۲قورئنتلی‌لره 11
11
پولوس حوارئلئیئندن دئفاع ادئر
1کاشکی بئر آز عاغیلسیزلیقدا منه دؤزسَیدئنئز: لاکئن دوغرودان دا منه دؤزورسونوز! 2چونکی سئزئن حاقّینیزدا تارینین قیرتی ائله قیرتلی‌یَم. چونکی سئزی تک بئر اَره، مسئحه آداخلی اتدئم کی، سئزی مسئح اوچون پاک بئر باکئره قیز کئمی تقدئم ادئم. 3لاکئن قورخورام کی، نجه ائلان حوّانی اؤز حؤقّه‌بازلیغی ائله آلداتدی، سئزئن ده فئکئرلرئنئز مسئحده اولان صافلیق و پاکلیقدان اوزاق دوشسون. 4چونکی اگر بئری گلئب، بئزئم وعظ اتمه‌دئیئمئز بئر عئسانی وعظ ادئر و یا آلدیغینیز روحدان باشقا بئر روحو آلیرسینیز، و یا قبول اتدئیئنئز ائنجئلدن آیری بئر ائنجئلی قبول ادئرسئنئز، بونا ممنونئیّتله دؤزورسونوز. 5آمّا هچ شیده اؤزومو فایئق حوارئلردن اَسکئک سایمیرام. 6حتّا اگر نئطقده مهارتسئز اولسام دا، معرئفتده اِله دیئلم. آمّا هر حالدا بئز بونو هر شیده سئزه آشکار اتدئک. 7و یا مگر گوناه اتدئم کی، سئزی اوجالتماق اوچون اؤزومو آلچالتدیم؟ چونکی تارینین ائنجئلئنی سئزه موفته وعظ اتدئم؟ 8سئزه خئدمت اتمک اوچون اؤزگه کئلئسالاری سویوب، اونلاردان ماعاش آلدیم. 9و یانینیزدا اولان زامان احتئیاجدا اولاندا دا هچ کسه یوک اولمادیم. چونکی قارداشلار مقدونئیّه‌دن گلدئکده احتئیاجیمی تامامن رفع اتدئلر. و هر شیده اؤزومو ساخلادیم کی، مبادا سئزه بئر یوک اولوم و بله اتمه‌یه ده داوام وره‌جه‌یم. 10مسئحئن منده اولان حقئقتی حاقّی اوچون، اَخایئه بؤلگه‌لرئنده کئمسه منی بو ائفتئخاریمدان محروم اتمیه‌جک. 11نه اوچون؟ سئزی سِومه‌دئیئمه گؤره؟ تاری بئلئر! 12لاکئن اتدئیئمه داوام وره‌جه‌یم کی، فخر اتدئکلری خوصوصدا بئزئمله برابر ساییلماق اوچون فورصت آختارانلارا فورصت ورمه‌یئم. 13چونکی بله آداملار یالانچی حوارئلر، حؤقّه‌باز ائشچئلردئرلر کی، اؤزلرئنی مسئحئن حوارئلرئنه اوخشادیرلار. 14بو دا تعجّوبلو دیئل؛ چونکی شیطان دا اؤزونو بئر نور مله‌یئنه اوخشادیر. 15اونون اوچون ده تعجّوبلو دیئل کی، اونا خئدمت ادنلر اؤزلرئنی صالحلئک خئدمتکارلارینا اوخشاتسینلار کی، اونلارین آخیری عمل‌لرئنه گؤره اولاجاق.
16گئنه دیئرم؛ قوی هچ کس دوشونمه‌سئن کی، من عاغیلسیزام. لاکئن اگر بله‌دئرسه ده، منی آغیلسیز کئمی قبول ادئن کی، من ده بئر آز فخر ادئم. 17بو فخره گؤره ددئکلرئمی ربّئن دئیه‌جه‌یی کئمی یوخ، آغیلسیز بئری کئمی دیئرم. 18ائندی کی، بئر چوخلاری جئسمه گؤره فخر ادئر، من ده فخر اده‌جه‌یم. 19چونکی سئز عاغیلّی اولدوغونوز حالدا، عاغیلسیزلارا شادلیقلا دؤزورسونوز. 20چونکی اگر کئمسه سئزی قول اتسه، مالینیزی یِسه، اؤز منفعتی اوچون سئزدن ائستئفاده اتسه، اؤزونو بؤیوکلندئرسه، اوزونوزه وورسا، اونو دؤزورسونوز. 21بونو خجالتله دمه‌لئیم کی، بئز ضعئف عمل اتمئشئک. آمّا کئمسه نه ائله جسور اولسا - (عاغیلسیز کئمی دانیشیرام) - من اؤزوم ده او قدر جسورام. 22آیا اونلار عئبرانی‌دئرلر؟ من ده عئبرانی‌یَم. ائسرایئل‌لی‌دئرلر؟ من ائسرایئللی‌یَم. ائبراهئم نسلئندندئرلر؟ من ده. 23مسئحئن خئدمتچئلری‌دئرلر؟ (دلی بئر آدام کئمی دانیشیرام)، من اونلاردان داها چوخ؛ داها چوخ زحمت چکمئشم، داها چوخ زئندانلاردا اولموشام، ساییسیز-حسابسیز دؤیولموشم، چوخ واخت دا اؤلوم خطرئنه دوشموشم. 24بش دفه یهودئلردن قیرخدان بئر اَسکئک شالّاق یمئشم. 25اوچ دفه دَیَنَکله وورولموشام، بئر دفه داشا باسیلمیشام، اوچ دفه گمئم سینیب؛ بئر گجه-بئر گوندوز درئن دهنزده کچئرتمئشم. 26چوخ دفه سفرلرده چایلارین خطرلرئنده، اوغرولارین خطرلرئنده، هموطنلرئمئن خطرلرئنده، قیری‌یهودئلرئن خطرلرئنده، شهرئن خطرلرئنده، چؤلون خطرلرئنده، دهنزئن خطرلرئنده، یالانچی قارداشلارین خطرلرئنده، 27زحمت و مشقّتده، چوخ دفه ده یوخوسوز، آجلیق و سوسوزلوقدا، چوخ دفه ده یمکسئز سویوقلوق و لوتلوکده اولموشام. 28اشئکدن اولان بو شیلردن باشقا، هر گون منی ازن، او فئکئردئر کی، بوتون کئلئسالار اوچون چکئرم. 29کئم ضعئف اولور و من ضعئف اولمورام؟ کئم گوناها دوشور و من ائچئمده یانمیرام؟! 30اگر فخر اتمک لازیم گلسه، ضعئفلئیئمی گؤرسه‌دن شیلر‌له فخر اده‌جه‌یم. 31رب عئسانین آتاسی، او ابدی موتبارک تاری بئلئر کی، یالان دمئرم. 32دَمَشقده آرتاس پادشاهین والئسی، دَمَشقلی‌لرئن شهرئنی گودوردو کی، منی یاخالاسین. 33من ده بئر سبد ائچئنده شهرئن دووارینداکی بئر پنجره‌دن اِندئرئلئب، اونون الئندن قاچدیم.
હાલમાં પસંદ કરેલ:
۲قورئنتلی‌لره 11: موقدس کتاب
Highlight
શેર કરો
નકલ કરો
Want to have your highlights saved across all your devices? Sign up or sign in
© Elam Ministries 2013. All rights reserved.