KUTUHUKA 20
20
1Zambi wambile maliji wano eswe ngwenyi,
2Nakuchijile ku chifuchi cha Engitu, ku zuwo lia upinji, Yami Yehova Zambi ye.
3Kanda ukapwa ni tuzambi tweka kumeso jami.
4Kanda ukalisongela kaponya, chipwe wa kulifwa ni chuma chimwe cha mwilu, chipwe chuma cha hashi, chipwe chuma cha mu meya mushi lia hashi. 5Kanda ukafukama kuli ayo, chipwe kwalingila, ka, mumu yami Yehova Zambi ye, nguli Zambi ya ukwa, nikufwetesa ana uhenge wa atato ndo ku chisemuko chamuchitatu ni chamuchiwana cha waze akunguvwila kole; 6nikulweza utu wa zango kuli tununu twa waze akunguzanga, kuli waze akufunga shimbi jami.
7Kanda ukavuluka ni mahuza jina lia Yehova Zambi ye, mumu Yehova kechi kusambisa yoze mavuluka ni mahuza jina lienyi.
8Iwuluka tangwa lia Sambata, ukalifunge lisandu. 9Ukahondangane matangwa asambano. Ukalingeho milimo ye yeswe. 10Alioze tangwa liamuchishimbiali Sambata kuli Yehova Zambi ye. Kanda ukalingaho milimo niyeyimwe, chipwe yena, chipwe mwané wa lunga, chipwe mwané wa pwo, chipwe ngamba ye wa lunga, chipwe ngamba ye wa pwo, chipwe yimuna je, chipwe njize uli mu chihunda che. 11Mumu ha matangwa asambano Yehova alingile malilu, ni hashi, ni kalunga-lwiji ni yuma yeswe yilimo. Yahwima ha tangwa liamuchishimbiali. Kashika Yehova wawahishile lie tangwa lia Sambata. Yalipwisa lisandu.
12Lemesa tatenu ni noko, hanga matangwa je akapwe anji mu chifuchi chize Yehova Zambi ye kanakwehe.
13Kanda ukashiha mutu.
14Kanda ukalinga utanji.
15Kanda ukeya.
16Kanda ukatayila mahuza mwenyembo we.
17Kanda ukavwila chipululu zuwo lia mwenyembo we. Kanda ukavwila chipululu pwo lia mwenyembo we, chipwe ngamba yenyi wa lunga, chipwe ngamba yenyi wa pwo, chipwe ngombe yenyi, chipwe chimbulu chenyi, chipwe chuma chimwe cha mwenyembo we.
18Mba e atu eswe amwene kukulunguza ni mihenyo ni lie liji lia chitavwi ni mulundu unatuhwisa mwishi. Muze atu achimwene, yachikima, yamana kusuku. 19O yamba kuli Mose ngwo, Hanjika yena ni yetu mba kumutwivwa, alioze Zambi kanda ahanjika kama kuchina mutufwa. 20Mose yamba kuli e atu ngwenyi, Kanda nwivwa woma mumu Zambi heza mukunweseka, hanga woma wenyi ukapwe kumeso jenu, hanga kunuchi kavulumuna.
21Atu amanyine kusuku. Mose yakundama ndo mu milima pwi muze mwapwile Zambi. 22Yehova yamba kuli Mose ngwenyi, Chocho ukambe kuli A-Izalele ngwe, Yenwene hinwamona ngwami, Kwilu hinahanjika ni yenu. 23Kanda ukalinga tuzambi tweka kwapalakenya ni yami, chipwe tuzambi twa prata, chipwe tuzambi twa oru. 24Ukangutungile chilumbilo cha mavu. Ukalambwileho milambu ye ya kulumba ni milambu ye ya sambukila, ni mapanga je ni ngombe je. Mu yihela yeswe kuze mungukaewulwisa jina liami kumungukakundama kuli yena. Kumungukakuwahisa. 25Kachi mukangutungila chilumbilo cha mawe kanda uchitunga ni mawe a kutota, mumu kachi muzundulaho chikungo che, kachi muchipihisa. 26Chipwe kanda ukanyinyina ha ndondelo ku chilumbilo chami hanga uselesele we kuuchi kasoloka.
Sélection en cours:
KUTUHUKA 20: Csa
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Chokwe Bible © Bible Society in Angola, 1975.
