Popular Bible Verses from She Lukyeendo 6

શેર કરો

Ni nashiryo, lomela ba Isiraeli uri, “Ise ndi niye Umukasya, kane imbaruse mu khutaambisibwa khweesi balimo mu Misiri, imbaruse mu bukulwa bwaabwe. Kane nookesanise kamaani kamakali mu khubawonesa nga imba ba Misiri shitaambiso.

Kane inywe mube babaandu baase, ni nase kane imbe niye Wele weenywe. Awo nio munyalise khuushimanya muri ise Umukasya Wele weenywe, niye ubarusile mu khutaambisibwa khwe ba Misiri.

Kane imbayile inywe, imbawe shibala sheesi ise namala khaale khukhwitsuba ndi ikhaashiwe Iburayimu, Isaaka, ni Yakobo. Kane ise ishibawe shibe shisheenywe. Ise ndi niye Umukasya.” Musa waatsya waaboolela ba Isiraeli bibiindu bino byeesi Wele aamuboolela, ne baalekha khufukiilisa byeesi aloma ta, khulwekhuuba abe baweelemo khaale kamaani naluundi abe balikho babirisibwa buubi naabi.

Ne Umukasya waalomela Musa ari, “Ari kane ubone sheesi ise inakhola khu Faraawo. Khulwe bunyala bwase, kane Faraawo alekhuule babaandu baase batsye, khaba kane oole ni khuubatimisa busa khuurura mu shibala sheewe.”