HAGONEGAHANI 2
2
1I ngekana na vavearo ma na ano ma na ara ni marâ hato igê ka uhu. 2God ki hatungia na tagaraha iana i nago tarana na pita na tangiana. Igê na tangiana ngekana ngaia ki mamaro. 3Ngaia ki hagapunaria na pita na tangiana, ki vora na tangiana raha, suria igê na tangiana ngekana ngaia ki mamaro igê, renia i bani hagavorara hato na ara ni marâ hato. 4Nga hanana God ki hagavorara na ara ni marâ hato ngegana.
Na agua bâkoro i Etene
Matena na Araha God ki bani hagavorara hato na vavearo ma na ano ma na marâ hato igê, 5ka mareha rârâ na rauga ma na apinige igê na ano, ma ki mareha rârâ ta na marâ vige bâgo igê, suria ngaia ki mamênga, vige hagarangisia na mako, ma ki mareha rârâ ta na enoni vige tagarahigi igê na mu. 6Na ve i rarona na ano ki akê me ma ki hagavokaria na mako.
7Ma na Araha God ki tavoa na mako ma ki tagarahia renia na mane. Ngaia ki uhigenia i hengohengona na barisuna na rogaroga ni mêriha, ma na mane ki mêri.
8Ma hemuri na Araha God ki tagarahia na agua i bâkoro kerekê i Etene, ma ki kasia na mane i bani tagarahia, ki oga igê. 9I ngekana ngaia ki nakagi igê na ataka mavê na apinige bâkoro ni ngauha. I gupuna na agua ngekana karu ura igê na apinige gi rua. Na guana tani ki votoa na mauriha mora ma tarema, ma na guana tani ki votoa na giraraha renigi na ta ki koro ma na ta ki era.
10Ta na ve ki gogo i Etene ma ki hagavokaria na mako i ngekana. I na tarihana hura i Etene na ve ngekê ki matanga ki vora ge he. 11Na matangana gi tage ki na ve Pisone. Ngaia ki gogo rihia na agua hagenani i Gavila. 12I ngekana ka oga igê na golo taranina, ma na tavona na apinige i sigini koro ma na hê toratorakaga i raha na meni. 13Na ruata na ve kani Gigone. Ngaia ki gogo rihia na agua hagenani i Kuse. 14Na oruta na ve kani Tigirisi. Ngaia ki gogo i na apanena akê i Asure. Na heta na ve kani Uparatesi.
15Na Araha God ki kasia na mane igê na agua bâkoro i Etene, hanana i tagarahigi igê na mu ma ki bâbâsuria. 16Ngaia ki vi tanga na mane, ki vi: “I koro ma, go ngaugi na guani na ani mavê na apinige i na agua ikê, 17nga noga ma na apinige ni giraraha renigi na ta ki koro ma na ta ki era. Siana hagetage ko ngaua na guana na apinige ngekana. Manga go ngaua, igo ko page meme.”
18Ma hemuri na Araha God ki vi: “Na mane ki pe araria, vige gâga getea. Inê be tagarahia na ani ge araria, na tamana ge tamania.” 19Vikê ngaia ki tavoa na mako ma ki tagarahira na ara ni marâ hato ga mauri i ano ma na manu hato renia. Ma hemuri ngaia ki torera râ tanga na mane, hanana i bâsia, vi na ta na mane ki hêtata renigi. I ngekana nga hanana i tonga na atata. 20I ngekana na mane ki hêtata na ara ni manu ma na ara ni marâ ga mauri i ano. Ma ngaia ki pe tarahua rârâ ta na hitangita, vige araria so marena, se vi na tamana ge tamania.
21Ma hemuri na Araha God ki katoa na mane ki mauru bore. Matena i mauru, na Araha God ki tavoa na ani gi tage na suri ravoravona na mane, ma ki puruia aporo renia na hasigona. 22Ngaia ki tagarahia na hehene renia na suri ravoravona ma ki torea tanga na mane. 23Ma na mane ki vi:
“Hoita, ngaia ki na enoni manga inê.
Ngaia ki maratoraku! Muru tagenamirua!
Ngaia ki na suriku ma na hasigoku.
Ngaia ki na tamaku i arariê ngavê,
suria na Araha God ki tagarahia reniê inê.”
24Tahema na mane ki panirerua o vaemana ma kenana, ma ki gâga haku tare henia na gete iana, hanana garu obâbahaku manga na vere tage togo ma. 25Ngairerua na mane ma na gete karu rupaturi, ma ki mareha vigaru maki.
Sélection en cours:
HAGONEGAHANI 2: KCB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2011 Bible Society of the South Pacific