Popular Bible Verses from Khuurakikha 32

શેર કરો

Lwanyuma umusaani waamulomela ari, “Lisiina lyoowo singene libe luundi bari Yakobo ta. Khukhwaama shaleelo, lisiina lyoowo kane bakhulaangatsake bari Isiraeli, lwekhuuba iwe waarekanile ni Wele atweela ni babaandu, ate waafuurire.”

Lwanyuma kila umusaani alomela Yakobo ari, “Indekhuule intsye, bona antsye bulikho bubuluukha.” Yakobo naye waamwiilamwo ari, “Sinakhulekhuula utsye ta, khuurusakho nga waamalile khukhuunoombela ise tsikhabi.”

Aryo nga Yakobo waaramile shaanjelekha yenyene, yabawo umusaani uweetsa, waarekana ni naye khuumala shiilo shoosi, khukhwoolesa antsye ni bwabuluukha.

Lweesho Yakobo waatwiikha shiifwo lisiina ari Peniyeli, nga aloma ari, “Ise naabonaane ni Wele mu moni khu moni, ate naarama nga ishiili mulamu.”

Umusaani uyo n'abona ari s'ali khuunyala khuuwula Yakobo ta, waamukhoonola likuumba lyasiiso, khukhwiikha khu liraango, lyaarura mu shifwo shalyo.

Kila umusaani tsana uyo amureeba ari, “Ne iwe lisiina lyoowo bari naanu?” Naye weelamwo ari, “Ise bari Yakobo.”

Kila Yakobo naye areeba umusaani uyo ari, “Nawe imboolele, naakhwikoontseleele, lisiina lyoowo bari naanu?” Umusaani naye waamukobolamo ari, “Lwashiina undeeba ise lisiina lyase?” Abweenewo awo, umusaani waasibula Yakobo, wenyukhawo waatsya.

Iseese sinakhila khuufuna shiisa shoowo ni bubwiyikinwa bwoowo ta, byeesi ubeele untsokesanisa ise umwakaanisi woowo ta. Ise nga ni naama ingo weefwe, naaba nga siindikho na shiindu shoosi ta, khuurusakho imiimbo isi naaba nitiila, nga ni naambukha luluutsi luno Yorudaani. Ne ari bona nakobola nga ndi ni bibiindu bino byoosi byeesi naawukhanisilemo kimiluundi kibili.

Shisheene isho shishikila babaandu ba Isiraeli, sibalya kimikotyo kye khu likuumba lyasiiso ta, lwekhuuba bashebulila bari lyasiiso lya Yakobo lyakhoonokha.

Lwanyuma kila Yakobo aloomba ari, “O Wele wa kuuka wase Iburayimu, luundi Wele wa paapa wase Isaaka! Iwe Umukasya niye uwaanomela ise uri niileyo mu shibala she weefwe, ni isi baalebe baase. Iwe waasuubisa ise uri, kane unjeetatsake bibiindu bintsiile buulayi!

Ari ikhuloomba ndi umbonese ise khukhwaama isi waandaayase Esawu. Lwekhuuba ise naariire ndi nga khwakaanaane ni naye khu ntsila, anyala waantsira ise, atweela ni baakyelama baase ni babaana beene.