If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

ዮሴፎ ገሊደ ግብጼ ካትያዉ ሀዋዳን ያጊደ ኦዴዳ፤ “ታ አዉነ ታ እሻቱ፥ ባረንቱ ዶርሳ ዉድያና፥ ባረንቱ ምያ ዉድያናነ ባረንቶ ደእያዋ ኡባና ካናነ ቢታፐ ዪደ፥ ሀእ ገሴመ ቢታን ደእኖ” ያጌዳ። እ ባረ እሻቱዋፐ እቼሻቱዋ ዶሪደ ካትያ ስን አዳ።
ካቲ ሄ እሻቱዋ፥ “ህንተንቱ ኪታይ አዬ?” ያጊደ ኦቼዳ።
ኡንቱንቱ ካትያዉ፥ “ኑን ነ ቆማቱ ኑ አዎቱዋዳንካ ዶርሳ ዉድያ ሄሜቶ” ያጊደ ዛሬድኖ። ቃይ ኡንቱንቱ አዉ፥ “ካናነ ቢታን ኮሻይ ጺጽ ደእያ ድራዉነ ነ ቆማቱዋ መህያዉ ምያባይ አይነ ባይና ድራዉ፥ ኑን ሀዋን አማሬዳ ዎድያ ደአናዉ ዬዶ፤ ሀያና ኑና ነ ቆማቱዋ ገሴመን ዎርኪ!” ያጌድኖ።
ካቲ ዮሴፎ፥ “ነ አዉነ ነ እሻቱ ኔኮ ዬድኖ። ስም ግብጼ ቢታይ ነ ኩሽያን ደኤ፤ ሀ ጋድያን ኡባ ሳፐ አደ ሎኢያሳን ነ አዉዋነ ነ እሻቱዋ ዎ፤ ኡንቱንቱ ገሴመ ቢታን ደኢኖ። ኔን ኤርና፥ ኡንቱንቱ ግዶፐ ዱማ ኤራተይ ደእያዋንቱ ደኦፐ፥ ሄዋንታ ታ መህያ ቦላ ሱን” ያጌዳ።
ሄዋፐ ጉየ፥ ዮሴፎ ባረ አዉዋ ያቆባ ገልሲደ፥ ካትያ ስን አዳ። ያቆብ ግብጼ ካትያ አንጄዳዋፐ ጉየ፥ ካቲ ያቆባ፥ “ነዉ ዎይሳ ላይ?” ያጊደ ኦቼዳ።
ያቆብ ካትያ፥ “ታን ዩያደ ደኤዳ ላይይ ጼታነ ሀታማ፤ ታ ላይይ በን ታ አዎቱ ዩዪደ ደኤዳ ላይቱዋፐ ጉነ መቱ ዳሬዳዋ” ያጌዳ። ሄዋፐ ጉየ፥ ያቆብ ካትያ አንጂደ፥ አ ስንፐ ካረ ከሴዳ።
ዮሴፎ ባረ አዉዋነ ባረ እሻቱዋ ግብጼ ቢታን ዎዳ፤ ካቲ አዛዜዳዋዳን ግብጼ ቢታን ራምሳ ግያ ካታማ ማታን ደእያ፥ ኡባ ሳፐ አደ ሎእያ ጋድያ ኡንቱንቶ እሜዳ። ዮሴፎ ቃይ ባረ አዎ፥ ባረ እሻቶነ ባረ አዉዋ ሶ አሳ ኡባዉ ኡንቱንቱ ናና ፓይዱዋዳን ካ እሜዳ።

ግዶፐነ ኮሻይ ጺጽ ደእያ ድራዉ፥ ሄ ቢታ ኡባን ካ ባዋ። ሄ ኮሻን ግብጼነ ካናነ ቢታይ ላአቱካ ቆሄቴድኖ። ዮሴፎ ግብጼ ካ ዛልኢደ፥ ግብጼነ ካናነ ቢታቱዋን ደእያ ሚሻ ኡባ ሺሼዳ፤ ግብጼ ካትያ ጎለ ገልሴዳ። ግብጼነ ካናነ ሻሉ ዉሬዳ ዎደ፥ ግብጼ አሳይ ኡባይ ዮሴፎኮ ዪደ አ፥ “ኑዉ ካ እማ፤ ኑ ሻሉ ዉሬዳ ድራዉ፥ ኑን ነ ስንን አያዉ ሀይቄቶ?” ያጌድኖ።
ዮሴፎ ኡንቱንታ፥ “ያቶፐ ህንተንቱ መህያ አክ ዪተ፤ ህንተንቱ ሻሉ ዉር ክቼዳዋ ግዶፐ፥ ታን ካ ህንተንቱ መህያና ላማና” ያጌዳ። ሄዋ ድራዉ ኡንቱንቱ ባረንቱ መህያ ዮሴፎዉ አሄድኖ። ዮሴፎ ኡንቱንቱ ፓራ፥ ዶርሳ፥ ዴሻ፥ ምያነ ሀርያ ካና ላሜዳ፤ እ ሄ ላይ ኡንቱንቱ መህያ ኡባና ካ ላሚደ ኡንቱንታ ምዝ ሻቼዳ።
ሄ ላይይ ዉርና፥ ኡንቱንቱ ላኤን ላይን አኮ ዪደ አ፥ “ኑን ኑ ጎዳፐ ቆስያባይ ባዋ፤ ኑ ሚሻ ኡባይ ዉር ድግና፥ ኑ መህያካ ነዉ ሼደ፥ ኑ ቦላፐነ ኑ ጋድያፐ አትን፥ ኑ ጎዳዉ አቴዳባይ ሀራባይ ባዋ። ኑን ነ ስንን አያዉ ሀይቄቶ? ኑ ጋዲካ አያዉ ዪ? ኑናካ ኑ ጋድያካ ካን ሻማ፤ ኑን ካትያዉ አይለታና፤ ኑ ጋዲካ አዋ ግዶ፤ ኑን ፓጻ አታና ማላ፥ ሀይቀና ማላነ ኑ ጋዲካ ኦጸና ማላ፥ ዘረ ኑዉ እማ” ያጌድኖ።
ዮሴፎ ግብጼ ቢታ ኡባ ካትያዉ ሻሜዳ። ግብጼቱ ኡባይ ኮሻይ ጺጽ ደእያ ድራዉ፥ ባረንቱ ጋድያ ዛልኤድኖ፤ ጋዲ ካትያዋ ግዴዳ። ዮሴፎ አሳ ኡባ ግብጼዉ ሀ ጋጻፐ ዶሚደ ህን ጋጻ ጋካናዉ ካትያዉ አይለ ከሴዳ። ግዶፐነ እ ቄሳቱ ዋ ጋድያ ሻምቤና፤ አያዉ ጎፐ፥ ካቲ ቄሳቶ ካ እሜዳ። ሄዋ ድራዉ ባረንቱ ጋድያ ዛልእበይክኖ።
ዮሴፎ አሳ፥ “ስም ሀቼ ታን ህንተናነ ህንተንቱ ጋድያ ካትያዉ ሻማድ። ዘረ አፊደ፥ ጋደን ዘርተ። ሽን ካ ጫክ ገልስያ ዎደ፥ አይፌዳዋፐ እቼሹ ኩሽያፐ እት ኩሽያ ካትያዉ እምተ። እቼሹ ኩሽያፐ አቴዳ ኦይዱ ኩሺ ህንተንቱ ጋድያ ዘረነ ህንተንቶ፥ ህንተንቱ ሶ አሳዉነ ህንተንቱ ናናዉ ቁማ ግዶ” ያጌዳ።
ኡንቱንቱ፥ “ኔን ኑና አሻዳ! ኑ ጎዳ ስንን ኑን ሳባ ደሜሮኮሻ፤ ኑን ካትያዉ አይለታና” ያጌድኖ። ሄዋ ድራዉ፥ ዮሴፎ ግብጼን ቢታፐ አይፌዳዋፐ እቼሹ ኩሽያፐ እቱዋ ካትያዉ እምያዋ ህግያ ከሴዳ። ሄ ህጊ ሀቼ ጋካናዉ ኤቂደ ደኤ። ካትያዋ ግድቤና ጋዲ ቄሳቱዋ ጋድያ ጻላላ።
እስራኤለቱ ግብጼ ቢታን ገሴመ ግያ ሳን ኡቴድኖ፤ ኡንቱንቱ ያን ማጹዋ ደሜድኖ፤ ኡንቱንቱ የለቴድኖነ ዳሮ ጮራቴድኖ።
ያቆብ ግብጼ ቢታን ታማነ ላፑን ላይ ደኤዳ። ያቆብ ደኤዳ ላይይ ጼታነ ኦይታማነ ላፑና። እስራኤለ ሀይቂያ ዎዲ ማታትና፥ ባረ ናኣ ዮሴፋ ጼስሲደ ሀዋዳን ያጌዳ፤ “ታን ነ ስንን ሳበቴዳዋ ግዶፐ፥ ነ ኩሽያ ታ ጉልባታን ዎደ፥ አነ ገፓ። ሽን ታን ታ ማይዛን ጋከትያ ዎደ፥ ታና ግብጼፐ አፋደ፥ ኡንቱንቱ ሞገቴዳ ሳኣን ሞጋ” ያጌዳ።
ዮሴፎ፥ “ታን ኔና ኔን ጌዳዋዳን ኦና” ያጌዳ።
ያቆብ አ፥ “አነ ታዉ ጫቃ” ያጌዳ። ዮሴፎ አዉ ጫቄዳ፤ ሄዋፐ ጉየ፥ እስራኤሊ ባረ ሂጻን ጉፋኒደ፥ ጾሳዉ ጎይኔዳ።

સાંભળો ዶመ 47