Popular Bible Verses from ABhaluumi 5

શેર કરો

Leelo ʉNgʉlʉbhɨ ahatilolesiizye huje, atigɨɨne tee hwi‑idala ɨlya humʼfumye ʉKilisiti atifwɨle hu habhaazyo ɨho atɨ tisɨɨle tili bhabhomba mbiibhi.

Ʉlusʉʉbhɨlo ʉlwo saga lubhajiiye hutisʉʉsye, pɨpo timanya huje ʉNgʉlʉbhɨ amemiizye ʉkʉndwa waakwe mu mooyo geetu hwi‑idala ɨlya Mʼpepo ʉMʼfinjile ʉyo atipiiye.

Saga ɨsho lwene, lyoli tiseshela hwope na mu mayɨmba, pɨpo timanya huje amayɨmba gahutileetela ʉjimbiilizu mu lwɨtɨho. Ʉjimbiilizu ʉwo wuhutileetela ʉdandamazu, wope ʉdandamazu wuhutileetela ʉlusʉʉbhɨlo.

Ɨshi, pɨpo ʉNgʉlʉbhɨ atibhaziziizye abhe bhagolosu afumilane na humʼmwɨtɨshe ʉmwene, tili nʉ tengaanu nʉ mwene hwi‑idala ɨlya Mwɨnɨ weetu ʉYeesu ʉKilisiti. Hwi‑idala ɨlya humʼmwɨtɨshe ʉYeesu, ʉNgʉlʉbhɨ atipiiye ɨmpyana, nantele hwope ɨshi ajendeelela hutipeele ɨmpyana. Ɨpo tiseshela tee, pɨpo tisʉʉbhɨla huje tɨnza‑abhe peeka nʉ Ngʉlʉbhɨ mu khalo waakwe ʉmwamu.

Enya, lwa tili bhadedebhazu hwa huje bhɨ mbiibhi, ʉYeesu ʉKilisiti ahɨnzɨle hu habhaazyo ɨho ahasɨbhɨlɨɨye ʉNgʉlʉbhɨ, ahafwa hu nongwa yeetu.

Ɨshi, nkashele tibhaziiwe abhe bhagolosu hwi‑idala ɨlya hwitishe idanda lya Yeesu lwa‑ahafwiye pa shikhobheehanyo, lyoli tahayifyʉlwa afume mwi‑ilyoyo ikhali ɨlya Ngʉlʉbhɨ.

Enya, nanshi ɨsho ʉmuntu weeka ahakhaanile hunʼtinishe ʉNgʉlʉbhɨ, ahabhabhomba abhantu abhinji huje bhabhe bhabhomba ɨmbiibhi, shɨɨsho ʉmuntu weeka ʉyo ahunʼtiniha ʉNgʉlʉbhɨ, ahayihubhabhomba abhantu abhinji bhabhe bhagolosu.

Saga huje ɨsho lwene, leelo nantele ʉNgʉlʉbhɨ atibhombile huje tiseshele tee hu gaala ɨgo atibhombɨɨye, pɨpo hwi‑idala ɨlya Mwɨnɨ weetu ʉYeesu ʉKilisiti atilɨngɨɨnye nʉ Ngʉlʉbhɨ.