1Kwa 1
1
Ga zgu
1Iʼi Pwal, hgaf Lazglafta manda ya kumaf tsi ŋa nzakway ka mnda ghunay *Yesu *Kristi. Kawadaga ŋni nda zwaŋama mu Sustene, 2ta vindi yu ta na ɗelewer na ŋa mnduha Lazglafta ma luwa Kwareŋt, kaghuni ta nzakway ka ŋa Lazglafta nda zɗakatahuɗa Yesu Kristi, hagaf haga ta kaghuni ŋa nzakwa ghuni ka ŋa ni. Hagaf haga guli ta inda gwal ta nzakway ma sana vliha kavghakavgha ta maga duʼa da Mghama mu Yesu Kristi. Tsatsi ná, Mghama mu ya demdem. 3Ka nza zɗakatahuɗa i Da mu Lazglafta nda Mghama mu Yesu Kristi kawadaga nda kaghuni. Mista ghuni ka zɗakwa taŋ guli.
Vlama vla Lazglafta ta zɗakwa ni nda ma Yesu Kristi
4Ta va rfay yu ta Lazglafta ɗa ta ghəŋa kaghuni ma vəl zɗaŋtani ta huɗi ma guyaghunaftani nda *Yesu *Kristi, Zwaŋa Lazglafta. 5Manda va tsaya nzakwa ni. Ma tsa guyatá vgha ghuni nda tsi ya ná, vlaghuna vla ta inda skwiha. Tsaya kəl kuni ka laviŋtá gwaɗa nda snaŋta mnigiŋtá vərɗa skwiha guli. 6Ma mnaghunata ŋni ta gwaɗa Yesu Kristi ná, ka dihavatá tsa gwaɗa ya ma ŋuɗufa ghuni. 7Tsaya kwal kuni pɗatá inda skwiha ta vlə Lazglafta ŋa mnduha ni, na tsa kaghuni ta kəzla fitika nghəglaŋta mu ta Mghama mu Yesu Kristi ya. 8Lazglafta dzaʼa vla mbraku ŋa ghuni ha ka sagha tsa fitik ya, ŋa kwala lu vzaftá rutsak ta kaghuni baɗu tsa sagha Mghama mu Yesu Kristi ya. 9Tsa Lazglafta ta hagaftá kaghuni ka guyaghunafta nda Yesu Kristi ta nzakway ka Mghama mu ya ná, haɗ ta tsakalawi wa.
Daga vgha ma Igliz ma Kwareŋt
10Zwana ma ɗa! Kdəkwa kdək, ta ndəɓay yu ta dzvu ŋa ghuni nda hga Mghama mu *Yesu *Kristi. Dzra wa dzra ta wi, ma dagə kuni ta vgha ghuni, ka skwa turtuk ka kuni nzaku. 11Kəl yu ka mnay mantsa zwana ma ɗa ná, sliʼaf sliʼa gwal ga Kluwe ka sagha da mnihata kazlay: Ta zlərɗa wi kuni ma vgha ghuni kəʼa. 12Dagavapdaga kuni mataba ghuni. Wya tsa skwi ta mnə kuni ya: « Ŋa Pwal aŋni » ka sanlaha, « ŋa Apwalus aŋni » ka sanlaha, « ŋa Kefas aŋni » ka sanlaha, « ŋa Kristi aŋni, » ka sanlaha guli, na skwi ta mnə kuni. 13Kidaghi gamndər daga ta Kristi na? Pwal ta mtuta ta udza zləŋay ta ghəŋa kaghuni ra? Ari nda hga Pwal a magaghunafta lu ta batem na? 14Ta rfay yu ta Lazglafta ɗa kabga haɗ ya maganaf yu ta batem mataba ghuni, ka nza a tsi ka i Krispus nda Gayus wa. 15Mantsa tama, haɗ ya dzaʼa mnay kazlay: Nda hga Pwal magiɗifta lu ta batem kəʼa wa. 16Aya! Si zanapta ɗa tsa: Maganafmaga yu ta batem ta la ga Stefanas. Ta graftá yu ná, haɗ sana mndu magəglanaf yu ta batem ta ghəŋa tsaha ya wa. 17La ka dzaʼa ka maga batem ŋa mnduha a ka Kristi nda iʼi wu, la ka dzaʼa ka da mna *Lfiɗa Gwaɗa ŋa mnduha, kaʼa nda iʼi. Ka dzaʼa ka klaʼatá ɗifila ghəŋa gha ka mnay a kaʼa nda iʼi guli wa. Ka má si skwi ma ghəŋa ɗa ka yu klaʼata ka mnay katsi ná, má dzaʼa nzakway mtatá Kristi ta udza zləŋay ka skwa bətbət.
Yesu Kristi ná, mbraku nda ɗifila Lazglafta ya
18Aŋ mndani, gwaɗa ta mtatá *Kristi ta udza zləŋay ná, nda nza ka tsaɓaku da gwal ta zaɗaku. Tsaw da amu gwal ta tva mbaku ya, nda sna amu kazlay: Mamu mbrakwa Lazglafta mida kəʼa.
19Wya skwi nda vinda ma deftera Lazglafta:
« Dzaʼa zaɗana zaɗa yu ta ɗifila ghəŋa mnda səla, dzaʼa hərɗiŋ hərɗa yu ta mahizla ghəŋa mnda səla, » kaʼa.
20Ka si mantsa ka Lazglafta mnata ya ní, ga gwaɗa ta ɗifila mnda səla tama? Ga gwaɗa ta gwal ta mnay kazlay: Nda sna aŋni ta zlahu kəʼa tama? Ga gwaɗa ta gwal ta zlərɗutawi ma na ghəŋa haɗik na guli? Haɗ gwaɗa ta həŋ ɗekɗek wa. Niŋ na Lazglafta ta ɗifila mnduha ma na ghəŋa haɗik ná, ka skwi ka bətbət.
21Nda ŋa taŋ ma ɗifil ná, trap tra mnduha ma ghəŋa haɗik ta tsatsaftá skwi maga Lazglafta nda ŋa ni ma ɗifil. Ka klaftá Lazglafta ta tsa gwaɗa ta mnə mu, niŋ hahəŋ ka gwaɗa tsaɓaku ya, ŋa mbanaftá mnduha ta zlghafta. 22Má maraŋna mara lu ta skwi ka mazəmzəm, kada grafta ŋni ka la *Yahuda nda ŋa taŋ. Tsa skwi mnaŋna ɗifila ŋni ya ŋa aŋni ta snay, ka la *Grek nda ŋa taŋ. 23Aŋni, gwaɗa ta zləŋatá *Yesu Kristi ta udza zləŋay ŋa aŋni ta mnay. Ka zaɗiŋtá tsa gwaɗa ya ta la Yahuda. Tsaɓaku tsa gwaɗa ya ka hamata gwal kul nzakway ka la Yahuda guli ta mnay. 24Ka gwal hagaf Lazglafta ŋa nzakway ka ŋa ni, dər má la Yahuda tsi, dər má hamata Grek a tsi ta mnay na: Kristi mbrakwa Lazglafta nda ɗifila Lazglafta ya, ka hahəŋ. 25Tsaw tsa skwi maga Lazglafta ta nghə mnduha manda tsaɓaku ya ná, malaghu mala ta ɗifila mnduha. Ka ka mbegi Lazglafta ká mnduha ta gray ya guli ná, tsa nzakwa ni ka mbegi ta grə mnduha ya guli ná, malaghu mala ta mbrakwa taŋ.
26Zwana ma ɗa ɗaslawa nzakwa ghuni na tsa kaghuni hagaf Lazglafta ya, ka mndəra wati ma mnduha kuni? Sira a gwal nda sna ta skwi mataba ghuni ta nghə mnduha ma ghəŋa haɗik wa. Sira a gwal dagala dagala mataba ghuni wa. Sira a gwal ta za mgham mataba ghuni guli wa. 27Lazglafta ka ghəŋa ni ta zabaftá tsa gwal ta nghə mnduha ma ghəŋa haɗik ka rgha ya, ŋa pghanaghatá hula ta tsa gwal nda ɗifila ghəŋa haɗik ma ghəŋa taŋ ya. Tsatsi ta zabaftá gwal ka mbegi ta nghə mnduha ma ghəŋa haɗik ya ŋa pghanaghatá hula ta gwal nda mbra. 28Tsatsi ta zabaptá gwal ta nghə lu ka mnduha tsa lu, htu hta həŋ katakata ta nghə mnduha ma ghəŋa haɗik ya, ŋa ŋwisaganatá deghreʼ ta gwal dagala dagala. 29Zabap zaba Lazglafta ta mnduha mantsa ya, kada kwala mndu ta ghərɓaku ta kəma ni. 30Lazglafta ta ndiʼaghunaftá nda Yesu Kristi, ka famatá tsi ta Yesu Kristi ka mnda vlamatá ɗifil. Nda ma Yesu namafta Lazglafta ka mndu tɗukwa ta wa ira ni, ka fatá amu ka mnduha ni, ka varagaptá tsi ta amu ma dmaku. 31Tsaya tama, « ka ta kumay mndu ta ghərɓaku katsi, ka ghərɓa tsi ta ghəŋa skwi kɗiŋ Mgham#1:31 Ngha ta Yirməya 9:22-23. ta magata, » manda ya nda vinda ma defteri.
હાલમાં પસંદ કરેલ:
1Kwa 1: xed
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.