Markus 13 માંથી લોકપ્રિય બાઇબલ વચનો

શેર કરો

Nen, akoni taʼbokogonat nen an nendaga yiluk, Kit, at agoromi, yiluk kinebe inaʼit mondok kiyagun o. Mende, ta nen endainggen sebekogo obakanini kambuk yiluk dogogin kalok, o ilugun kurli paga Allah nen ndiligin o,” yiluk yogisasike.

Ngginem kagat lasigin kit kinonggodegat eti paga, kinobabut kwalogo suwam panorogo dogoni o.

Kit kininggi kerle warogo wene inoba ʼbigik, nggokik, kagarigogoma wokisek lagonem kit nen, An nen wene onggo ninggit diluk yigin, yiluk kinendainggen pikup o. Wene onggo kit nen kinakla nggagalogo yugun ʼbuk. Allah Agurengge nen, Yigit diluk yini o, yiluk etinem yokisagin mendeat yogisano o.

Mbogot inom, agat inom, eti dek asigin mende, an nane eti dek asigin mondok dek o,” yiluk yogisasike.

At Yesus nen esigit diluk yogisasikesik wene omanggi men yogisasike, “Kagat lasigin eti o etinem, jam eti paga kagat lasigin yiluk, nit taʼbokogonat ninonggodegat. It malaikat Allah nen yonggo wusa ʼbiya wirigogo mende yomenogo inonggodegat. Nen, an nebe at Allah aʼburat mende, nonggodegat o. An nombae arligat ilu o.

Esigit diluk kagat lago nggorlek, wim nggagal diluk korogat akonem inane kinasuk kolkik, walegat akonem inabok kolkik, kagakonem, kinendainggen aborlok yugup o. Esigit diluk kagat lasigin mende, o ilugun kurli paga kagat lasigin mende eti awanat o.

Eti kak, kit kinilenggen panorogo dogoni o, yiluk yokisigi eti kinewe Endaganggok ago indewerek mende etnogo suguluk wisigin eti ngginem wisigin. O keyamnggengge wisigin a? Kibanggo enggendurlem wisigin a? Sewe ane yisi nggorlek wisigin a? O wigik wisigin a. Kit kinonggodek. O etinem wisigin kinonggodek eti paga, akerak noge yisi nggorlek ʼbikiya wisunogo nen, kinobabut kwalogo dogoni o, yiluk kit yokisigi yi akoni inebe taʼbokogonat kinomat yokisigi o,” yiluk yogisasike.

Yi akoni ndi akoni inunggulowak endaga dombok wim nggagalkik, ap inendaganggok inagoromi inapma mende dombok wim nggagalkik, kagasugun. Wim nggagalkonem, yi ai ndi ai yugul luk-lagakigik, kimbiri no agik, kagat lasigin mende, eti kumi ineyagi endaginabuwogoluk kenet warigogi eti kak, alebagik kugun o.

Mende, wene pano wene yi, yi ap ndi ap inunggulowak endaga dombok yogisilik lago kalok, ilugun kurli paga arat kagat lasigin o.

Akoni inebe dogalegat nen inendaga an nendaga mende salogo nen men yilik wisugun, At wisigin yisuka etnogo an nebe wagi yiat o, yiluk inane eberogonat salek akoni dogalegat nukerinabi wisugun.

Esigit diluk kasi dogolik, kit, kinobabut kwalogo dogono o. Akoni amberek nen, kininggi kerle warogo ap nggokndek nen kinendema waganuwagaluk inoba wokisek lagik, o akoni Yahudi mende sembayan yiligogoma nen ndugi kinakik, kagasugun o. Esigit diluk kagako dogolik, It yi Yesus agoromi, yiluk, it ap pemerintah nggokndek inom, inendaganggok inom, nen wene kinoba ʼbuwagaluk inelokoma mendinagumo, pano eti pagaat, an kagakonem kinilenggen niyaligogi mende ʼbukakogo yogisagun.

It akoni amberek inenggalat yisi dogolik, Kristus etnogo nebe anat o, yigik, nen, it amberek nen, Allah wene yokisaligogo mende anat o, yigik, yi wisugun o. Witluk nen, Akoni Allah nen miginakike mende yomenogo nuket diyausak a? Dek a, yiluk nuket diyawogoluk, inane eberogonat ambawagaluk kagasusak dek mende elalin mende kagarik wisugun o.

At Yesus nen esigit diluk yogisasikesik omanggi men yogisasike, “Weyak nggok kugun eti kalok oba nen yabunggane o mulinggi amum agik, sut amum agik, kusagal mbogot oba nen nggilelogo wusa wagik, it mbogot oba inobatneyak dogoligogi mende eti Allah nen inaborlogot diyigik, kagasigin o.