SEEMTIRNAK 3
3
Milai Sualnak
1Cun Pathian ih tuahmi hmuahhmuah lakah rulpi cu a hrokhrawl bikmi ramsa a si. Rulpi cun nunau hnenah, “Hmuan sungih thingkung pakhatkhat ih rah nan ei lo pei ti ah Pathian in a lo ti ngaingai maw?” ti ah a sut. 2Nunau nu cun, “Hmuan sungih thingrah hmuahhmuah kan ei thei ko; 3asinain hmuan laifangih a ummi thingrah cu kan ei thei lo, ziangahtile acuih thingrah cu ‘Nan ei lo pei; a tham khal nan tham lo pei, nan ei asile nan thi ding a si,’ ti ah Pathian in in ti,” ti ah rulpi cu a ti.
4Rulpi cun, “Cutin a si lo, nan thi hrimhrim lo ding. 5Nan ei asile nan ei ni in nan mit a vaang ding ih amah Pathian vekin a ṭha le a sia theihthiamnak nan nei ding, ti kha Pathian in a theih cia ruangah a lo khamnak a si,” ti ah nunau hnenah a sim.
6Cuticun nunau nu in hmuan laifangih thingkung mawizia le a rah thawt dingzia cu a hmu ih fim cu ziang tluk duhnungza so a si ding, tiin a ruat. Curuangah thingrah cu a lo ih a ei. Cuih hnuah a pasal a pek ih anih khal in a ei ve. 7Thingrah an ei ṭheh vete in an mit vaangin theihtheinak an nei ih lawngte ih um an si kha an thei aw. Curuangah theipi hnah an ṭhitkhawm ih an hup aw.
8A cuih zanlam simneem ah Bawipa Pathian cu hmuan sungah a ra. A rat thawm an theih tikah a hnen ihsin hmuan sungih thingruul lakah an relh. 9Cutikah Bawipa Pathian in mi pa cu a ko ih, “Khui lamah so na um?” ti ah a ti. 10Cupa in, “Hmuan ih na rat thawm ka theih ih ka lawngfangkheh ka si ruangah ka thin a phang ih ka relh a si,” ti ah a ti.
11“Zo in so lawngfangkheh ih na um cu a lo sim? Thingrah ei hlah aw ka lo timi na ei maw si?” ti ah Pathian in a sut. 12Mi pa in, “Ka hrangih na tuahmi nunau nu in thingrah cu i pek ih ka ei a si,” ti ah a ti.
13Cule Bawipa Pathian in nunau nu hnenah, “Zianghrangah hiti in thil na tuah?” ti ah a sut. Cun nunau nu in, “Rulpi in i bum ih ka rak ei a si,” ti ah a ti.
Pathian Ih Cawhkuan Peknak
14Cun rulpi hnenah Bawipa Pathian in,
“Nunau nu na bum ruangah
cawhkuan ka lo pe;
Ramsa hmuahhmuah lakah nangmah lawng in
hi camsiatnak hi na tuar ding;
Atu thokin a bokin na vak ding ih,
Na nunsung hmuahhmuah na ei ding
rawl cu leidip a si ding.
15Nunau thawn ka lo raal awter ding ih,
Nan tesinfa tiangin nan raal aw ding.
Na lu a lo subeek ding ih,
Nang in a kedil na cuk ding,” ti ah a ti.
16Cun Pathian in nunau hnenah,
“Fa na vun tikih na harnak cu
ka ṭhanter ding,
Na hrin tikih a natnak cu
ka karhter ding.
Cu cingin na pasal cu
na duh thotho ding ih,
A lo uktu a si ding,” ti ah a ti.
17Cule Pathian in mi pa hnenah,
“Na nupi thu na ngai sawn ih,
Ei lo ding ka timi
thingrah na ei ruangah,
Leiram cu nangmah ruangah
siatserh a si;
Na pumcawmnak ah zonzai zetin,
Na nunsung hmuahhmuah
hna na ṭuan ding.
18Leilung in hling le so le
hrampi a phunphun a suah pei ih,
Culak ih a keuhmi
hramrawl na ei pei.
19Leidip in tuahmi na si ih,
Leilung ih na can sal tiang,
Na nunnak hrangah na thlanhriput in
hna na ṭuan ding.
Leidip in tuahmi na si ih,
Leidip ah na cang sal ding,” ti ah a ti.
20Cun mi pa in a nupi cu minung hmuahhmuah ih nu a si hrangah Evi#3.20 Evi: tihi Hebru ṭong in ‘a nung’ ti thawn a bang-aw. ti ah a ko. 21Cule Bawipa Pathian in Adam le a nupi hrangah savun hnipuan a tuahsak ih a hrukter.
Adam le Evi Hmuan Leng Ah
22Cun Bawipa Pathian in, “Minung cu a ṭha le a sia thleidan a thiam zo hrangah kanmah vek a si zo. Nunnak thingkung ih rah ei sal in kumkhua in a nung pang ding,” ti ah a ti. 23Curuangah Bawipa Pathian in minung cu a seemnak leilung thlo dingin Eden hmuan ihsin a dawi.
24Pathian in minung cu a dawisuak ih nunnak thingkung kiangih zohman rat ngam lonak dingah hmuan ih nisuahnak lamah Cherubim#3.24 Cherubim: timi cu ramsa phun khat, vancungmi bangtuk a si. le a tle zukzo ih a her-aw luailomi ralnam a ret.
Sélection en cours:
SEEMTIRNAK 3: FCL
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Falam Bible Revision © Bible Society of Myanmar, 2002.