ADECHHÜ 1
RENGMA-N-BSI
1
Sahangkechi Cüki
1Adechhü wi Anyiza na atssan nu ayyi sachi; #1.1 Adechhü wi... ayyi sachi; nyelela Adechhü wi Anyiza na atssan nu ayyi sakechi wi; nyelela Anyiza na atssan nu ayyi sa keshhu wi. 2ayyi na matsi nmi nu kaghacang. Kejang na pala tsüdi kejibhon, nu Anyiza ghamu#1.2: Anyiza ghamu; nyelela Anyiza kekhang, nyelela Anyiza wina ameghü kesü, nyelela ameghü kekhang kesü na atssü miwi keqoeden. 3Tsaseng wi Anyiza na khi, “Kewegü yala ciwi ben thsülo.” — Ciwi kewegü na shhugho. 4Anyiza na kewegü tsü mu pi ma nen. Tsaseng wi Anyiza na kejang wina kewegü sapi ma kepa sa, 5nu ma kewegü tsüpi “aghanan” nu kejang tsüpi “aghaja” tsüti cia. Shitawa cen nu aghanen gho — tsüna atsathang atuwa.
6-7 # 2 Pi 3.5. Tsaseng wi Anyiza na khi, “Ciwi atssan na ayyi gishü nu tsü yala apen keni wi kepapa sa benya thsülo”— nu tsüti saya. Tsalina Anyiza na atssan sachi, nu tsüna atssü sa pi kepapa sala atssü yala ma cakhu nu ma miwi ben thsü. 8Anyiza na atssan tsüpi “tang” isa cia. Shitawa cen nu aghanen gho — tsüna atsathang keniwa.
9Tsaseng wi Anyiza na khi, “Ayyi ya shhugho thsüle kesalina atssan cakhu wi atssü ya apen kesü wi saghuya thsülo” — nu tsüti saya. 10Anyiza na ayyi keqha tsüpi “ayyi” nu atssü saghu keben tsüpi “atssükedone” isa cia. Anyiza na tsü mupi ma nen. 11Anyiza na khi, “Ayyi wi aghanglani tsüdila shigü shhugho yathsü, aghanglanithu ma cü ben nu achantonthu ma bi bünya thsülo” — nu tsüti saya. 12Tsalina ayyi wina aghanglani cü tsüdi shigüya, nu Anyiza na tsü mupi ma nen. 13Shitawa cen nu aghanen gho — tsüna atsathang kechengwa.
14Tsaseng wi Anyiza na khi, “Atssan wi kewegüthu shhugho aghaja nu aghanan kepapa sa thsü, nu atsathang, amapi, nu takhunavü #1.14: keccüna khothu, nyelela matsü kepapa kesa sa kewa tsü chüya thsü; 15tsüthu atssan wi wegü nu kewegü pi ayyiwi chi thsülo” — nu tsüti saya. 16Isanu Anyiza na kewegü keti keni saya, aghani pi aghanan wi ben thsü nu asha pi aghaja wi ben thsü; tsüti ghotsithu la sachi. 17Anyiza na kewegüthu pi atssan wi chi nu ayyi wegü thsü, 18aghanan nu aghaja wi wegü thsü, nu kejang kewegü kepapa sa thsü. Anyiza na tsü mupi ma nen. 19Shitawa chen nu aghanen gho — tsüna atsathang mejüwa.
20Tsaseng wi Anyiza na khi, “Atssü wi kahangli kepapa kesa yala pongya thsü nu atssan wi awathu ya pighe thsülo.” 21Isanu Anyiza na atssükedone ghassübvü keti, atssü wi kahangli kepapa kesathu nu awathu tsüdila sachi. Anyiza na tsü mupi ma nen. 22Anyiza na sawegü pi tsüthu tsüdi cü nu khi, “Atssü wi kahanglithu mezzasa nu jikayi, nu awathu ayyi wi jikayi waya.” 23Shitawa cen nu aghanen gho — tsüna atsathang mangawa.
24Tsaseng wi Anyiza na khi, “Ayyi wi aghangsa kahangli kepapa kesa asahang nu aghangsa, kizza nu keti tsüdila benya thsülo”— nu tsüti saya. 25Isanu Anyiza na tsüthu tsüdi saya, nu Anyiza na tsü mupi ma nen.
26Tsaseng wi Anyiza na khi, “Ikhang khili anyi sachi na; mathu tsiyen na ikhang ti nu ikhang cheng thsü na. Mathu ya atssü wi anga, awathu, nu aghangsathu asahang nu aghangsa #1.26: kheni zhükemilikechi kesü wi aghangsathu, ajjen wi kekicensa nu aghangsa; Ibri wi ajjen wi kekicensa nu ayyi miwi tsüdi keti nu kizza tsüdi miwi kedi sa thsüden.” 27Isanu Anyiza na ma tsiyen ti kesa anyi sahangchi. Manyi pi npvüza nu nza sahangchi, 28sawegü pi manyi cü nu khi, “Atsanga kejon benyalo, isanu ashicübvüghathu ayyi tsüdi wi wa hang nu tsü miwi kekhang sen thsü. Hi nshinyi pi anga, awathu, nu aghangsathu tsüdi miwi kekhang sen thsüden. 29Hi nshinyi ya dsa thsüle kesalina pala cüghe nu achan bi tsüdi khuchidha; 30isala aghangsathu awathu tsüdi tsse ghena hi aghanglanithu khuchitheng” — nu tsüti saya. 31Anyiza na ma sakechithu tsüdi ghangchi, nu ma nen ntsa ya. Shitawa cen nu aghanen gho — tsüna atsathang tughowa.

Rengma Naga (N) CL Bible - Kemethajüh (N) CL Bible

Copyright © 2016 by The Bible Society of India
Used by permission. All rights reserved worldwide.

Lisätietoja käännöksestä Kemethajüh (N) CL Bible - BSI