Israelƒuɔ Bɔlɛ 18
18
Yetro Úsie Útákya Mose Kenye
1Uwi ɔmmɔ ni, Yetro ɔni ndi Midianƒuɔ ɔkpane na ɔdi Mose aasi únu ala ani ƒui na Katɔti ɔ́bla úte Mose ku Israelƒuɔ, ku kalɛ na Unwoti ɔ́kpanku Israelƒuɔ ɔ́lɛku Egyipte kalɔ lɛlɔ.
2Na ka Mose ɔ́da ulekudi Sipora ɔ́kya ɔti kudɔ ɔsu ni, Yetro ɔ́kpanku-nwu ɔ́da na bésela ɔgyani kudɔ 3ku bana bebi inyɔ bammɔ. Na bebi bammɔ unwi baalɔ Gerson ɔni kalɔ ndi ɔƒɔ, ɔsika Mose ɔ́su ɔnini, “Línwini ɔƒɔ na kadi bamba kalɔ lɛlɔ.” 4Na ubidi unyɔdi baalɔ Elieser ɔni kalɔ ndi mina udiene, ɔsika Mose ɔ́su ɔnini, “Mina ɔti ɔdi Udiene Katɔti, ɔsika údie-mi ɔ́lɛku Egyipte ɔga enu kemmo.”
5Amu na Yetro, Mose aasi ɔmɛni, ku Mose ulekudi ku nwuna bebi inyɔ bammɔ bátásiaku Mose na ketele kemmo kesii kani na Mose ɔ́bla keliekɔ na Katɔti kɔbi kudɔ. 6Na asa badubɔyu ulu ni, ɔ́sia kenye úmene Mose ka anwu ku ulekudi ku nwuna bebi inyɔ bakɛ ulu lɛlɔ badubo.
7Anwuɔsu Mose ɔ́ta ɔnii utásiaku nwuna aasi na ulu lɛlɔ. Ka útásiaku-nwu ni, úbo kalɔ úte-nwu na ɔ́kya-nwu kɔgbu. Na bégyele lɛlɔ kaduɛ. Na ɔmmɔ kama bénwini bésie nwuna adi kevo kemmo. 8Na Mose ɔ́su nwuna aasi ala ani ƒui na Unwoti ɔ́bla Ƒarao ku Egyipteƒuɔ na Israelƒuɔ ɔsu. Na ɔ́sɔ ɔ́su-nwu abi ani bébo na ulu lɛlɔ ku kalɛ na Unwoti ɔ́da-ma údie. 9Na ka Yetro únu ala ani ƒui na Mose ɔ́su-nwu ka Unwoti ɔ́bla ku kalɛ na údie Israelƒuɔ ni, lɛlɔ lɛ́yɔ-nwu geen. 10Amu na ɔ́su ɔnini, “Bɛya na bumwi Unwoti ɔni náda-mii udie Ƒarao ku Egyipteƒuɔ enu kemmo. Na bɛya na bɔsɔ bumwi Unwoti ɔni náda nwuna bekyuli údie bekyuli bamba kabla bɔbla kalɔ! 11Ɔƒɛni lɛ́nu lɛ́ti ka Unwoti utulo benwoti bani ƒui nkya, ɔsika ɔ́bla ala amɛni úti ɔ́ƒɔ bekyuli bani nkya mɔɔbla Israelƒuɔ kalala.” 12Amu na Mose aasi ɔmɛni úte bebuo ku akpala bamba na béti bákpa béte Katɔti. Na Aaron ku Israelƒuɔ batɔnkune bésie na bátádiku-ma bodobodo na Unwoti anumi.
Mose Údie Litemi Batɛne
13Kadi kégye ni, Mose úti nwuna liboku na úse kalɔ ɔɔtɛ etemila. Na ɔ́tɛ etemila ɔ́si ɔtanta laa útédu useyi ɔni na útakɛ kɔnu na ɔnwuna. 14Amu ka nwuna aasi ɔ́nu kabla kani na Mose ɔkya ɔɔbla teete bekyuli bammɔ ni, úye-nwu ɔnini, “Bi kabla udu na awɔ lɛti enye aabla teete bekyuli bamɛni lɛni? Bi ɔsu na awɔ lɛti mɔɔbla ɔmɛni, na bekyuli benye-ɔ lɛlɔ ɔ́si ɔtanta útédu usien ka atɛ bana litemi ete-ma?”
15Amu na Mose údie kenye ɔnini, “Mɔɔbla ɔmɛni, ɔsika bekyuli baawia Katɔti lɛyɔla bati. 16Na si nkyuli inyɔ bakɛ litemi ni, beebo-mi kudɔ na lɛtɛ-ni lite-ma, na lɛsia ɔmmɔ lɛlɔ lɛtina-ma Katɔti ɔda bubo ala.”
17Amu na Mose aasi údie kenye ɔnini, “Eeenye alábla ala ulu lɛlɔ. 18Na mɔɔsu-ɔ ka uwi uletu awɔ ku bekyuli bamɛni ƒui lɛlɔ lɛdubo-mii butu geen, ɔsika etila amɛni etulo-ɔ buti, awɔ lɛti. 19Anwuɔsu nu mina litemi ɔƒɛni. Na eti bɔlɛ bɔni mɔɔlɛ-ɔ mɛni. Na Katɔti ɔdubunyeku-ɔ. Awɔ nye Katɔti kenye te bekyuli bammɔ ƒui. Na etemila biala na bebo ka basu ni, ya na beti-nya beboku Katɔti. 20Na ataatina-ma ɔda bubo etemila ammɔ. Na atina-ma kalɛ na ɔlɛka belie ngba bavinku. Ku kabla kani na ɔlɛka babla. 21Na awɔ édie ɔma ɔmmɔ bekyuli bani na bebo ɔlɔkplu na beeti ɔbu teete Katɔti, na baabla ala ulu lɛlɔ, na badi bekyuli bani neeebo egulabi lɛnungyie, na eti-ma enyene nkyuli mpim mpim kenye ku eti anyɔ anyɔ kenye ku liti liti kenye ku leevu leevu kenye. 22Na bekyuli bamɛni ndubutaatɛ bekyuli bammɔ ƒui litemi. Nsu si etemila adi akya na étulo-ma ni, na aya beti-nya beboku-ɔ. Na etemila ani neeebo ɔkplu ni, ama alati bakana batɛ-nya. Ɔmɛni ɔdubɔya na ƒula etila abla ƒaaƒaa. Ɔsika badubutiku-ɔ etila ammɔ adi. 23Na si ábla ɔmɛni aani kalɛ na Katɔti úbo-ɔ ɔda ni, lɛlɔ lɛdubɔkɔsi-ɔ butu. Na bekyuli bani litemi bátɛ badubo bunwini besie bana kɔduli na kaƒɔ kayɔ-ma.”
24Mose únu nwuna aasi bɔlɛ na ɔ́bla ɔ́siaku ala ani na ɔ́su-nwu lɛlɔ. 25Anwuɔsu údie bekyuli bani námanku kabla kammɔ na Israelƒuɔ akɔ. Na úti badi unyene nkyuli apim kenye na úti badi lɛnɔ unyene nkyuli eti anyɔ kenye na badi lɛnɔ benye nkyuli liti kenye na badi lɛnɔ benye nkyuli leevu kenye. 26Na bekyuli bamɛni baatɛ etemila teete Israelƒuɔ uwi ndi uwi. Na beeti etemila ani mbo ɔkplu teete Mose na ɔɔtɛ. Nsu ani neeebo ɔkplu ni, ama alatidi mɔɔtɛ-nya.
27Amu na Yetro úye ulu ɔ́siku Mose kudɔ, na ɔ́tɔlɔ úsie nwuna ɔma.
હાલમાં પસંદ કરેલ:
Israelƒuɔ Bɔlɛ 18: lef
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.