Go̧dürea̧ Ma̧ȩ 40
40
Ja̧di dari̧ cji̧däpea̧de dëbëdiärea̧ jo̧ üdë
1Ado Jeova judi yo̧rëremȩdejȩ Moiche ju̧i̧, ja̧di ta̧rëri̧ yo̧mȩrȩ:
2"Danȩ, pio yoa uirä yabo baämȩ gupënȩrä, yabo baämȩ doro, jabechji̧ cji̧däpea̧de dëbëdiärea̧ jo̧ üdë. 3Ado to cjara pio ju̧i̧ arëchäpea̧de dëbëdiärea̧ jo̧ tjoro ju̧ri̧. Yo̧ë cji̧däa̧ ma̧ȩ chiamȩ to cjara pio ju̧i̧, ichi chjö̧na̧i̧ ma̧ȩ chiamȩ to cjara pio ju̧i̧, ji̧dë u̧i̧ tjoro cjiamȩ jo̧ tjoro ju̧ri̧ arëchäpea̧de. Ado to cjara pio ju̧i̧ ja̧ dëbëräpȩ ju̧ri̧ tuti märäpea̧de tuti märärea̧ üdë. 4Ado peaja̧di mechja üdë arëcji̧däpea̧de. Ado mechjarä cji̧däpea̧ üdë, peaja̧di cji̧däpea̧de. Ado tataparea̧ chiamȩ to taru oa, peaja̧di arëcji̧däpea̧de tataparea̧bo. 5Ado goaeri̧ pjȩa̧mȩ cäarea̧ mechja oa, orora̧ ina̧ oa cjiamȩ mechja oa, peaja̧di arë cji̧däpea̧de. Yo̧ë cji̧däa̧ ma̧ȩ chiamȩ to cjara ja̧ dëbëräpȩ ju̧ri̧, tuti märärea̧ daita̧ra̧ri arë cji̧däpea̧de. Ado dairi yu̧a̧rea̧ joë ya oa tuti märärea̧ pio ju̧i̧ tuti märäpea̧de peaja̧di. 6Ado cäë yürüpea̧ oa guna̧rea̧ mechja üdë dëbëdiärea̧ jo̧ dëbëräpȩ cji̧däpea̧de. 7Ado tachja üdë dairäpȩ cji̧däpea̧de. Dëbëdiärea̧ jo̧, ado gu̧na̧rea̧ mechja tjoro ju̧ri̧ arëchäpea̧de. Ado uira̧ tjuriri̧ cjarechäpea̧de. 8Ado dëbëdiärea̧ jo̧ yuroti̧ oa baämȩ tutirea̧ üdë, peaja̧di cji̧däpea̧de cja̧rȩmȩ codë oa. Ado yu̧a̧rea̧ joë ya oa tuti märärea̧ üdë, peaja̧di tuti märäpea̧de.
9,10"Ado danȩ Moiche, chjö̧na̧i̧ oa cji̧däa̧ oa goarä, china̧chjari̧ tutia̧ oa cjiami̧ dari̧ cjiapea̧ oa, jabechji̧ yo̧ra̧ gu̧ro tänȩpea̧ maeade. Dëbëdiärea̧ jo̧ oa, dëbëdiärea̧ jo̧ tjoro ja̧ chjö̧na̧i̧ oa gu̧ro tänȩpea̧ maeade. Gu̧na̧rea̧ mechja üdë, peaja̧di yo̧ra̧ gu̧ro tänȩpea̧de, gu̧na̧rea̧ mechjaräpȩ ja̧beparea̧bo. 11Ado tachja üdë, arëchärea̧ tobo yo̧ra̧ gu̧ro tänȩpea̧de peaja̧di."
12"Ado ja̧di dari̧ japa ëte ëba jäjo̧ȩ Aro̧ ju̧i̧, jibëa̧ u̧ri̧ pio ji̧ri̧bo dëbëdiärea̧ jo̧ joë yaräpȩ. Ado ui choatädirȩ. 13Ado ui choa̧ duri oa ina̧ tänȩjo̧ȩ Aro̧ ju̧i̧. O ji̧ri̧ chjiari tjamo̧ goë tuti ja̧bepamȩ pio ju̧i̧ ja̧ chjibora̧ pio ju̧ri̧ra̧ ina̧ tänȩjo̧ȩ. Ado ja̧dëa̧ ji̧ yo̧ra̧ gu̧ro tänȩpea̧de. Ado yo̧ra̧ gu̧ro tänȩa̧ oaiä china̧chjari̧ tutia̧ oa cjiapade. Ca̧ea̧ pio ju̧i̧ ja̧bepapea̧ oa, o ji̧ri̧ chjiari goë tuti ja̧bepamȩrȩ ja̧bepapea̧ oa china̧chjari̧ tutia̧ oa cjiapade. 14Ado Aro̧ ja̧ u̧ri̧ pio ji̧ri̧ peaja̧di ina̧ tänȩpea̧dirȩ. Ina̧rea̧ chjibora̧ ina̧ tänȩpea̧dirȩ. 15Ado jäja pio ju̧i̧ yo̧ra̧ gu̧ro tänȩa̧mi̧ gu̧ro tänȩpea̧ maeadirȩ peaja̧di. Ca̧ea̧ pio ju̧i̧ chjadëri̧ ja̧bepapea̧ oa, o ji̧ri̧ chjiari goë tuti ja̧bepaji̧ri̧rȩ ja̧bepapea̧ oa, jabechji̧ yo̧ra̧ gu̧ro tänȩpea̧dirȩ. Ja̧di dari̧ gu̧ro tänȩa̧ oaiä, peaja̧di china̧chjari̧ tutia̧ oa cjiapadirȩ. Aro̧ pio judiri ja̧ji̧ri̧ judiro̧ bucho ana̧ china̧chjari̧ tutia̧ oa cjiapadirȩ o ji̧ri̧ chjiari goë tuti ja̧bepaji̧ri̧rȩ cjo̧ro̧pea̧ oa." Ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.
Moiche judi cji̧däa̧dejȩ dëbëdiärea̧ jo̧ oa
16Ado Jeova judi pio jȩa yo̧a̧mi̧ japarëremȩde Moiche judi. 17Ado ja̧di dari̧ japea̧ oaiä, jabechji̧ cji̧dädäräa̧ oa cjiarëremȩde dëbëdiärea̧ jo̧ üdë. Aja̧, icharaita judiro̧ Ejito chiriri judiri go̧düa̧ri ja̧ cja̧rȩmȩ ui codë chjätä ëte cji̧dädäräa̧diro̧jo̧ȩ. Yabo a̧rȩdiämȩ gupënȩrä, yabo baämȩ doro, jabechji̧ cji̧dädärärëreji̧ri̧diro̧jo̧ȩ dëbëdiärea̧ jo̧ oa ütara̧ doro. 18Ja̧di dari̧ japamȩrȩ cji̧därëremȩdejȩ Moiche judi icharaita pio ji̧ri̧ nöta. Jabechji̧ taru a̧rȩmȩ pio ju̧i̧ yabochja arë a̧ra̧diro̧jo̧ȩ. Ado ja̧di dari̧ japa ëte cji̧däa̧diro̧jo̧ȩ jo̧ taru yui oa, taru a̧rȩmȩrä cjiari̧. Ado ja̧di dari̧ japa ëte arë a̧ra̧diro̧jo̧ȩ jo̧ taru yui arerëmȩ to oa, jo̧ acä tobo, jo̧ pjatëtu ju tobo. Ado ja̧di dari̧ japa ëte, cji̧däa̧diro̧jo̧ȩ jo̧ taru yui tjoro cjiamȩ to oa. 19Ado ja̧di dari̧ japa ëte, jo̧ pjatëtu ju to uëmo̧i̧ ina̧diro̧jo̧ȩ ina̧rea̧ra̧. Ado ju̧i̧ uëmo̧i̧ ina̧rea̧ra̧ a̧de ina̧diro̧jo̧ȩ yo̧a̧ri̧ i chiari̧. Aja̧, Jeova pio judi yo̧a̧mi̧ japarëreji̧ri̧dirȩ.
20Ado ja̧di dari̧ japa ëte Moiche judi yo̧a̧ri̧ ta̧dë pjatë oa arëchäa̧dejȩ to cjararä. "Yo̧ë cji̧däa̧ ma̧ȩ chiamȩ" quȩmȩ to cjararä arëchäa̧dejȩ. Ado ja̧di dari̧ japa ëte to cjarari judiri arë go̧ioa̧dejȩ ararea̧ to oa cja̧ȩta̧ra̧ribo. Ado ja̧di dari̧ japa ëte ya ina̧rea̧ra̧ tuti cara̧dejȩ to cjara oa. 21Ado Moiche judi ja̧di dari̧ japa ëte arëchäa̧diro̧jo̧ȩ yo̧ë cji̧däa̧ ma̧ȩ chiamȩ to cjara oa dëbëdiärea̧ jo̧ro ju̧ri̧. Ado ja̧di dari̧ japa ëte märäa̧diro̧jo̧ȩ tuti märärea̧ oa. Ado ja̧di dari̧ märäa̧ oaiä a̧dë chjäte china̧chja jo̧ tjoräpȩ ju̧ri̧ tutia̧ oa cjiadiärëremȩde to cjara üdë, yo̧ë cji̧däa̧ ma̧ȩ chiamȩ to cjara üdë, Jeova judi yo̧a̧mi̧.
22Ado ja̧di dari̧ japa ëte arë cji̧däa̧diro̧jo̧ȩ mechja oa dëbëdiärea̧ jo̧ tjoräpȩ, dai oa cjiamȩ jo̧ tjoräpȩ. A̧dë chjäte china̧chja jo̧ tjo tuti märärea̧ dairäpȩ arë cji̧däa̧diro̧jo̧ȩ. Tuti märärea̧ chirina̧ arë cji̧däa̧diro̧jo̧ȩ. 23Ado ja̧di dari̧ japa ëte, mechjarä ju̧ri̧ arëchäa̧diro̧jo̧ȩ chja̧pe oa, Jeova ja̧ oa. Jeova judi yo̧a̧mi̧ japarëreji̧ri̧dirȩ.
24Ado ja̧di dari̧ japa ëte cji̧däa̧diro̧jo̧ȩ tataparea̧ chiamȩ to oa dëbëdiärea̧ jo̧ro, dai oa cjiamȩ jo̧ tjororäpȩ ju̧ri̧. Chja̧pe oa chiamȩ mechja ja̧ dëbëräpȩ ju̧ri̧ cji̧däa̧diro̧jo̧ȩ. 25Ado Jeova ja̧ dachoro tatapea̧dejȩ tataparea̧ pio ju̧i̧ Moiche judi. Jeova judi yo̧a̧mi̧ japarëremȩde. 26Ado ja̧di dari̧ japa ëte goaeri̧ pjȩa̧mȩ cäarea̧ mechja pio ju̧i̧ arë cji̧däa̧diro̧jo̧ȩ dai cjiamȩ jo̧ tjo china̧chjaräpȩ. Orora̧ japea̧ oa cjiamȩ mechja pio ju̧i̧, goaeri̧ pjȩa̧mȩ cäarea̧ mechja pio ju̧i̧ arë cji̧däa̧diro̧jo̧ȩ tuti märärea̧ dëbëräpȩ, tuti märärea̧ dairäpȩ. 27Ado Jeova judi yo̧a̧mi̧ cäa̧dejȩ Moiche judi goaeri̧ pjȩa̧mȩ cäarea̧ pio ju̧i̧. 28Ado ja̧di dari̧ japa ëte dai oa cjiamȩ joë ya oa tuti märäa̧diro̧jo̧ȩ. 29Ado ja̧di dari̧ japa ëte gu̧na̧rea̧ mechja pio ju̧i̧ cji̧däa̧dejȩ. Dëbëdiärea̧ jo̧ dëbëräpȩ ju̧ri̧ cji̧däa̧dejȩ dairäpȩ. Ado ja̧di dari̧ japa ëte goe gu̧rori̧ cäë yürüa̧dejȩ Moiche judi. Tirigo cho pjo̧no̧i̧ oa peaja̧di cäë yürüa̧dejȩ. Jeova judi yo̧a̧mi̧ cäë yürürëremȩdejȩ. 30Ado ja̧di dari̧ japa ëte Moiche judi arëchäa̧dejȩ tachja oa. Dëbëdiärea̧ jo̧, ado gu̧na̧rea̧ mechja tjoro ju̧ri̧ arëchäa̧dejȩ. Ado ja̧di dari̧ japa ëte ui oa cjarechäa̧dejȩ. O ji̧ri̧ chjiari goë tuti ja̧bepaji̧ri̧ pio judiro̧ chjadëri̧ joapea̧ oa ui cjarechäa̧dejȩ tjuriri̧. 31Ado Moiche judi, Aro̧ judi, pio ju̧i̧ ja̧ u̧ri̧borë, jabechji̧ pio jiro tachjarä joarëreji̧ri̧dirȩ jibëa̧ ichi oa, jibëa̧ tabo. 32Judiro̧ gu̧na̧rea̧ mechjaräpȩ jäa̧mi̧ nöta, dëbëdiärea̧ jo̧räpȩ yu̧a̧mi̧ nöta, jabechji̧ joarëreji̧ri̧dirȩ yabochja. Jeova judi Moiche ju̧i̧ yo̧a̧mi̧ joarëreji̧ri̧dirȩ.
33Ado ja̧di dari̧ japa ëte, tachja oa arëchä ëte dëbëdiärea̧ jo̧ yuroti̧ oa cjiamȩ tutirea̧ oa cji̧däa̧diro̧jo̧ȩ, gu̧na̧rea̧ mechjabo tjoro cjiari̧. Ado tutirea̧ joë ya pio ju̧i̧ chjadëri̧ tutipea̧ oa tuti märäa̧diro̧jo̧ȩ. Ja̧di dari̧ japamȩrȩ ja̧bepadärärëremȩde Moiche judi icharaita pio ji̧ri̧ nöta ja̧bepamȩrȩ.
Ütë tjamo̧ ja̧ chjacjiamȩrea̧ üdë birarëremȩdejȩ dëbëdiärea̧ jo̧räpȩ
34Ja̧dëa ji̧ go̧a̧ra̧ ë üdë birarëremȩde dëbëdiärea̧ jo̧ oa ina̧rea̧mi̧ dari̧. Ado Jeova ja̧ chjacjiamȩrȩa̧ üdë, a̧dë chjäte tatamȩ pio judi ma̧i̧ dari̧ tatarëremȩde dëbëdiärea̧ jo̧ tjori pio judiri. 35Ado pio ju̧i̧iä Moiche judi yu̧a̧rea̧ dadërëremȩde.
Icharaita judiro̧ chjätäti̧ cjiaji̧ri̧rȩ cjo̧ro̧rëreji̧ri̧dirȩ jënȩro̧ Canaa̧ quȩmȩ chiriräpȩ go̧düdäräa̧rä yuro
36-37Ado icharaita judiro̧ chjätäti̧ cjiaji̧ri̧rȩ cjo̧ro̧däräriä baärëreji̧ri̧dirȩ Canaa̧ quȩmȩ chiriräpȩmo̧. Go̧a̧ra̧ ë pio ju̧i̧ ütarë daji̧ri̧rȩ baärëreji̧ri̧dirȩ. Go̧a̧ra̧ ë üdë dëbëdiärea̧ jo̧ri pio judiri a̧dë cjitëa̧rä judi, iëcheno̧rëreji̧ri̧dirȩ jibëa̧ jo̧ bori̧ oa. Jabo a̧dë cjitëdëa̧rä judi, jabechji̧ iëchädëa̧dirȩ. Jabechji̧ cjiadiäa̧dirȩ. A̧dë cjitëa̧rämo̧ iëcheno̧ ëte baäeno̧rëreji̧ri̧dirȩ ado chjereno̧. Dëbëdiärea̧ jo̧ pio ju̧i̧bo iëchä ëte ara baärëreji̧ri̧diro̧jo̧ȩ. Ja̧di dari̧ japaji̧ri̧rȩ cjo̧ro̧däräriä baärëreji̧ri̧dirȩ japamitë ana̧. 38Ado judiro̧ chjätäti̧ cjia̧ nöta, jabechji̧ doti̧mi̧ darëreji̧ri̧diro̧jo̧ȩ Jeova ja̧ go̧a̧ra̧ ë oa, dëbëdiärea̧ jo̧ uëmo̧i̧ baramȩ oa. Ado gȩnȩrä cjo̧dë gärimȩ oa ano̧ mire darëreji̧ri̧diro̧jo̧ȩ.
હાલમાં પસંદ કરેલ:
Go̧dürea̧ Ma̧ȩ 40: Pume
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
©2021 Global Partners, All Rights Reserved