Ütararea̧ Ma̧ȩ 20
20
Moiche ja̧ jo̧ȩra̧mi̧ jini̧ ja̧borëreyi̧nȩ
1Pea uipea̧rä, yabo baämȩ gupënȩrä, icharaita judiro̧ ütëborë go̧düdärärëreji̧ri̧dirȩ Chi quȩmȩ chiri maearäpȩ. Ado Cade quȩmȩ bë ma̧ri̧räpȩ cjiadiärëreji̧ri̧dirȩ japamitë. Ado ju̧ri̧pȩ ja̧boa̧nȩ Maria jini̧, Moiche ja̧ jo̧ȩra̧mi̧ pio jini̧. Ado na̧ra̧rëreji̧ri̧diro̧jȩ.
Ütë tjamo̧ judi ui oa go̧dü tänȩrëremȩdejȩ ta̧dëri pio judiri
2Ado icharaita judiro̧ cjo̧ro̧mȩräpȩ ju̧ri̧ ui decjiarëremȩde. Ado pio ju̧i̧iä tjoro tänȩrëreji̧ri̧diro̧jo̧ȩ Moiche ju̧i̧, Aro̧ pio ju̧i̧bo. 3Ado ma̧ȩ goaedëti̧ oa ni̧bäji̧ri̧rȩ yo̧rëreji̧ri̧diro̧jȩrȩ, ja̧di ta̧rëri̧ yo̧ji̧ri̧rȩ:
—Danȩrȩ, pio ibëbo ja̧bo tänȩa̧täremȩdiibe Jeova judi —yo̧a̧diro̧jȩrȩ—. Danȩrȩ, Jeova judi gito ana̧ri̧ tara tänȩa̧ oaiä, pea ja̧boa̧dirȩ chiriräpȩ jäa̧ji̧ri̧ pio judiro̧ orë. Dëbëdiärea̧ jo̧ dëbëräpȩ ju̧ri̧ pea ja̧bo tänȩa̧dejȩrȩ. Ado ji̧dë u̧i̧ chjadëtäremȩde davä pio ibëbo ja̧bo tänȩa̧rä judi. 4Danȩrȩ, ¿tjana̧ ju̧i̧iä pio yoa chiri maearäpȩ ëba ma̧na̧renȩro̧ibe Jeova ja̧ pumȩ ji̧ri̧? A̧ro̧rȩ pio yi ja̧bopea̧ oa, a̧ro̧rȩ goa̧ pio ji̧ri̧ nö̧ta ja̧bopea̧ oa ¿ëba ma̧na̧renȩro̧ibe? 5¿Tjana̧ ju̧i̧iä Ejito chiriri pio judiri ëba ma̧na̧renȩro̧ibe pio yoa chiri chjadëdëräpȩ? Danȩrȩ, goae tjamo̧dëde. Tjado japarea̧mi̧dëde. A̧ro̧rȩ juratärea̧ ji̧, jurarea̧ decjiade. Igera quȩmȩ jurarea̧ decjiade. Uva decjiade. Garanada quȩmȩ jurarea̧ decjiade. Ado ui decjiade ji̧dëri̧. Cjo̧ro̧rea̧mi̧dëräpȩrea̧rȩ. ¿Tjana̧ ju̧i̧iä ëba ma̧na̧rȩnȩro̧ibe pio jauëräpȩmo̧?“ Ja̧di ta̧rëri yo̧ji̧ri̧rȩ ma̧ȩ goaedëti̧ oa yo̧rëreji̧ri̧diro̧jȩrȩ.
6Ado Moiche judi, Aro̧ judi pio ju̧i̧ ta̧rëa̧ oaiä, a̧dë jäa̧diro̧jȩrȩ pumȩ ji̧ri̧, dëbëdiärea̧ jo̧ yu̧a̧rea̧ ya queri̧räpȩmo̧. Ado juchatura̧ tjätjäpë china̧därärëreji̧ri̧dirȩ jibëa̧ daito oa daburäpȩ yuro. Ado chjaodëri̧ cjitëa̧de Jeova ja̧ tatarea̧ üdë, a̧dë chjäte tatari̧ cjiari̧. 7Ado Jeova judi ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧:
8—Danȩ, mitëvä na̧ tjätjäpë ta̧i̧rea̧ to oa —yo̧a̧dejȩ—. Ado na̧ ayima̧i̧ Aro̧ pio ju̧i̧ nö̧ta, a̧dopa tänȩtä earequededibe icharaita ütëbo oa. Ado ütëborë ta̧dë queri̧räpȩ a̧dopea̧ oa cjiarä, jabechji̧, ta̧dë pio ju̧i̧ to̧bari̧ ni̧bätä earequedemȩ, ui üdë ta̧dë tjori pio judiri go̧dürea̧mi̧ dari̧. Ado ja̧di dari̧ japea̧ oaiä, jabechji̧ icharaita judiro̧ jararea̧ dapadirȩ, jibëa̧ bacabo, jënȩro̧ goa̧ pio judiro̧borë —yo̧a̧dejȩ.
9Ado Moiche judi Jeovarë yo̧a̧mi̧ mitërëremȩdejȩ jibëa̧ tjätjäpë ta̧irea̧ to oa, jënȩ ararërea̧ to pio ju̧i̧. Aja̧, dëbëdiärea̧ jo̧räpȩ ju̧ri̧ a̧rȩrëremȩ to pio ju̧i̧, Jeovarë cjiamȩräpȩ a̧rȩmȩ to pio ju̧i̧ mitëa̧dejȩ. 10Ado ja̧dëa ji̧ Moiche judi, Aro̧ pio judiborë a̧dopa tänȩrëreji̧ri̧diro̧jȩrȩ pumȩ ji̧ri̧ ta̧dë queri̧räpȩ ju̧ri̧. Ado ja̧di dari̧ japa ëte, ja̧di ta̧rëri̧ yo̧mȩrȩ yo̧rëremȩdejȩrȩ Moiche judi, ërecjia tjamo̧mȩrȩ:
—Ta̧rëchji̧vä mȩnȩro̧. Ta̧ra̧ puë chiadëti̧nȩrȩ. Jeova pio ju̧i̧ ji̧dë ma dëbëpe chjaomi̧ dari̧ jape chjaonȩrȩ. Ado yaba̧ ¿yö̧ta dari̧ japatä earenȩro̧ibe? Mȩnȩro̧ jarapea̧ oa, ibëa̧ ma̧na̧ri̧ japea̧ oaiä pio yoa ta̧dëri pio judiri ui oa ¿go̧dü tänȩtä earenȩro̧ibe? —yo̧mȩrȩ yo̧rëremȩdejȩrȩ Moiche judi, ërecjia tjamo̧mȩrȩ.
11Ado pio ji̧ri̧iäpȩmo̧ ni̧bä ëte, Moiche judi ta̧dë oa ni̧bätärea̧ ji̧, uëräpȩmo̧ are gatëa̧dejȩ jibëa̧ to oa. Ado goae tarari̧ gu̧na̧dejȩ ta̧dë oa. Yo̧a̧ri̧ co oa gu̧na̧dejȩ. Ado ui üdë goae tarari̧ ca̧ea̧de pumȩ judiro̧ chjadëri̧ jararea̧mi̧ dari̧, judiro̧ goa̧ üdë chjadëri̧ i̧ararea̧mi̧ dari̧. 12Jabo Jeova judi yo̧rëremȩdejȩ Moiche ju̧i̧iäpȩmo̧, Aro̧ ju̧i̧iäpȩmo̧:
—Jabo cjäri̧ manȩrȩ, oëra̧ japea̧nȩrȩ. Cüdë yo̧a̧mi̧ japadëa̧nȩrȩ. Dibëa̧ ju chiarea̧ra̧ pio ju̧ri̧ra̧ japaji̧ri̧mi̧ dari̧ japea̧nȩrȩ. Jabechji̧ mȩnȩro̧ chjadëri̧ yo̧tärea̧ ji̧, “Aja̧, Jeova judi ja̧di dari̧ yürüdidibe ui oa“ yo̧tärea̧ ji̧, judiro̧ pio coaiäpȩmo̧ ba chia jo̧rȩtatärea̧ ji̧, japadëa̧nȩrȩ. Ado mȩnȩro̧ coa tjamo̧ri̧ quëna̧tärea̧ ji peaja̧di tjamo̧ri̧ quëna̧dëa̧renȩro̧coe. Jabechji̧ chjadëri̧ quëna̧tärea̧ ji̧, 'Aja̧, ui oa tjamo̧ri̧ yürüpadida' quëna̧tärea̧ ji̧, tjamo̧ri̧ quëna̧dëa̧renȩro̧coe. Pio ju̧i̧iä jabechji̧, cüdë yo̧ë cji̧därërea̧ chiriräpȩ go̧düdärärea̧ yürütärea̧ ji̧, pio mȩnȩro̧ icharaita pio ji̧ri̧ chiri chjadëräpȩ ëba baätärea̧ ji, cjäri̧ marenȩro̧jȩrȩ, ëba baädëparenȩro̧jȩrȩ. Pio jiro chiriräpȩ go̧düdärärea̧ yürüdëparequededibe.
Aro̧ judi ja̧borëremȩde
22Japamitë chjätä ëte icharaita judiro̧ ütëborë Cade quȩmȩ chiriri pio judiri go̧dürëreji̧ri̧dirȩ. Ado japamitë chjätä ëte go̧düdäräa̧dirȩ Ora quȩmȩ ya̧mi̧räpȩ. 23Ado pio ju̧ri̧pȩ, Edo̧ quȩmȩ chiri dëbëräpȩ ju̧ri̧, Jeova judi ni̧bärëremȩdejȩ Moiche ju̧i̧, Aro̧ pio ju̧i̧bo. Ja̧di ta̧rëri̧ yo̧mȩrȩ yo̧rëremȩdejȩrȩ:
24—Danȩrȩ, Aro̧ judi, cüdë icharaita pio ji̧ri̧iäpȩmo̧ yo̧ë cji̧därërea̧ chiriräpȩ yu̧a̧rea̧ dadëpade. Jabechji̧ ja̧bopade. Jibëa̧ ütëti̧rea̧rȩ cjiamȩräpȩ baäpade. Mȩnȩro̧ yo̧a̧ri̧borë coa ta̧rëdiädëa̧ oaiä, Mariba quȩmȩräpȩ ta̧rëdiädëa̧ oaiä, jabechji̧ cüdë yo̧ë cji̧därërea̧ chiriräpȩ yu̧a̧rea̧ dadëpanȩrȩ. 25Ado yaba̧ ëba buatä earequedemȩ Aro̧ pio ju̧i̧ Ora quȩmȩ ya̧mi̧ uërä ju̧ri̧. Aro̧ joja pio ju̧i̧bo ëba buatä earequedemȩ Ereacha quȩmȩ pio ju̧i̧. 26Ado ju̧ri̧pȩ buadärä ëte, Aro̧ pio ju̧i̧ ja̧ chjiboremȩ oa, goë tuti ja̧beparea̧ chjiboremȩ pio ju̧i̧ cjüëno̧ ëte, ano̧ mire ina̧tä earequedemȩ Ereacha pio ju̧i̧. Jabechji̧ Aro̧ judi pio ju̧ri̧pȩ ja̧bopade.
27Ado Jeova judi yo̧a̧mi̧ japarëremȩde Moiche judi. Ora quȩmȩ ya̧mi̧ oa buarëremȩde o pio ji̧ri̧ nö̧ta. Uë oa buarëreji̧ri̧dirȩ icharaita judiro̧ ütëborë dae cjiari̧. 28Ado uë tjamo̧ oa buadärä ëte Moiche judi cjüëno̧a̧dejȩ Aro̧ ja̧ goë tuti ja̧beparea̧ chjiboremȩ pio ju̧i̧. Ado ano̧ mire ina̧dejȩ joja ju̧i̧, Ereacha pio ju̧i̧. Ado ya̧mi̧ uëräpȩ ju̧ri̧ ja̧borëremȩde Aro̧ judi. Ado ja̧dëa ji̧ Moiche judi, Ereachaborë birarëreji̧ri̧dirȩ ado chjereno̧.
હાલમાં પસંદ કરેલ:
Ütararea̧ Ma̧ȩ 20: Pume
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
©2021 Global Partners, All Rights Reserved