Popular Bible Verses from KINAWANSAYAN 27

શેર કરો

Maha' daa om onuan ko do Kinorohingan do bolobou do mantad hilo'd tawan do popoluhub do tana' nu! Om maha' daa om onuan ko dau dot ogumu' o gandum om anggur! Maha' daa om osiliu do turipon nu o piro-piro o bansa', om maha' daa om minsiriba' ngai' o payat do bansa' dot id diya'. Maha' daa om iya' o momorinta' do koinsanai di koobpinayan nu, om maha' daa om motud ngai' dot id diya' i sinakagon di tina' nu. Ousung po o koinsanai'd tulun di momopol diya'; nga' maha' daa om abarakatan o koinsanai'd tulun di mamarakat diya',” ka dau.

Om boros ka di Isau, “Koinduwo nondo'dti do monipu' iyau doho'. A' no minsala' do pinungaranan iyau dot i Yakub. Tu' onuo' po dau i gontok ku di don tanak do kotuahan, om baino' noddi om onuo' po dau i barakat di doho' daa. Aiso' no kopio o barakat nu'd suwai do patahakon nu doho', oi Apa'?” ka dau.

Om boros ka di Isak dot id dau, “Aiso' no o diya' do bolobou di mantad hilo'd tawan, om aiso' no o diya'd tumo dit oluhub. Ino pondo gayang nu o koposi-posion nu, nga' turipon ko i' ma kasai' di tobpinai nu. Nga' soira' nopondo do sumaap ko, om koidu' ko nondo do mantad id kuasa' dau,” ka dau.

Om a' nopo tumingkod i Isau do mokianu di tapa' dau do barakat, boros ka dau, “Iri-iri no kopio o barakat nu, oi Apa'? Barakatai oku iyoho', oi Apa'!” ka dau. Om ihad no kawagu iyau.