Israelƒuɔ Bɔlɛ 15
15
Mose Ku Miriam Kɔgya Kɔni Bátu
1Amu na Mose ku Israelƒuɔ bátu ɔnu bémwi Unwoti banini,
“Ndubɔtu ɔnu limwi Unwoti.
Ɔsika Úkpo kekpo kebendi na ɔ́di lɛlɔ
Na bapɔnkɔ ku bana bakane ƒui
úbo-ma útákya ɛpu kemmo.
2Unwoti ndi mina ɔyikun ɔni ɔsu na mɔɔtu kɔgya.
Anwu nénwini mina ɔƒɔne.
Na mina Katɔti na ndubumwi,
Ɔdi mina Katɔti, mina bati kuuku Katɔti,
na ndubɔkɔliku-nwu lɛnyi katɔ.
3Unwoti ɔdi ukpone geen.
Na nwuna lɛnyi ndi Unwoti.
4Ƒarao bekpone ku bana kɛɛkɛ ƒui
ɔ́nyina-ma ɔ́kya ɛpu kemmo.
Ƒarao benengu batɔnkune ƒui
bátɛ Ɛpugyie kalɔ.
5Na ɛpu ligyu lɛmmɔ líbi-ma ala kpoo,
na báyu bátátɛ-nwu kalɔ aani lɛtabi.
6“Unwoti, ƒula kɔdianu kɔnu
kɔɔtina lɛgadi ɔyikun.
Unwoti, ƒula kɔdianu kɔnu
nákɔ ukisine ɔmmɔ ɔ́bwɛ kpɛtɛ kpɛtɛ.
7Na ƒula lɛgadi bubomo kenye
na éti ébo bani mɔɔta teenye-ɔ lɛlɔ áƒiɛmi kalɔ.
Na ka édie ƒula kɔnyi keyi ni,
ɔ́kyula-ma aani kalɛ na alakpi aakywí.
8Ƒula kɔnyi ɔƒɛƒɛɛ ɔni nálɛ-ɔ enwu kemmo
ɔ́ya na ntu bɔmmɔ bɔ́sala lɛlɔ.
Na ntu bɔni avlɔvɔ mɔɔkɔ́ mmɔ búnye kpakplaa aani awodu.
Na ɛpu ntɛ ntu bɔmmɔ bɔ́kwii bɔ́bla kpakplaa.
9“Ukisine ɔmmɔ ɔ́kun lɛmɛnɛ ɔnini,
‘Ndubɔbi bɔsiaku-ma na ntáka-ma lɛkya.
Na liƒie-ma ala lɛƒɔ na lile-nya
na lɛdi-nya kalɛ biala na mɔɔyɔ́.
Ndubɔkpa mina kewii
liti lɛyila-ma udu.’
10Nsu ka Unwoti ɔ́nya ɔ́nwuna kunwi
pɛ kani na ɛpu ɔmmɔ úti Egyipteƒuɔ bammɔ ƒui.
Na bányi ntu kemmo aani lɛbuala lɛni mbo unu.
11“Unwoti, baƒiɔ bamani nse aani ƒula kalɛ?
Ɔma nse aani awɔ kalɛ?
Ƒula lɛgadi lise kedee,
na liikeye ku liƒu
na aabla ala ebendi ku akɔla ala budie taatina.
12Énene ƒula kɔdianu na kalɔ kébweli-ma ƒui.
13“Adubɔtɔnku ƒula bekyuli ka aayɔ́-ma uwi ndi uwi ɔsu.
Ƒula bekyuli bani na ékpo áƒɔ.
Na ɔkɛnku ƒula ɔyikun lɛlɔ ɔsu adubɔtɔnku-ma
etéduoku ƒula kalɔ kedee kemmo.
14Na kadi bekyuli badubunu na liƒu libendi lɛda-ma.
Na liƒu ku lɛlɔ bɔtɔ bɔdubɔda Ƒilistiƒuɔ
15Na Edomƒuɔ baga badubo bɔyia geen ku liƒu,
na liƒu lɛmmɔ lɛya na lɛlɔ litaatɔ
Moabƒuɔ batɔnkune kpakpaakpa.
Na enu adubɔƒɛ Kanaanƒuɔ geen na bataayila.
16Liƒu ku bɔyia geen ndubo bekyuli bamɛni bɔda.
O, Unwoti, ɔkɛnku ƒula ɔyikun ɔsu ni,
badubo bɔsinsi bunye aani lɛtakpɛ,
úti útédu ka awɔ Unwoti ásia ávi,
na ƒula bekyuli bani na édie adanku bávi bátɔlɔ.
17Na adubɔkpanku-ma ebenyene kenyekɔ kadi.
Kenyekɔ kani ndi ƒula kɔbi lɛlɔ,
kesii kani na ábla na kadi ƒula kakyakɔ,
na ásia mmɔ kɔnu ése kpakplaa.
18Unwoti, awɔ kani ndubɔdi lɛga
úsela uwi ƒui.”
Miriam Údie Kɔgya Úte Unwoti
19Israelƒuɔ bésie bávi ɛpu kalɔ aani kalɔ kakwiidi. Nsu uwi ɔni na Egyipteƒuɔ bapɔnkɔ kɛɛkɛ ku bana bapɔnkɔ ku bana bakane béduo ɛpu ɔmmɔ kemmo ni, Unwoti ɔ́sɔku ntu bɔmmɔ ɔ́sala na búti-ma. 20Amu na Katɔti Kenye Udiene Miriam ɔni ndi Mose ɔnwani ulekubi úti nwuna kabontobi na Israel beleku básiaku-nwu, na ama lɛnɔ bada bana ɔdi na baakunku na baatɔ́. 21Na kɔgya kɔni na Miriam údie ndi,
“Bidie kɔgya bite Unwoti,
ɔsika úkpo ɔ́di lɛlɔ geen.
Bapɔnkɔ ku bana lɛlɔ beliene ƒui
úbo-ma útákya ɛpu kemmo.”
Mara Ku Elim Ketu
22Amu na Mose ɔ́tɔnku Israel bekyuli bammɔ ɔsiku Ɛpugyie kɔtu mmɔ útédu ketele kani baalɔ banii Sur kemmo. Na bésie lɛgba emeyi atɛ sɔɔn na ketele kemmo. Nsu bátasiaku ntu bɔdi. 23Amu na bétédu kesii kani baalɔ banii Mara, nsu ntu bɔni nkya mmɔ bubo ɔdu geen ɔni na bútadia-ma bɔni. Anwuɔsu básia-nwu lɛnyi banii Mara. Na nwuna kalɔ ndi ɔdu. 24Amu na bekyuli básu Mose kalɛ na ntu bɔmmɔ buse. Na béwulo bákya-nwu banii, “Bi ntu bɔdubo bɔni ɔƒɛni?”
25Amu na Mose úwulo ɔ́kpali Unwoti momoomo. Na Unwoti ɔ́tina-nwu ligyiiku lɛdi na úƒwimi ɔ́kya ntu bɔmmɔ kemmo. Na ntu bɔmmɔ bɔ́dia-ma bɔni.
Mmɔ na Unwoti úbo-ma ɔda úti ɔ́kɔku-ma ɔ́nu. 26Ɔnini, “Si biinú ami bina Unwoti Katɔti litemi na bɛɛbla ala ani nse siin na mina anumi na bɛɛdi mina ɔda bubo ƒui lɛlɔ kpakplaa ni, lɛɛɛdubo bɔya na lɛlɛ lidu lidu lɛni na lɛ́ya na líbo Egyipteƒuɔ lɛlɔ ɔdi ubo-mii lɛlɔ kudii. Ɔsika ami ndi bina Unwoti ɔni mɔɔbwi-mii lɛlɛ.”
27Amu na bétédu Elim, kesii kani na abiɔ leevu-anyɔ adi akya na ebo liti ku aavlanyɔ adi énye. Na bábla keliekɔ na abiɔ ammɔ kudɔ.
હાલમાં પસંદ કરેલ:
Israelƒuɔ Bɔlɛ 15: lef
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.