Israelƒuɔ Bɔlɛ 8
8
1Amu na Unwoti ɔ́su Mose ɔnini, “Teesie na atásu Ƒarao anini, ‘Ami Unwoti nnii ya na mina bekyuli batɔlɔ kalɛ na batákpa-mi. 2Na si anii eledie-ma ulu na batɔlɔ ni, ndubɔya na bapɔtɔlɔ baƒɔ Egyipte kalɔ lɛlɔ ƒui. 3Na ndubɔya na Nil Ketu keyi ku bapɔtɔlɔ. Na bapɔtɔlɔ bammɔ badubo ƒula kaduli kemmo buduo. Na beduo ƒula katɛnkɔ ku atɛla lɛlɔ. Na beduo ƒula benengu kɔduli ku Egyipteni biala kaduli. Na badubuduo bina bodobodo ayu ku bodobodo ɔlaaƒɔ kɔnwukɔ ƒui. 4Na badubɔƒulu belie-ɔ lɛlɔ ku ƒula benengu ku ƒula bekyuli ƒui lɛlɔ.’ ”
5Amu na Unwoti ɔ́su Mose ɔnini, “Su Aaron na unene nwuna ugyii ɔdadi ɔmmɔ ɔtina etukpa ku abiɔ, na ɔya na bapɔtɔlɔ balɛ basiku-nya kemmo na bebeyi Egyipte kalɔ lɛlɔ ƒui.”
6Anwuɔsu Aaron únene ugyii ɔmmɔ na bapɔtɔlɔ bákɔ bálɛ Egyipte kalɔ lɛlɔ ƒui. 7Nsu Ƒarao bevone lɛnɔ bábla akɔla budie taatina na báya na bapɔtɔlɔ bákɔ bálɛ kalɔ kammɔ kemmo.
8Amu na Ƒarao ɔ́lɔ Mose ku Aaron na ɔ́su-ma ɔnini, “Bɛkpali Unwoti na ɔya na bapɔtɔlɔ bammɔ ƒui balɛ ami ku mina kalɔ bekyuli ƒui lɛlɔ. Na ndubute bina bekyuli kuƒi na batɔlɔ. Kalɛ na batábla akpala bete Unwoti.”
9Amu na Mose ɔ́su Ƒarao ɔnini, “Ndubɔyɔ ka awɔ ɔlati ete-mi uwi ɔni na aayɔ́ ka libo, na mbevele Unwoti lite-mii na ɔda bapɔtɔlɔ bammɔ udie bina bekyuli ku bina benengu kɔduli, na kebu bani kani nkya Nil Ketu kammɔ kemmo kani.”
10Mmɔ ni, Ƒarao údie kenye ɔnini, “Bo na ebevele Unwoti ete-mi kɔnaadi.”
Amu na Mose udie kenye ɔnini, “Línu. Ndubɔbla lɛla lɛni na éye-mi lite-ɔ. Na mmɔ na adubɔnu bɔti ka Katɔti ɔdi uuubo na utulo bula Unwoti Katɔti. 11Na ɔmmɔ kama bapɔtɔlɔ bammɔ ƒui badubɔtɔlɔ mmɔ, nsu Nil Ketu kemmo badi kani ndubɔsɔ bakya. Na ƒula benengu ku ƒula bekyuli bakɛ bɔnwuna.”
12Ka Mose ku Aaron bátɔlɔ Ƒarao kudɔ ni, Mose úsie na útévele Unwoti ka ɔda bapɔtɔlɔ bammɔ udie Egyipte kalɔ lɛlɔ. 13Na Unwoti únu Mose bɔ́kpali. Na bapɔtɔlɔ bani ƒui nkya Egyipte kalɔ lɛlɔ békpi na ekpo ekpo ammɔ ƒui, nsu bani nkya Nil Ketu kemmo kani nétekpi. 14Na Egyipteƒuɔ bábuma bapɔtɔlɔ bammɔ bétéwi liku linwi na bébun na beenwenyi geen. 15Na ka Ƒarao ɔ́nu ka bapɔtɔlɔ bammɔ ƒui békpi ni, ɔ́sɔ únwini kasusu na úni ɔnii ulenu Mose ku Aaron litemi kalɛ na Unwoti ɔ́su úse.
Baƒɔtɔ Báƒɔ Egyipte Kalɔ Ƒui
16Amu na Unwoti ɔ́su Mose ɔnini, “Su Aaron na uti ugyii ɔni na ɔda mmɔ ɔƒiɛmi kalɔ, na ɔdubɔya na ɔtumu ɔni malɛ mmɔ uyi Egyipte kalɔ lɛlɔ. Na ɔtumu ɔmmɔ ɔdubunwini baƒɔtɔ bataadu bekyuli.” 17Anwuɔsu Aaron úti ugyii ɔmmɔ ɔ́ƒiɛmi kalɔ na ɔtumu uyi Egyipte kalɔ lɛlɔ. Na ɔtumu ɔmmɔ únwini baƒɔtɔ. 18Nsu ka Ƒarao bevone lɛnɔ banii beedie baƒɔtɔ bammɔ badi ni, bátakana, na Mose badi báƒɔ bekyuli ku bebuo lɛlɔ ƒui.
19Mmɔ na Ƒarao bevone bammɔ báni béde Ƒarao na básu-nwu banini, “Lɛla lɛni mɔɔlɛ́ mɛni lɛ́si Katɔti kudɔ.” Nsu Ƒarao ɔ́mu ɔ́yu kayi ɔkplu na útenu-ma litemi kalɛ kani na Unwoti ɔ́su úse.
Balɔlɔ Béyi Egyipte Kalɔ Lɛlɔ
20Amu na Unwoti ɔ́su Mose ɔnini, “Ta kɔnaadi ɔtanta tutuutu na atáni ede Ƒarao si úsela ketu. Na asu-nwu anii, ‘Unwoti ɔnii die mina bekyuli ulu na besie batákpa-mi. 21Na si étedie-ma ulu na batɔlɔ ni, ndubɔya na balɔlɔ bebewi awɔ ku ƒula benengu ku ƒula kalɔ bekyuli ƒui lɛlɔ ku kɔduli kemmo na baƒɔ kalɔ kplu kesii biala.
22“ ‘Nsu limeyi lɛmmɔ lɛlɔ ni, Gosen kalɛkɛ kesii kani na mina bekyuli belie aka ni, alɔlɔ biala ɔɔɔdubo mmɔ bɔkya. Ndubɔbla ɔmɛni na Ƒarao ɔnu ɔti ka ami ɔni ndi Unwoti nkya kalɔ kamɛni kemmo. 23Ndubɔya na kavumana kakya mina bekyuli ku Ƒarao bekyuli ntɛ. Na ndubɔya na akɔla ala budie taatina amɛni alɛ kɔnaadi.’ ”
24Na Unwoti ɔ́bla lɛni sɔsɔ na balɔlɔ yuu badi báyu na bétéduo Ƒarao kaduli ku nwuna benengu kɔduli. Na balɔlɔ bamɛni báƒɔ Egyipte kalɔ lɛlɔ ƒui kede kede na lɛla biala líbie na kalɔ kammɔ lɛlɔ.
25Amu na Ƒarao ɔ́lɔ Mose ku Aaron ɔnii, “Biteesie na bitábla bina akpala bite bina Unwoti na Egyipte kalɔ lɛlɔ mɛni kani.”
26Amu na Mose údie kenye ɔnini, “Ɔɔɔdia ka bɔbla akpala ammɔ na Egyipte kalɔ lɛlɔ, ɔsika si bɔnii bɔɔbla akpala ammɔ na mɛni ni, bula akpala ammɔ adubuse Egyipteƒuɔ lɛlɔ na atu-ma anumi. Na si úbo úte lɛni ni, bubo na baaadubo-bu atabi bubo? 27Anwuɔsu ɔlɛka buti emeyi atɛ busie butéduo ketele kemmo na butábla akpala ammɔ na mmɔ aani kalɛ na bula Unwoti Katɔti úbo-bu ɔda.”
28Amu na Ƒarao ɔ́su-ma ɔnini, “Ndubute-mii kuƒi na bisie bitákpa bina Unwoti Katɔti na ketele kemmo, nsu bitesie ɔgyu. Na ɔƒaani ni, bɛkpali katɔ na bivele Unwoti na mina lili.”
29Amu na Mose údie kenye ɔnini, “Si lɛ́nya lɛ́tɔlɔ-ɔ kudɔ ni, ndubo Unwoti buvele bute-ɔ na balɔlɔ bammɔ batɔlɔ awɔ ku ƒula benengu ku ƒula bekyuli lɛlɔ kɔnaadi. Mmomu bulayɔ ka asɔ atɔlɔ-bu lɛnɔ na elete kuƒi na bula bekyuli besie batábla akpala bete Unwoti.”
30Amu na Mose ɔ́tɔlɔ Ƒarao kudɔ na úsie útevele Unwoti. 31Unwoti únu Mose bɔkpali. Na balɔlɔ bammɔ ƒui bátɔlɔ Ƒarao ku nwuna benengu ku nwuna bekyuli kɔduli, na ina alɔlɔ unwi muedi ɔ́sɔ útebu Egyipte kalɔ lɛlɔ. 32Nsu ɔmɛni kama Ƒarao kayi kásɔ kábayu ɔkplu kébu na úbulo Israelƒuɔ ulu budie.
હાલમાં પસંદ કરેલ:
Israelƒuɔ Bɔlɛ 8: lef
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.