Popular Bible Verses from ዶመ 39

શેર કરો

መና ጎዳይ ዮሴፎና ደኤ፤ ሄዋ ድራዉ፥ እ ኦያዋ ኡባ አዉ እንጀዬዳ፤ ያትና ባረ ጎዳ፥ ግብጻዊያ ሶን ደኤዳ።

ሄዋ ድራዉ ባረዉ ደእያ ኡባባ ዮሴፎዉ ሼዳ፤ እ ባረ ምያ ቁማፐ አትና፥ አይነ ቆፐና። ዮሴፎ ጌሳንቻነ ማላ ሎኦ አሳ።

ያትና ቃሾ ጎለ ካፑ ቃሹዋ አሳ ኡባ ዮሴፎ ኩሽያን ዎዳ፤ ሄዋን ኦሰትያዋ ኡባ ኦያዌ አ።

ዮሴፋ አ ጎዳይ አፊደ፥ ካትያ ቃሹዋ ሳአይ ደእያ ቃሾ ጎለን የጌዳ። ሽን ዮሴፎ ያን ቃሾ ጎለን ደእያ ዎደ፥ መና ጎዳይ አናና ደኤ። እ አዉ ቃረቴዳ፤ ቃሾ ጎለ ካፑዋ ስንን አዉ ናሹዋ እሜዳ።

አማሬዳ ዎድያፐ ጉየ፥ አ ጎዳ ማቻታ ዮሴፋ ጼላ በኣደ፥ “ሃያ፤ ታናና ግሳ” ያጋዱ። ሽን እ እጼዳ። ባረ ጎዳ ማቻቶ፥ “በአ፤ ታ ጎዳይ ታዉ ሼደ ባረ ሶን ደእያባዉ አያዉነ ህርገና፤ ባረዉ ደእያዋ ኡባ ታ ኩሽያን ዎዳ። ሀ ሶን ታፐ ግታትያዌ ኦንነ ባዋ። ኔን አ ማቻቶ ግድያ ድራዉ ነ ጻላላፐ አትና፥ ታ ጎዳይ ታዉ እምቤናባይ ባዋ። ያትና ታን ዋታደ ሀዋ ማላ ዳሮ ኢታባ ሀናደ ጾሳ ቦላ ናጋራ ኦ?” ያጌዳ።

እት ጋላስ እ ባረ ኦሱዋ ኦናዉ ሶ ገልያ ዎደ፥ ሶ ቆማቱዋፐ ኦንነ ሶን ባዋ። እዛ ዮሴፎ አፍላ ኦይቃደ፥ “ታናና ግሳ” ያጋዱ። ሽን እ ባረ አፍላ እ ኩሽያን የጊደ፥ ሶፐ ካረ ዎጺደ ከሴዳ።