En parallèle
1
جدود المسيح
1دَوْل أَسَامَيْ هَنَا جُدُودْ عِيسَى الْمَسِيحْ إِبْن دَاوُدْ إِبْن إِبْرَاهِيمْ. 2إِبْرَاهِيمْ وِلِدْ إِسْحَاقْ وَ إِسْحَاقْ وِلِدْ يَعْقُوبْ وَ يَعْقُوبْ وِلِدْ يَهُوذَا وَ أَخْوَانَهْ. 3وَ يَهُوذَا وِلِدْ فَارِصْ وَ زَرَحْ وَ أَمُّهُمْ هِي تَمَارْ. وَ فَارِصْ وِلِدْ حَصْرُونْ. وَ حَصْرُونْ وِلِدْ رَامْ. 4وَ رَامْ وِلِدْ عَمِنَدَابْ. وَ عَمِنَدَابْ وِلِدْ نَحْشُونْ. وَ نَحْشُونْ وِلِدْ سَلْمُونْ. 5وَ سَلْمُونْ وِلِدْ بُعَازْ وَ أَمّ بُعَازْ هِي رَاحَابْ. وَ بُعَازْ وِلِدْ عُبَيْد و أَمّ عُبَيْد هِي رَعُوثْ. وَ عُبَيْد وِلِدْ يَسَّى. 6وَ يَسَّى وِلِدْ دَاوُدْ الْمَلِكْ.
وَ دَاوُدْ وِلِدْ سُلَيْمَانْ وَ أَمّ سُلَيْمَانْ أَوَّلْ هِي مَرَةْ أُرِيَّا. 7وَ سُلَيْمَانْ وِلِدْ رَحَبْعَامْ. وَ رَحَبْعَامْ وِلِدْ أَبِيَّا. وَ أَبِيَّا وِلِدْ أَسَا. 8وَ أَسَا وِلِدْ يَهُوشَفَطْ. وَ يَهُوشَفَطْ وِلِدْ يُورَامْ. وَ يُورَامْ وِلِدْ عُزِّيَّا. 9وَ عُزِّيَّا وِلِدْ يُوتَامْ. وَ يُوتَامْ وِلِدْ أَحَازْ. وَ أَحَازْ وِلِدْ حِزْقِيَّا. 10وَ حِزْقِيَّا وِلِدْ مَنَسَّى. وَ مَنَسَّى وِلِدْ أَمُونْ. وَ أَمُونْ وِلِدْ يُوشِيَّا. 11وَ يُوشِيَّا وِلِدْ يَكُنِيَا وَ أَخْوَانَهْ وَ دَا فِي الزَّمَنْ الْفَوْقَهْ مَمْلَكَةْ بَابِلْ غَلَبَتْ الْيَهُودْ وَ وَدَّتْهُمْ فِي دَارْ بَابِلْ.
12وَ بَعَدْ وَدَّوْهُمْ فِي بَابِلْ يَكُنِيَا وِلِدْ شَلْتِيِيلْ. وَ شَلْتِيِيلْ وِلِدْ زَرُبَّابِلْ. 13وَ زَرُبَّابِلْ وِلِدْ أَبِيهُودْ. وَ أَبِيهُودْ وِلِدْ أَلِيَاقِمْ. وَ أَلِيَاقِمْ وِلِدْ عَزُورْ. 14وَ عَزُورْ وِلِدْ صَدُوقْ. وَ صَدُوقْ وِلِدْ أَخِيمْ. وَ أَخِيمْ وِلِدْ أَلِيُودْ. 15وَ أَلِيُودْ وِلِدْ أَلِعَازَرْ. وَ أَلِعَازَرْ وِلِدْ مَتَّانْ. وَ مَتَّانْ وِلِدْ يَعْقُوبْ. 16وَ يَعْقُوبْ وِلِدْ يُوسُفْ وَ يُوسُفْ دَا بِقِي رَاجِلْ هَنَا مَرِيَمْ وَ مَرِيَمْ وِلْدَتْ عِيسَى الْبِنَادُوهْ الْمَسِيحْ. 17وَ خَلَاصْ مِنْ إِبْرَاهِيمْ لَحَدِّي دَاوُدْ حَسَبَوْا أَرْبَعْةَ عَشَرْ جُدُودْ. وَ مِنْ دَاوُدْ لَحَدِّي الْوَكِتْ الْوَدَّوْا فَوْقَهْ الْيَهُودْ فِي بَابِلْ حَسَبَوْا أَرْبَعْةَ عَشَرْ جُدُودْ. وَ مِنْ وَكِتْ وَدَّوْا الْيَهُودْ فِي بَابِلْ لَحَدِّي وَالُودَةْ الْمَسِيحْ حَسَبَوْا أَرْبَعْةَ عَشَرْ جُدُودْ.
والودة المسيح
18وَ وَالُودَةْ عِيسَى الْمَسِيحْ بِقَتْ مِثِلْ كَيْ. نَادُمْ أُسْمَهْ يُوسُفْ كَرَبْ رَاسْهَا لِمَرِيَمْ أَمّ عِيسَى. وَ قُبَّالْ مَا شَالْهَا فِي بَيْتَهْ وَ لَا رَقَدْ مَعَاهَا هِي بِقَتْ غَلْبَانَةْ بِقُدْرَةْ الرُّوحْ الْقُدُّوسْ. 19وَ يُوسُفْ رَاجِلْهَا نَادُمْ صَالِحْ وَ مَا يِدَوْر يِعَيِّبْهَا قِدَّامْ النَّاسْ. وَ أَشَانْ دَا، هُو شَالْ نِيَّةْ يِطَلِّقْهَا بِالْعَشِيرْ. 20وَ وَكِتْ هُو لِسَّاعْ قَاعِدْ يِفَكِّرْ فِي الْكَلَامْ دَا، وَاحِدْ مِنْ مَلَائِكَةْ اللهْ جَاءْ لَيَّهْ فِي حِلِمْ وَ قَالْ: يَا يُوسُفْ وِلَيْد دَاوُدْ مَا تَخَافْ. شِيلْ مَرِيَمْ فِي بَيْتَكْ وَ خَلِّي تَبْقَى مَرْتَكْ أَشَانْ الصَّغِيرْ الْفِي بَطُنْهَا جَاءْ بِقُدْرَةْ الرُّوحْ الْقُدُّوسْ. 21وَ تَلْدَ وِلَيْد وَ إِنْتَ تِسَمِّيهْ عِيسَى#1‏:21 عيسى: بكلام عبراني، لغة اليهود، دا يَشُوعَ و معناته الله ينجّي. أَشَانْ هُو بَسْ النَّادُمْ الْيِنَجِّي شَعَبَهْ مِنْ ذُنُوبْهُمْ.
22وَ دَا كُلَّ بِقِي مِثِلْ كَيْ أَشَانْ الْكَلَامْ الْاللهْ قَالَهْ بِخَشُمْ النَّبِي يِتِمّ. ﴿الْبِنَيَّةْ اللِّسَّاعْ مَا شَافَتْ رَاجِلْ غَلْبَانَةْ وَ تَلْدَ وِلَيْد 23وَ بِنَادُوهْ عِمَّانُوِيلْ﴾. وَ الْأُسُمْ عِمَّانُوِيلْ مَعَنَاتَهْ هُو اللهْ قَاعِدْ مَعَانَا. 24وَ وَكِتْ يُوسُفْ قَمَّ مِنْ النَّوْم، هو سَوَّى الشَّيْء الْمَلَكْ اللهْ قَالَهْ لَيَّهْ وَ شَالْ مَرْتَهْ فِي بَيْتَهْ. 25وَ لَاكِنْ مَا لِمِسَاهَا لَحَدِّي وِلْدَتْ وِلَيْد وَ سَمَّاهْ عِيسَى.