Lewiƒuɔ Ɔda Bubo 2
2
Edula Ebi Akpala Ɔdi
1“ ‘Si ukyuli ɔdi úti edula ebi úboku ɔnii ubabla akpala ni, ɔlɛ ka ɔkɔ ala ammɔ ɔbla ɔlaaƒɔ sɛɛn. Na ɔdi ka uti nnɔ uwi-nwu lili na uti oloƒui ɔsia-nwu lɛlɔ. 2Ɔmɛni kama na uti ala ammɔ uboku Aaron bebi bananabi bakpane bammɔ na badubudie ɔlaaƒɔ ɔmmɔ lɛkɔkɔ linwi ku nwuna lɛlɔ nnɔ ku oloƒui ɔmmɔ ƒui. Na badubuti bakyula lɛkpabi lɛlɔ aani enyimo adila bɔsia akpala. Na ɔmmɔ ɔdubɔbla akpala bɔkyula ƒui ute-mi na uyɔ ɔmmɔ ɔnyi ƒɛƒɛɛ ɔyɔ-mi kaƒɔ. 3Na ɔlaaƒɔ ɔkladi ɔni mebu ɔdi Aaron ku nwuna bebi bananabi ɔdi. Na ɔdi lɛla lɛni na bédie bése sɛsɛɛ na akpala ani na bábla béte-mi kemmo.
4“ ‘Si ukyuli ɔdi úti edula ebi etela ani na béƒi bodobodo lɛyu kemmo ɔduboku-mi ni, ɔlɛka ɔnu ka ɔdi ɔlaaƒɔ sɛɛn ɔni na bɔnyii bɔdi buuubo-nwu kemmo. Na uti nnɔ ɔsala-nwu kemmo. 5Na si lɛbuala kalɛkɛ lɛlɔ na ɔ́bla lɛla lɛni na úti ɔdubo ubete-mi mmɔ ni, ɔnu ka ɔdi ɔlaaƒɔ sɛɛn ɔni na bɔnyii buuubo-nwu kemmo na ɔ́sala-nwu ku nnɔ. 6Na ɔbwɛ-nwu kɔkɛ kɔkɛ na uwi nnɔ. Na ɔmmɔ ɔdi edula etela akpala. 7Na si etela ani na úti ɔduboku mmɔ adi lɛla lɛni na bánwa na lɛbuala libui lɛkya kemmo ni, ɔnu ka ɔlaaƒɔ ɔmmɔ use sɛɛn na ɔ́sala-nwu ku nnɔ. 8Ala ani na lɛ́ka mɛni si ana ɔdi biala na éti edula ebi ábla na éti aduboku-mi ni, na eti ete ɔkpane na anwu ɔdubuti usienku lɛkpabi lɛmmɔ lɛlɔ. 9Na ɔkpane ɔmmɔ ɔdubudie lɛkpabi lɛlɔ enyimo adila ani na ɔdubuti ɔkyula ute-mi na lɛkpabi lɛmmɔ lɛlɔ. Na ɔdubɔbla akpala bɔkyula ƒui ute-mi na uyɔ ɔmmɔ ɔnyi ƒɛƒɛɛ ɔyɔ-mi kaƒɔ. 10Na ɔkladi ɔni mebu ɔdi Aaron ku bebi bananabi ɔdi aani bana kadikɔ kani bédie bése sɛsɛɛ ɔ́siku akpala ani na béboku-mi kemmo.
11“ ‘Edula ebi etela biala na ɔdi éti aduboku-mi ni, nu ka bɔnyii bɔdi buuubo-nwu kemmo. Ɔsika lɛla lɛni kemmo na bɔnyii bɔkya iye uwɔ ni, utalɛka beti-nwu babla ogya akpala bɔkyula ƒui bete-mi. 12Bakana beti ala ammɔ basala ku kemo edula awɔdi ani báka bɔƒɛ beboku-mi aani etela, nsu balakyula-nya aani ogya akpala bɔkyula ƒui na uyɔ ɔmmɔ ɔnyi ƒɛƒɛɛ ɔyɔ-mi kaƒɔ. 13Ɔƒɛni edula ebi etela biala na bíti bɛdububoku-mi ni, bɛnu ka mma bɔsia-nwu lɛlɔ kalɛ na mina bunyimi bɔni ndanku mma emini bɔkya bina kakpa edula etela kemmo uwi biala. Na bɛsia ɔmmɔ anu uwi ndi uwi.
14“ ‘Ɔƒɛni lɛnɔ si bíti edula ebi udu biala ani náka bugyie bɛdububoku-mi ni, bɛƒɛ edula aboyo awɔdi ammɔ na biƒi-nwu ɔgya kemmo na bikuo-nwu na ɔbwɛ na biti bibunku bina edula awɔdi bɔƒɛ etela ammɔ. 15Na biti nnɔ bibunku na biti oloƒui bɛsia. Na ndubɔƒɔ-nwu lite-mii aani edula ebi akpala. 16Ɔmmɔ kama ni, ɔkpane ɔdubudie edula ebi aboyo ani na bíƒi na bíkuo-nya bɛ́bwɛ mmɔ enyimo adila ku nwuna lɛlɔ nnɔ ku oloƒui ɔmmɔ ƒui na uti ɔkyula aani akpala bɔkyula ƒui ute-mi.’
હાલમાં પસંદ કરેલ:
Lewiƒuɔ Ɔda Bubo 2: lef
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.