© Wycliffe Bible Translators, Inc. All rights reserved.
℗ 2012 Hosanna

Jola Kasa - 2008 Edition (NT)

Nan hunakahu hata kagaanaku kaaneyimuu Fantokot húliiŋumuu, bukanabuku káyinenumuu li Yéesu li kuwoog foofiil feh tin tano. Li kulako to, kál̥iil li kuyaan kúfulumul li emitayi. Kál̥iilaku unku kunokoonokoo loon kál̥iil kata búlus báamak bátekulo. Li kubil kumeeŋen eluufayi dán káyinenumuu li Yéesu kubahumuu. Muñeˈe kalakomuu li eluufayi li kujuk wah wanokoole loon kúlelluf kata sambun. Kúlellufaku unku li kugaboo, hanoohan li hujow hulo li an li bukanabuku kalakomuu li eluufayi. Nan kúlellufaku unku kata sambunasu kubilumuu kulo li buko, foofiil feh li kuyab Buyinumabu Banabaabu. Muñeˈe li kulob silob sakee, anoowan loon Buyinumabu Banabaabu bukaanimuu min ulob.
Muñeˈe li baj Yeelusalem Kusuwif kánayine kata káyinen. Kánayinaabuku umbuku li sísukasu feh sata adunaayi kúfulumulo. Nan kujamumuu kál̥iilaku unku, búsukabu li buwoog. Muñeˈe li kusego ŋáa’, mata anoowan li buko lajanjam bukanabuku káyinenumuu li kulob li elobayi yoola. Nan búsukabu busegomuu ŋáa’ loon muñowu, bukanabuku li kunaak kugel̥l̥en koon:
— Kama kánayinaabuku umbuku kalobemuu, inti kele buko feh bukan kata Gálile? Buu nokoole anoowan li alolaal li ajamiil li kulob li elobayi yoola, yan abukimuu li yo? Baje li alolaal bukan káfulumulo li etaamayi yata Faat, yata Medi li yata Elaam, yata Mesofotami, yata Súde li yata Kafados, yata Font li yata Aasi. Baje káfulumulo foof li etaamayi yata Filiisi li yata Fanfili, yata Ejíf li yata halaabahu hata Libi yakoojumuu Siilen. Babbaj foof kúfulumulomuu Lom. Babbaj to bukanabuku kafimmuu min kóomi Kusuwif, li bukanabuku kaŋa’muu bútinabu bata Kusuwifaku. Li baj bukan káfulumulo li etaamayi yata Kilet li yata Aalabi. Bale alolaal foofolaal feh lujamaaliijam li kulob, anoowan li elobayi yoola mata wahawu wáamakawu wan Ateemit akaanumuu.
Búsukabu feh li busego ŋáa’, ban buhaasut min boote buyinoo to. Muñeˈe bukanabuku li kunaak kugel̥l̥enoo koon:
— Kama file wahawu unwu waa ufañe ulob?
Bale kukee li kunaak kujakakaay káyinenumuu li Yéesu min koon:
— Umbuku manooman kúkalikali ŋáa’.

Muñeˈe Fiyeel li ayito akila li Kufootalaku kaabuku kuŋen li ano min alob butiya aan:
— Bukuluul jammuu kutuyom Kusuwif, li bukanabuku feh kakinumuu Yeelusalem, joote jihaas wahawu unwe, ban li jijanten jak kulimaku kan emmuu li ilobuul. Jakum jiyinoo li joon bukanabuku umbuku kúkalikali, mata alolaal ummuwaal li ewaatuwayi yatoken li ebaalikenayi yata li bújom. Bale muñeˈe kulimaku kan afulofetawu Soweel alobumuu, kubaje. Soweel lansaan:
«Ateemit laane wahawu unwe wommuu li ubaj
li kunakaku kúbanumaku:
fan iŋa’ li Buyinumabu búmbaam
ikaan li bukanabuku feh.
Fan ílobum li kuñooluul káyine,
li kuñooluul kaale.
Injé Ateemit fan íhiis
mal̥egenamu múmbaam
kuñooluul kátit.
Ban siñaakanasu sooluul,
fan síhaasum mal̥egenamu
múmbaam li sísaahut.
Li kunakaku unku,
fan iŋa’ li Buyinumabu búmbaam,
isen kulokaabuku kúmbaam káyinaaku li kaalaaku.
Fan ílobum li buko.
Fan ikaan bukanabuku kujuk búhiisenum haatiya emitayi,
li bújaahalenum baabe li etaamayi:
fan baj húsim, li sambun li ufaal wata hakoo.
Banakabu fan búlim.
Hul̥eeñahu fan hújunk loon húsim,
tówum hunakahu hata Amaaŋenawu húliiŋ.
Hunakahu unhu hata Amaaŋenawu,
hunak háamak, hunak háyiineniye.
Muñeˈe anoowan ammuu ahooñ kajawaku kata Amaaŋenawu,
fan afak.»
Fiyeel li alaañen aaniil:
— Kutuyom kata Isilayeel, jijanten kulimaku unke kan emmuu li ilobuul. Ateemit láhiisuuhiis ayi ammuu Yéesu akinumuu Nasalet. Mata Ateemit li Yéesu lákaanume bújaahalenumabu, li búhiisenum hákiluul. Ban bukuluul humumuul jihaas yo. Anáyinaawu ummu ammuu Yéesu, Ateemit lakatookat li kuŋenuul loon anong momuu. Ateemit lafinfin min ahaase ákibben, waa jommuu li jikaan Yéesu. Jiŋalooŋa’ jisen bukan kákaanumut li Ateemit balewool, kumuk li ekuluwa dán kubaaŋoolumuu. Bale Ateemit li ayitenumulool li eketayi, min afakenool li sílaam sata eket. Mata li mal̥egenamu eketayi ebajut sembe sanoosan li Yéesu. Li mal̥egenamu Dayit lalollob mata Yéesu aan:
«Ikatut kajuk Amaaŋenawu hákilom.
Mata ummu téetiwom, jakum bil iteelen.
Wahawu unwu újimuu ésuumahukow li yoono li buyinumom.
Ban kulim kata ésuumansuum li kúfulumul li butumom.
Ban muñeˈe, maayeet eniilayi yúmbaam yammuu li eket,
fan eyool̥o li kákangum ló.
Let ukat yaalom bándoo bata kaketumuu.
Ban let ukatom, ínje jammuu ooli, min ifut li huyaak.
Lúhiisonhiis útinawu wata buloŋabu.
Fan ukaanom ibaj ésuumansuum yáamak hákili.»
Fiyeel li afamen aaniil:
— Kutuyom, lifañe min ilobuul ihant mata atuubawolaal ahaan Dayit. Dayit lakeeket min ahoki. Huyaakahu hoola hunhu taate li alolaal boot yok síyaat. Bale Dayit lakankaan afulofet. Lahahhaas kaanaku Ateemit lanunnuu aanool:
«Fan asen jáyiiyaju jammuu joola akee li bubukoolumabu boola, búsolool.»
«Muñeˈe Dayit lajuujuk ákibben kaanaku Kilisita fan ayitowumul li eketayi. Wahawu unwu újimuu li aan:
“Ateemit let akatool bata kaketumuu,
ban eniilayi yoola let éfal̥ li huyaak.”
«Mo emmuu, Ateemit layitenuuyitenul li eketayi Yéesu an ilobemuu loo. Ban alolaal foofolaal feh lumaataale kayitowulaku koola li eketayi. Ateemit latebenooteben ajow akaan kaŋenool kúli, min asenool Buyinumabu Banabaabu ban alobumuu kasen, min aŋa’ bo akaan li alolaal loon bukuluul humumuul jijukumuu, ban foof li jijam. Mata Dayit humumool ajowut boot haatiya emitayi. Bale lansaan:
“Amaaŋenawu Ateemit lansaan Amaaŋenawu úmbaam:
Ubil ubah kaŋenom kúli,
boot yok nan emmuu ikaani kulatooli úkakul.”
«Muñeˈe bukanabuku feh kata Isilayeel, koote kuhaas li mal̥egen kaanaku: Yéesu an jibaaŋumuu li ekuluwaayi, akila humumool Ateemit akaanumuu alako Amaaŋen li Afakena.»

Nan bukanabuku kujamumuu kulimaku kan Fiyeel alobumuu, li goliil li uyinum ŋáa’. Muñeˈe li kugel̥l̥en Fiyeel li Kufootal kaabuku kooniil:
— Kútuyoli, kama muñowu áloli boot min jikaan buu?
Fiyeel li aaniil:
— Jibet búsol buloŋabu booluul buhaanabu, min jítiiwo jiŋa’ buloŋ buwunkul. Banumuu, anoowan li bukuluul li ajow kúbatiisewool li kajaw kata Yéesu Kilisita, boot kabonket kata uhoofoolawu wooluul. Jikaan momuu, Ateemit fan asenuul kájiyaku kata Buyinumabu Banabaabu. Mata wahawu wan Ateemit alobumuu kasen, wooluul bukuluul li kuñooluul. Wata foof bukanabuku feh kakinumuu lóyi, bukanabuku feh kan Amaaŋenawu Ateemit oololaal ammuu li áhooñul.
Fiyeel li alaañen alobiil kulim kameeŋe, boot kakaaniil kúyinen li boot kawankuleniil. Li aaniil:
— Jífu’ li bukanabuku kata muñeˈe kajakutumuu, min Ateemit afakenuul.
Li kúbatiise bukanabuku káyinenumuu hulimahu hata Fiyeel. Hunakahu unhu, bukanabuku kubilumuu kufamen to huwoogahu hata bukanabuku káyinenumuu li Yéesu, kuyilo kúliiŋ sínjunne síhaaji.

Muñeˈe bukanabuku káyinenumuu li kuhanken to li kawoog, min kunaak kujanten kulimaku kan Kufootalaku kunaake kuliikeniilumuu. Li kujooŋoo to min kuloŋ buloŋ bata batuyaay, min kunaak kutiñum dín dáno, li kuhanken foof min kul̥aw Ateemit li mano. Ekole li elako li anoowan, mata Kufootalaku kunaanaak kukaan wah wameeŋe wájaahaleniye li búhiisenum bameeŋe. Káyinenumuu li Yéesu feh li kubaj kajamoo, ban li kuŋa’ wahawu wan anoowan li buko abaje kukaan tin tano. Li kújula sitaamasu sooliil li wahawu wan kubajumuu, ban li kugaben sídalamasu san kubaj tomuu, min kusen anoowan loon afañumuu. Li kunaak kujow hunakoohunak kujow kuwoog li kayinoo kano, li Eluufayi yata Ateemit. Li kunaak kutiñ hutiñahu hooli dín dáno li siluufasu sooliil, li ésuumansuum ló, li buyinum bájoobiye. Li kunaak kukijen ukijen wata kasal Ateemit. Li kúsuum bukanabuku feh. Amaaŋenawu li anaak afamen hunakoohunak li huwoogahu hooliil, bukanabuku kan afakenumuu.

સાંભળો Bakaanelabu 2