã amãrtii,#8:3 Icã “amãrtii curbãnsitã”. sh-ashã elu condamnã amãrtia tu trup, 4tsi ndriptatea a legiljei si mplineascã tu noi cai nu imnãm dupã trup, ma dupã Duh.
5Cã atselji tsi imnã dupã trup, au mintea la orixili a truplui, iarã atselji tsi imnã tu Duh, au mintea la atseali tsi va Duhlu. 6Cã, minduirea domnuit di truplu ti dutsi tu moarti, iarã minduirea domnuit di Duhlu ti dutsi tu banã sh-pace, 7cã minduirea a truplui easti dushmãnilji cãtrã Dumnidzãlu, cã nu lji easti sumbãgat a legiljei al Dumnidzãu sh-nitsi nu poati. 8Atselji tsi bãneadzã dupã trup, nu pot s-lji arseascã al Dumnidzãu. 9Voi nu bãnats dupã trup, ma tu Duh macã dealihea Duhlu al Dumnidzãu bãneadzã tu voi. Macã vãrã nu ari Duhlu al Hristos, elu nu easti a Hristolui. 10Ma macã Hristolu easti tu voi, truplu easti mortu trã itia a amãrtiiljei, ma Duhlu nã da banã trã itia a ndriptatiljei. 11Macã Duhlu atsilui tsi nyie Isusul dit mortsã bãneadzã tu voi, atsel tsi nyie dit mortsã Hristolu va facã yii sh-trupurili a voastri muritoari prit Duhlu a lui tsi bãneadzã tu voi.
12Atumtsea, frats sh-surãri, noi him mprumuts nu cãtrã truplu tra s-bãnãm dupã trup, 13cã, macã bãnats dupã trup, va murits, ma macã prit Duhlu lã fãtsets s-moarã faptili a truplui, va bãnats. 14Cã tuts atselji cai suntu cãlãuzits di Duhlu al Dumnidzãu, aeshti suntu hiljilji al Dumnidzãu. 15Voi nu loat duhlu a sclãviiljei tra s-avets nãpoi fricã, ma loat Duhlu a nhiljeariljei prit cai grim: “Abba, Tate!” 16Idyiul Duh mãrtirseashti deadun cu duhlu a nostru cã him cilimenjlji al Dumnidzãu. 17Sh-macã him cilimenji, him sh-mushtinitori, mushtinitori al Dumnidzãu sh-mushtinitori deadun cu Hristolu, macã di-alihea nã munduim cu nãsu tsi shi s-nã mãrim cu nãsu.
Munduirili di Tora sh-Mãrirea tsi Yini.
18Mini minduescu cã munduirili di tora, nu axizescu s-misurã cu mãrirea tsi easti etimu s-nã si discoapirã. 19Cã vrearea atsea marea a fãpturiljei, ashteaptã cu niarãvdari discupirirea a hiljilor al Dumnidzãu. 20Cã fãptura s-i sumbãgã a lucrilor digeaba, nu cu vrearea a ljei, ma trã itia a Dumnidzãlui tsi u sumbãgã, cu nãdii 21cã sh-idyia fãptura va s-ascapã di sclãvia a aspãrdzeariljei trã intrari tu libertatea sh-mãrirea a cilimenjilor a Dumnidzãlui. 22Noi u shtim cã tutã fãptura suschirã deadun sh-ari durearili a amintariljei pãnã tu chirolu di tora. 23Nu mash ea, ma sh-noi idyilji, cai avem protlu frut a Duhlui, suschirãm tu noi, ashtiptãnda cu niarãvdari nhiljearea sh-arãscumpãrarea a truplui a nostru. 24Cã prit nãdii nã ascãpãm, ma nãdia cai s-veadi, nu easti nãdii, cã cai nãdãeashti la atsea tsi veadi? 25Ma, macã nãdãim la atsea tsi nu u videm, atumtsea u ashtiptãm cu arãvdari. 26Tutashã sh-Duhlu nã agiuti tu slãbintsa a noastrã, cã noi nu shtim trã tsi s-nã rugãm ashã cum prindi, ma idyiul Duhlu s-roagã trã noi cu suschirãri ni-spusi. 27Ma, atsel tsi sitãxeashti ininjli shtii cai easti minduirea a Duhlui, cã anamiseashti dupã vrearea al Dumnidzãu trã sãmtsãlji.
Ma Multu Dicãt Nichisits
28Sh-noi shtim cã Dumnidzãlu lã fatsi tuti lucrili s-lucreadzã ti ghinea atsilor tsi va elu sh-suntu acljimats dupã nãetea a lui. 29Cã atselji tsi Dumnidzãlu lji cunuscu di ma nãinti, sh-lji aleapsi di ma nãinti s-hibã unã soi cu icoana a Hiljilui a lui, ashãtsi elu s-hibã atsel protlu-amintat ntrã multsã frats sh-surãri. 30Sh-atselji tsi lji aleapsi di ma nãinti sh-lji acljimã, sh-atselji tsi lji acljimã lji ndriptã, sh-atselji tsi lji ndriptã sh-lji multumãri. 31Tsi s-dzãtsem trã aesti lucri? Macã Dumnidzãlu easti cu noi, cai poati s-hibã contra noi? 32Dumnidzãlu, tsi nu lu tsãnu Hiljiu a lui, ma lu prideadi ti noi tuts, cum nu va nã li da deadun cu nãsu tuti lucrili? 33Cai va lji acuzeadzã aleptsilji al Dumnidzãu? Dumnidzãlu easti atsel cai lji ndripteadzã. 34Cai easti atsel tsi lji-condamnã? Hristolu Isus easti atsel tsi muri, meti atsel tsi si nyie shi sheadi tu nandreapta a Dumnidzãlui sh-easti misit ti noi. 35Cai va nã dispartã noi di vrearea a Hristolui? Munduirea, strimtura, priaĝunirea, foamea, dizvishtearea, piricljiu icã spata? 36Ashãtsi cum easti scriatã: “Trã itia a voastrã noi ma nã dutsem tu moarti dzua tutã, nã lugursim ca oi trã tãljeari.” 37Ma, tu tuti aesti lucri noi him multu nichisitori prit atsel cai nã vru. 38Cã escu cãndãrsit cã, nitsi moartea, nitsi bana, nitsi anghilji, nitsi demonjlji, nitsi atseali di tora, nitsi atseali tsi va yinã, nitsi fuchiili, 39nitsi anãltsimea, nitsi ahãndamea, nitsi vãrã tsiva altã adratã, nu va poatã s-nã dispartã di vrearea a Dumnidzãlui, tsi easti tu Hristolu Isus, Domnul a nostru.
