Popular Bible Verses from Ütararea̧ Ma̧ȩ 20

શેર કરો

Jabo Jeova judi yo̧rëremȩdejȩ Moiche ju̧i̧iäpȩmo̧, Aro̧ ju̧i̧iäpȩmo̧: —Jabo cjäri̧ manȩrȩ, oëra̧ japea̧nȩrȩ. Cüdë yo̧a̧mi̧ japadëa̧nȩrȩ. Dibëa̧ ju chiarea̧ra̧ pio ju̧ri̧ra̧ japaji̧ri̧mi̧ dari̧ japea̧nȩrȩ. Jabechji̧ mȩnȩro̧ chjadëri̧ yo̧tärea̧ ji̧, “Aja̧, Jeova judi ja̧di dari̧ yürüdidibe ui oa“ yo̧tärea̧ ji̧, judiro̧ pio coaiäpȩmo̧ ba chia jo̧rȩtatärea̧ ji̧, japadëa̧nȩrȩ. Ado mȩnȩro̧ coa tjamo̧ri̧ quëna̧tärea̧ ji peaja̧di tjamo̧ri̧ quëna̧dëa̧renȩro̧coe. Jabechji̧ chjadëri̧ quëna̧tärea̧ ji̧, 'Aja̧, ui oa tjamo̧ri̧ yürüpadida' quëna̧tärea̧ ji̧, tjamo̧ri̧ quëna̧dëa̧renȩro̧coe. Pio ju̧i̧iä jabechji̧, cüdë yo̧ë cji̧därërea̧ chiriräpȩ go̧düdärärea̧ yürütärea̧ ji̧, pio mȩnȩro̧ icharaita pio ji̧ri̧ chiri chjadëräpȩ ëba baätärea̧ ji, cjäri̧ marenȩro̧jȩrȩ, ëba baädëparenȩro̧jȩrȩ. Pio jiro chiriräpȩ go̧düdärärea̧ yürüdëparequededibe.

—Danȩ, mitëvä na̧ tjätjäpë ta̧i̧rea̧ to oa —yo̧a̧dejȩ—. Ado na̧ ayima̧i̧ Aro̧ pio ju̧i̧ nö̧ta, a̧dopa tänȩtä earequededibe icharaita ütëbo oa. Ado ütëborë ta̧dë queri̧räpȩ a̧dopea̧ oa cjiarä, jabechji̧, ta̧dë pio ju̧i̧ to̧bari̧ ni̧bätä earequedemȩ, ui üdë ta̧dë tjori pio judiri go̧dürea̧mi̧ dari̧. Ado ja̧di dari̧ japea̧ oaiä, jabechji̧ icharaita judiro̧ jararea̧ dapadirȩ, jibëa̧ bacabo, jënȩro̧ goa̧ pio judiro̧borë —yo̧a̧dejȩ.

Ado pio ji̧ri̧iäpȩmo̧ ni̧bä ëte, Moiche judi ta̧dë oa ni̧bätärea̧ ji̧, uëräpȩmo̧ are gatëa̧dejȩ jibëa̧ to oa. Ado goae tarari̧ gu̧na̧dejȩ ta̧dë oa. Yo̧a̧ri̧ co oa gu̧na̧dejȩ. Ado ui üdë goae tarari̧ ca̧ea̧de pumȩ judiro̧ chjadëri̧ jararea̧mi̧ dari̧, judiro̧ goa̧ üdë chjadëri̧ i̧ararea̧mi̧ dari̧.

Ado ja̧dëa ji̧ Moiche judi, Aro̧ pio judiborë a̧dopa tänȩrëreji̧ri̧diro̧jȩrȩ pumȩ ji̧ri̧ ta̧dë queri̧räpȩ ju̧ri̧. Ado ja̧di dari̧ japa ëte, ja̧di ta̧rëri̧ yo̧mȩrȩ yo̧rëremȩdejȩrȩ Moiche judi, ërecjia tjamo̧mȩrȩ: —Ta̧rëchji̧vä mȩnȩro̧. Ta̧ra̧ puë chiadëti̧nȩrȩ. Jeova pio ju̧i̧ ji̧dë ma dëbëpe chjaomi̧ dari̧ jape chjaonȩrȩ. Ado yaba̧ ¿yö̧ta dari̧ japatä earenȩro̧ibe? Mȩnȩro̧ jarapea̧ oa, ibëa̧ ma̧na̧ri̧ japea̧ oaiä pio yoa ta̧dëri pio judiri ui oa ¿go̧dü tänȩtä earenȩro̧ibe? —yo̧mȩrȩ yo̧rëremȩdejȩrȩ Moiche judi, ërecjia tjamo̧mȩrȩ.