Genesis 1
LIB
1
Sillaᴋsûb pingortitauninganik.
1Pigiarnerme Gûdib ᴋilaglo nunalo pingortipak.
2Nunalo illênarsimavoᴋ sunataᴋaranelo, itinerublo ᴋollâ tâᴋpoᴋ, Gûdiblo anerningata imaᴋsuit ᴋollangiarpait.
3Gûdelo oᴋarpoᴋ: Kaumalerle. Kaumalerpoᴋ tagva.
4Gûdelo takovoᴋ ᴋaumajoᴋ nâmangmat. Tagva Gûdib ᴋaumajoᴋ avikpâ tâᴋtomit.
5Kaumajorlo Gûdib uvlormik taivâ, tâᴋtorlo unnuarmik taivlugo. Tagva unnungorpoᴋ uvlângorlunelo, uvloᴋ sivorleᴋ.
6Gudelo oᴋarpoᴋ: Aulangitoᴋarle imaᴋsuit akorngane, aviktaujutiksaujomik imaᴋsuit akorngane.
7Tagva Gûdib aulangitoᴋ sanavâ, imaᴋsuillo aulangitub atânêtut avikpait imaᴋsoarnit aulangitub ᴋollânêtunit. Taimailerporlo.
8Aulangitorlo Gûdib ᴋilangmik taivâ. Tagva unnungorpok uvlângorlunelo, uvlub aipanga.
9Gudelo oᴋarpoᴋ: Imaᴋsuit ᴋilaub atânêtut atautsemut katersorlit, ipterilingajoᴋ takuksaurᴋovlugo. Taimailerporlo.
10Ipterilingajorlo Gûdib nunamik taivâ, imaᴋsuit atautsemut katersortut imarbiksoarmik taivlugit. Gûdelo takovoᴋ nâmangmat.
11Gûdelo oᴋarpoᴋ: Nunamit nuilerlit iviksukkat, perortullo kingorliksatalît, napârtullo, paungalît, paungalivaktut ingmingne kingorliksataᴋartunik nuname, ilûnatik ingmikut pitjutilît. Taimaiporlo.
12Nunamillo nuilerput iviksukkat perortullo kingorliksatalît, ilûnatik ingmikut pitjutilît, napârtullo paungalivaktut ingmingne kingorliksataᴋartunik, ilûnatik ingmiknt pitjutilît. Gûdelo takovoᴋ nâmangmat.
13Tagva unnungorpoᴋ uvlângorlunelo, uvluk pingajuak.
14Gudelo oᴋarpoᴋ: Kilangme aulangitome ᴋaumaᴋuteᴋarle, uvlormiglo unnuarmiglo aviktitsijuksanik nilliuninullo uvlunullo, jârinullo nellunaikutaksaujunik.
15Kaumaᴋutiksauvut ᴋilangme aulangitome, nunamik ᴋaumairᴋovlugit. Taimailerporlo.
16Gûdiblo ᴋaumaᴋutsoâk magguk senavak, ᴋaumaᴋut anginersaᴋ attaniotijuksaᴋ uvlormut, ᴋaumaᴋullo mikkinersaᴋ attaniotijuksaᴋ unnuarmut, uvloritjallo (sanavait).
17Gûdiblo ᴋilangmut aulangitomut illivait, ᴋaumairᴋovlugit nunamik.
18Attanioterᴋovlugillo uvlormut unnuarmullo, aviktitserᴋovlugillo ᴋaumajomiglo tâᴋtomiglo. Gûdelo takovoᴋ nâmangmat.
19Tagva unnungorpoᴋ uvlângorlunelo, uvlut sittamangat.
20Gudelo oᴋarpoᴋ: Imaᴋ aulaviole ômajunut tarnelingnut aulajunut, tingmitjallo tingilit nuname ᴋilaub aulangitub atâne.
21Gûdiblo pingortipait imaᴋsiutit angijut, ômajullo tarnilît tamaita aulajut, imab aulavigijingit, tamaita ingmikut pitjutilît, tingmitjallo esarolît tamaita, tamaita ingmikut pitjutilît. Gûdelo takovoᴋ nâmangmat.
22Gûdiblo saimauserpait oᴋarlunelo: Kinguvâktâᴋattarluse unuksivalliatitse, imarbiksûb imanga nâmavlugo, tingmitjallo unuksivallialit nuname.
23Tagva unnungorpoᴋ uvlângorlunelo, uvlut tallimangat.
24Gûdelo oᴋarpoᴋ: Nunamit pingorlit ômajut tarnilît, ilûnatik ingmikut pitjutilît: nergjutit pâmgortullo ômajullo nunaᴋsiutit, ilûnatik ingmikut pitjutilît. Taimailerporlo.
25Gûdiblo pingortipait ômajut nunaᴋsiutit, tamaita ingmikut pitjutilît, nergjutillo ingmikut pitjutilît, tamaitalo pâmgortut ivjome ingmikut pitjutilît. Gûdelo takovoᴋ nâmangmat.
26Gûdelo oᴋarpoᴋ: Inuliorta adsilivluta, uvaptitutituksanik, attaniojuksanik mingeritjanut imarbingmêtunut, tingmitjanullo ᴋilaub attânêtunut, nergjutinullo, nunamullo ilûnânut, pâmgortunullo tamainut, aulajunut nuname.
27Gûdiblo inuk pingortipâ, ingminik adsilivlune, Gûde adsilivlugo pingortipâ, angullo arnarlo pingortipak.
28Gûdiblo saimauserpak oᴋautivlugiglo: Kinguvâktâᴋattarlutik unuksivallialeritik, nuna nâmavlugo attaniotivigivlugolo: nâlegauleritiglo mingeritjanut imânêtunut, tingmitjanullo ᴋilaub atânêtunut, ômajunullo tamainut aulajunut nuname.
29Gudelo oᴋarpoᴋ: Ahâk, illiptingnut tunivakka perortut kingorliksatalît tamaita nunaᴋsoarme ilûnâne, napârtullo tamaita paungalivaktut kingorliksataᴋartunik, tamakkoa nerᴋiksariniarpatik.
30Omajunullo nunaᴋsiutinut tamainut, tingmitjanullo tamainut ᴋilaub atânêtunut, ômajunullo tamainut nuname aulajunut tarnelingnut, perortut tungujoᴋtat tunivakka, nerᴋiksarijaurᴋovlugit taipkonunga. Taimailerporlo.
31Gûdiblo pingortitane tamaita ullernaigigamigit, takovoᴋ nâmadlarmatta. Tagva unnungorpoᴋ uvlângorlunelo, uvlut satsingat.

Labrador Inuttitut Heritage Bible © 2008 Canadian Bible Society

En savoir plus sur Gûdib Uĸausingit