KUTUHUKA 17
17
1Chikungulwila cheswe cha A-Izalele ayile wenyi wo, chize ku puya ya Shini, chilombo ha chilombo nikulita ni liji lia shimbi ya Yehova, ndo yatunga chilombo cho ku Refwindimi. Kukwapwileko meya a kunwa niamwe. 2Kashika e atu alitachikile ni Mose ngwo, Twehe meya tunwe. Mose yamba kuli ayo ngwenyi, Yika te nunalitachika ni yami? Kuchi te nuneseka Yehova? 3Kwe kuze atu evwile pwila ya meya. E atu yalinyenyeta ni Mose ngwo, Kuchi te watuchijile ku Engitu? Mukutushiha ni pwila, ni ana jetu ni yimuna jetu nyi? 4Mose watetele kuli Yehova ngwenyi, Ngulinge kuchi ni wano atu? Anambe kungwasa mawe. 5Yehova yamba kuli Mose ngwenyi, Palika yena kulutwe lia atu, utwale makulwana amwe A-Izalele hamwe ni yena, ukwate nawa mu kwoko lie mulumbu we walambile nawo lwiji, ukaye. 6Yami mungumana kumeso je, ha liwe lize lili ku Horepe. Lamba lie liwe mba meya mapukukamo, hanga atu akanwe. Chocho alingile Mose kumeso ja makulwana A-Izalele. 7Yaluka kuma kuze jina ngwenyi, Masa kanda Meripa, mumu ha kulitachika cha A-Izalele, mumu o yeseka Yehova ha kwamba ngwo, Shina Yehova kwali hakachi ketu nyi shina ka?
8Henaho ahetele A-Amaleke. Yasa jita ni A-Izalele mu Refwindimi. 9Mose yamba kuli Yoshua ngwenyi, Tongola malunga, nukaye, nukase jita ni A-Amaleke. Hamene mungukamana ha mbulwa mulundu nikukwata mulumbu wa Zambi mu kwoko liami. 10Chocho alingile Yoshua ngwe amwambile Mose. Yasa jita ni A-Amaleke, mba ni Mose ni Arone ni Hure yakanduka ndo ha mbulwa mulundu. 11Mba chapwile muze Mose azundwile kwoko lienyi, A-Izalele yakangana, mba muze iye azeyesele kwoko lienyi A-Amaleke yakangana. 12Alioze moko ja Mose halema, o yanda liwe, yalisa mushi lienyi mba iye watwamineho. Arone ni Hure akundwijile moko jenyi, mukwo ku lumbu limwe, ni mukwo ku lumbu likwo. Chocho moko jenyi ajikijile ndo tangwa hilianjila. 13Chocho Yoshua yashiha tachi ja A-Amaleke ni ja atu jenyi ni lutwilo wa katana.
14Yehova yamba kuli Mose ngwenyi, Soneka chino mu mukanda hanga chikapwe Chiwulwiso, uchitange kuli Yoshua, mumu kumungukajimuna jimu A-Amaleke; kechi kwaewuluka nawa hashi. 15Mose wafungile chilumbilo, yachiluka jina ngwenyi, Yehova-Nissi. 16Ngwenyi, Yehova walishinga ni shingo, Yehova kumakása jita ni A-Amaleke chize ku chisemuko chimwe ndo ku chisemuko chikwo.
Sélection en cours:
KUTUHUKA 17: Csa
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Chokwe Bible © Bible Society in Angola, 1975.
