1 Pedro 1 માંથી લોકપ્રિય બાઇબલ વચનો

Chrokjuikosáyeheni Díos, Itꞌé Ìnchéni Jesucristo, kixin kui̱konoéhe̱ chꞌan ti jeheni kixin tsꞌónani chojni ni̱xin kixin xechón Ìnchéni. Mé xi̱kaha tjejóchóheni kixin tsokjan chꞌan, la ko tsꞌáyéhe̱ni ti nkehe jína tsjajon Díos, chónta chꞌan nkaya nka̱jní, mé tíha la ijnko nkehe xitjahya tsꞌitjáña, xitjahya tso̱kji̱ta̱ la ko xitjahya tsoxámá.

Méxra̱ imá chrókócháhara, kjónté ichrén nkehe náxrjónhña chrókꞌuatsínkara ijie. Ti tinkachónkira Ìnchéni la éxi ti oro ticháxi̱n tsꞌatsínkaxín xrohi kixin tso̱noxín á chaxín oro jína. Kjánchó a̱ntsí sínkí ti tinkachónkira Ìnchéni ke ti oro, Méxra̱ ticháxi̱n tsꞌatsínkaxínra ichrén nkehe náxrjónhña kixin tsondáchro Díos kixin jína kjuachara, ndá tsꞌayéhéra kjuachaxin la ko kjuasàya ti ña̱o itsi Ìnchéni Jesucristo.

Ícha jína, tjóá chrókꞌuejora kixin ti Díos kꞌuéya̱hára, la tjóá chꞌan. *Kixin ndáchro xroon itén Díos: “Jahara chrókꞌuejora tjóá kixin janhan la ijnko nkexro tjóá.”

Éxi ti ixjan titekaon, mé xi̱kaha chrókuitekáonra Díos. Chrokjuénka̱yáxinhñara ti nkehe nduáhya éxi kꞌuékjenka̱yáxinra ósé ti na̱xa̱ kꞌuéchonhñara Díos.

Méxra̱ chrókjuénka̱yáxinra jína chrókjui̱chꞌera ixra̱ la ko chrókꞌuejora nkojína. Kaín a̱sánra chrókꞌuejochohénra ti kjuachón sintaki̱to̱nhanra Díos ti ó tsokjan Ìnchéni Jesucristo.

*Kixin xroon itén Díos ndáchro: Kaín chojni la éxi ti kayoa, ti kjuachaxin chónta sin la éxi ti itsjo tꞌóna ti kayoa. Ti ika la tsoxámá a̱ndá ti itsjo la tsꞌánótjen, kjánchó ti itén Ìnchéni la tsjakꞌe nkochríxín. Ti itan í, mé ti itan tsaáxini tjejotihínra ijie.