Popular Bible Verses from El Apocalipsis 14

શેર કરો

Tʉnmarau tu'c jeme cotspay tsajpni'c, mit tʉs̈najau: —Ja'y yename: “Jinap pa jʉpm tsʉ̱ngáj oy jeme o'jcapay ni'c icupʉjcap el Señor.” Inʉmp Espíritu Santu: “Iyacs̈ta'cway ayé. Je'jat po'cs̈cáj ni'c yos̈watcaway, mit ipʉctsougáj ipremiujat ni'c iwatcau oy.”

Jemni'c Dios ijayajwat ma nimajmoygʉjʉ mit calma, ni'c je'jat ijayaumaygap lo que je' imanda̱tpay, mit icupʉjcap Jesús.

Mit cots mʉgʉc ayé ángel, inʉm: —Pʉ̱́tca Dios mit oyninʉ́mga ni'c coyway hora pa ijuzga̱twa'n. Adorá̱tca ayé jeme iwatway tsajp mit na̱s̈, lama̱t mit jeme i-acmu'tpay nʉ'jat.

Mit imutu̱gupay ángel inatspoguigʉs̈ inimechquij, mit je' cots mʉgʉc, inʉm: —Te tu'c jayau i-adora̱tp ayé aníma̱t mit itiyu̱s̈, mit te niyajcʉp iguimarca̱táj iwimpacni'c o icʉ'ni'c, Dios imu-awa'niyáj ayé jayau mit icastiga̱táj pa siempre. Mit ayé jayau itunas̈áj mit jʉjn mit azufre mam igui-e'pca Dios i-ángejlat mit mam igui-e'p ayé borreguwáy Jesucristu. Mit nu'pʉjʉn ayé maljayajwat itunas̈cáj pa siempre mit jʉjn, mit ayé wi's̈ic cacʉs̈áj pa nu'pʉjʉn tiempu. Itunas̈cáj we'n ni'c ipʉctsougajau inʉ'jy ayé aníma̱t, mit capo'cs̈cáj tsu'm ne s̈ʉ̱m ni'c i-adora̱tcap ayé aníma̱t mit itiyu̱s̈.

Mit cʉs̈ tʉn-is̈ ni'c ayé borreguwáy Jesucristu tenap en ayé copac Sion, mit jemey itsʉ̱́nga ciento cuarenta y cuatro mil jayajwat. Je'jat imuyo'ygajap Jesucristu inʉ'jy, mit imuyo'ygajapey ite̱t Dios inʉ'jy, mit ayé imuyo'ygap ja'yic iwimpacni'jcat.

Tʉn-is̈ ni'c que̱cp es̈pu̱t tsajp jatu'c ángel. Je' imuyo'y ayé oyway noticia jeme cacʉs̈pay, mit ayé oyway noticia inʉmgʉs̈áj nu'pʉjʉn jayajwat tsʉ̱ngapay na̱s̈ni'c, nu'pʉjʉn na̱s̈at, nu'pʉjʉn grupu de jayajwat, nu'pʉjʉn cotscapay jatu'c ajwat mit nu'pʉjʉn nʉ'jcopajcat.

Mit iguinatspoguiu jatu'c ángel, mit inʉmey: —Dios i-actogoyda̱cway ayé mʉjway nʉ'jcopac Babilonia, ni'c ayé jayajwat i-actuwatcau mal nu'pʉjʉn jayajwat mit ni-agayujcʉjʉu iguiwatcawa'n más mal, mit jemni'c tsʉ̱ngáj castiga̱tic.