Incito 7
7
Stefano mbwaakabalungulwida
1Elyo mupaizi mupati wakati, Sena mbwaabede aya? 2Wakavuwa wati, Nobaalumi bakwesu anomatata, amuswiilile. Leza wabulemu wakali bonya kuli-Abrahamu tateesu naakali ku-Mesopotamiya, katana kukala ku-Harani, 3wakamwaambila kuti, Kozwa mucisi cabanamuzeenu, akumikowa yako, uye kucisi ncenti kakutondezye ncico. 4Ndilyonya wakazwa mucisi caba-Kaldayo, wakala mu-Harani. Elyo naakafwa wisi, Leza wakamulongezya muliceecino cisi ncomukede sunu. 5Pele takamupede lukono omuno pe, nobuba busena bwakulyatika tende lyomwe, kwala wakamusyomezya kuyoomupa ncico cibe cakwe, ecabana bakwe munsi lyakwe, katana kuba amwana. 6Eno mbombuboobo Leza mbwaakaamba kuti bana bakwe bayookala mucisi cabamasi, bayoobacita bazike bakabalele bubi myaaka iili myaanda yone. 7Pele cisi iciyoobacita bazike ndiyoocibeteka, mbwaakaamba Leza, Munsi lyakooko bayoozwa bakandikombele muliboobuno busena, 8Wakamupa cizuminano cakupalulwa, aboobo Abrahamu wakazyala Izaka, wakamupalula kubuzuba bwamusanu mwaatatu. Izaka wakazyala Jakobo, Jakobo wakazyala basikale abali kumi mubabili. 9Eno basikale, nkaambo kebbivwe, bakamuuzya Josefa ku-Egepita, kwalo Leza wakali awe, 10wamuvuna kumapenzi aakwe oonse, wamupa luzyalo abusongo kumbele lya-Farao, mwami wa-Egepita, wamucita mweendelezi wa-Egepita awaŋanda yakwe yoonse. 11Elyo kwakaba nzala mucisi coonse ca-Egepita eca-Kanana, amapenzi mapati, matateesu tabakajene kulya. 12Pele Jakobo, naakamvwa kuti maila nkwaali ku-Egepita, wakatuma matateesu lutaanzi. 13Mulweendo lwabili Josefa wakazibwa banabakwabo, awalo mukowa wa-Josefa wakaambwa kuli-Farao, 14Nkabela Josefa wakatumina wisi Jakobo, wakamwiita abeŋanda yakwe boonse, bantu abali makumi aali musanu mwaabili amusanu, 15Elyo Jakobo wakalonga wainka ku-Egepita, wakafwa walo, amatateesu, 16bakatolwa ku-Sekemu, bazikwa mucuumbwe ncaakaula Abrahamu muulo wensiliva kubana ba-Emori mu-Sekemu. 17Pele mbecakaswena ciindi cacisyomezyo, Leza ncaakasyomezya Abrahamu, bantu bakavula, baba banjibanji mu-Egepita, 18limwi kwakaba umbi mwami mu-Egepita uwatakali kumuzi Josefa. 19Walo wakacitila mukowa wesu camaanu, wakapenzya matateesu kuti basowe bavwanda babo, kuti bataponi. 20Ncencico ciindi ncaakazyalwa Musa, mwana uuebeka, wakalelwa myeezi yotatwe muŋanda yakwabo, 21nkabela naakasowegwa, mwana a-Farao musimbi wakamubweza, wakamulela mbuli mwanaakwe. 22Musa wakaiisigwa busongo boonse bwa-Egepita, wakaba anguzu kumajwi akumilimo yakwe, 23Eno naakali emyaaka iili makumi one, kwakanjila mumoyo wakwe kuti aswaye banabakwabo, bana ba-Israyeli, 24Elyo naakabona umwi wabo ulapenzegwa wamuvuna, wamulwanina uupenzegwa, wajaya mu-Egepita, 25Wali kuyeeya kuti, banabakwabo balaziba kuti Leza ulabaangulula ajanza lyakwe, kwalo tabakazibide, 26Nobwakaca wakajana bamwi balalwana, wakabakombelezya kuti balekane wati, Nobaalumi, muli babunyina, mulwaninanzi? 27Pele oyo uwakasumuna mweenzinyina, wakamutonka wati, Nguni wakubika bwami abubetesi kulindiswe? 28Sena uyanda kundijaya mbubonya mbookajaya mu-Egepita jilo? 29Musa naakamvwa obo wakatija, waakukala mucisi ca-Midiani, nkwaakazyalila bana bobile. 30Nokwakamana myaaka iili makumi one angelo wakalibonya kulinguwe mukasaka kacilundu ca-Sinai, mubbalabala lyamulilo muciteo. 31Eno Musa naakacibona, wakayoowa kucilengaano, naakaswena afwaafwi kulangisisya, kwakasika ijwi lya-Jehova, 32lyakati, Ndime Leza wabauso, Leza wa-Abrahamu, awa-Izaka, awa-Jakobo. Musa wakazyangama, takali ecamba cakulangisisya, 33Jehova wakamwaambila kuti, Gwisya ndyasyo kumatende aako, nkaambo abusena awo mpoimvwi mpaansi aasalala, 34Ncobeni ndabona mapenzi aabantu bangu abali mu-Egepita, ndamvwa manyonausi aabo, ndaseluka kuti ndibavune. Eno koboola ndikutume ku-Egepita. 35Musa oyo ngobakakaka bati, Nguni wakubika bwami abubetesi? Leza wakamutuma oyo, abe mwami amuvuni, ajanza lyaangelo uwakalibonya kulinguwe muciteo. 36Walo wakabagwisya, wakacita ziyoosya azitondezyo mucisi ca-Egepita, amu-Lwizi Lusalala, amunkanda myaaka iili makumi one. 37Ngonguwe Musa oyu, uwakaambila bana ba-Israyeli kuti, Jehova Leza wanu uyoomubusizya musinsimi kubanabakwanu uuli mbuli ndime. 38Oyu ngonguwe uwakali mumbungano munkanda, antoomwe aangelo uwakaamba anguwe mucilundu ca-Sinai, antoomwe amatateesu. Nguwakatambula makani maumi akutupa swebo. 39Pele bamatateesu tabakazumide kumuswiilila, bakamukaka, myoyo yabo yakapiluka ku-Egepita, 40bakaambila Aroni kuti, Tucitile mizimo itusolwedele, nkaambo Musa oyo uwakatugwisya mucisi ca-Egepita, tatuzi na wakasikilwanzi. 41Kumazuba ayo bakacita cikozyano camoombe, bakapaila cikozyano eco, babotelwa amilimo yamaanza aabo. 42Leza wakabafutatila, wabasowa kuti bakombe makamu aakujulu, mbubonya mbokulembedwe mubbuku lyabasinsimi kuti,
Sena mwakandipaizya zyakajayigwa azimwi zipaizyo
Munkanda myaaka iili makumi one,
Nywebo nobeŋanda ya-Israyeli? 43Mwakabweza cikombelo ca-Moloki,
Enyenyeezi yamuzimo Refano,
Zikozyano nzomwakalidtila kuzikomba.
Eno ndiyoomugwisya, ndimutole kumbele lya-Babuloni.
44Bamatateesu bakali kujisi cikombelo cabukamboni, mbubonya mbuli kulailila kwayooyo uwakaambila Musa kuti acicite akucikozyanya eco ncaakabona. 45Ncenciceeco njobakaletelela bamatateesu a-Joshua, nobakatola nyika yabamasi mbaakatanda Leza kubusyu bwamatateesu, mane kusikila kumazuba aa-Davida, 46Walo wakajana luzyalo kumbele ya-Leza, wakakumbila kujanina Leza wa-Jakobo cikombelo. 47Pele Solomoni nguwakamuyakila nganda, 48Nekubaboobo Sijulu lyamajulu takali mumaanda aacitwa amaanza, mbubonya mbwaakaamba musinsimi kuti,
49Ijulu ncecuuno cangu,
Inyika mbutandabalilo bwamatende aangu,
Niŋandanzi ngomuti kandiyakile, mbwaamba Jehova,
Mbubuli busena bwakulyookezezya kwangu?
50Sena talili janza lyangu ilyakacita zintu ezi zyoonse?
51Nywebo nobasicinguni abatapalwidwe kumyoyo akumatwi, lyoonse mulakasya Muuya Uusalala, mbubonya mbobakacita bamauso anywebo mbomucita. 52Nguuli musinsimi bamauso ngobatakapenzya? Bakabajaya abakali kusinsima kusika kwa-Uululeme, oyo ngomwabeda baabi abajayi, 53nywebo nomwakatambula mulao kumaanza aabaangelo, pele tamukaucitide. 54Nobakamvwa obo, bakaciswa kumyoyo, bamulumina ntwino, 55Pele walo, mbwaakazywide Muuya Uusalala, wakalangisisya kujulu, wabona bulemu bwa-Leza, a-Jesu uliimvwi kululyo lwa-Leza, 56wati, Amulange, ndabona ijulu lili bukwazi, a-Mwana a-Muntu uliimvwi kululyo lwa-Leza, 57Ndilyonya bakoompolola ejwi pati, balisinka mumatwi aabo, bamukulumukila antoomwe, 58bamutandila anze amunzi, bamuwaala mabwe, Bakamboni bakabika zyakusama zyabo kumatende aamwaalumi uutegwa Saulo, 59Bakamufusa mabwe Stefano, walo ulakomba uti, Mwami Jesu, tambula muuya wangu, 60Nkabela wakafugama amazwi, woompolola ejwi pati wati, Mwami, utababiki mulandu acibi eci, Naakaamba obo, woona.
Sélection en cours:
Incito 7: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.