SHURAI 1
1
Teideiphao Souyu
1Ramai nou teideiphao soushu arai hi,#1.1 Ramai nou teideiphao soushu arai hi; moa Araikha hinou Ramai nou teideiphao soupeie; moa Ramai nou teideiphao soutayu phaki. 2deiphao hai zhai soumo hie ae sakhaia bubai hie alia hateitei hoa buyu dzüdu pei hisü maitei-a bubaie alia Ramai vei Rakosü#1.2 Ramai vei Rako; moa Ramai vei khouko; moa Ramai vei teikhai; moa ngaopi shoyu teikhai. dzüpei nou lüa bue. 3Süthaisü Ramai nou “Ava bulowo” tea kharochi peie, süthaifüa ava nasü paloure. 4Ramai nou ava nahai veia ngaoloue. Süthaisü Ramai nou ava ae azhisü souku peire, 5alia Ramai nou ava nasü hea tea sapeie alia azhi nasü khei tea sapeie. Koukhe talapa shona daore, sünasü teithe arai khanae.
6Ramai nou paoe, “Dzü hinou dzüko palowo alia dzü hinou dzü kukua bulowo,” sünasü sükua buloure. 7Sübüa Ramai nou dzüko soupeie alia dzüko pei hi buyu dzü ae dzüko khenou buyu dzü souku peie. 8Alia Ramai nou dzüko pei nasü tei tea sapeie. Koukhe talapa shona daore, sünasü teithe ahai chenae.
9Alia Ramai nou “Teikhe hinou buyu dzütao hai buh lihi ve jülowo ae deithe palowo,” tea kharochi peie alia sünasü sükuloure. 10Ramai nou deithe nasü deiphao tea sapeie ae ve jüa buyu dzü nasü zai tea sapeie. Alia Ramai nou ngaoloua veie toure. 11Alia Ramai nou “Dei hinou vupou, thoube, süübe, rashibe, ae lah kukuvei tya veishi bulowo,” tea kharochi peie. Alia sünasü sükuloure. 12Dei hinou tya kukuyu vupou, thoupfüyu ae shishiyu süübe teitei paopa loue. Alia Ramai nou zhuloua veie toure. 13Koukhe talapa shona daore- sünasü teithe asü chenasüe.
14Alia Ramai nou “Hea ae khei souku loure donou tei hisü ava palowo alia sütao nou teile, teithe ae po vei shee soulowo, 15alia deiphao hi ava peiloure donou tei hi avana soulowo,” tea kharochi peie alia süthaifüa paloure. 16Alia Ramai nou ava adu ahai soupeie; ava adu nasü heaki ae atai nasü kheiki khopeire donoue, Puhnou teivuh-a soupeie. 17Alia Ramai nou sütaosü deiphi hi vapeire donou, 18heaki ae kheiki panou khopeire donou alia ava ae azhi souku loure donou tei hi popa khaipeire. Alia Ramai nou zhuloua veie toure. 19Koukhe talapa shona daore- sünasü teithe adai chenasüe.
20Alia Ramai nou “Ahrina tya tyali dzü hinou hrülowo ae tei hisü raohou khemai zhaota-a hrülowo,” tea kharochi peie. 21Sükua Ramai nou zai hinou buyu khaona adutya ae lüa tayu hrikhaona hrülai- dzühi hrüyu hrikhaona tya tyali ae shouh pfüyu raohou tya hrülai soupeie. Alia Ramai nou zhuloua veie toure. 22Alia Ramai nou “Hrikhaona hrülaiye sü shiha peie, ae khatao hisü tya kaapaloua zai phoulowo alia tei raohou kothou deiphao phoulowo” tea puletao hi shiha peie. 23Alia koukhe talapa shona daore- sünasü teithe angou chenasüe.
24Alia Ramai nou “Lah kuku tya thaifüa kikhaorü ae pounou taitayu hrikhaona ae rekhaona hrülai dei hinou palowo” tea kharochi peie. Alia süsü sükuloure. 25Alia Ramai nou deiphi soukhaona ae pounou taitayu hrülai lah kuku tyasü soupeie. Alia Ramai nou zhuloua veie toure.
26Süthaisü Ramai nou paoe, “Chuo maiye Etao zhuh rai hinou, Etao raibüa nou soulai khe, alia puletaoye panou khah, raohou, ae hrikhaona, vudai poudai, alia dei hi hrikhaona hrülai pei hi panou kholai.” 27Sükua Ramai nou lah puh zhurai hinou maiye soupeie, naotu poutu puhnou soupeie. 28Alia Ramai nou puhaiye shiha peia paoe, “Rashi alao shilowo ae tya kaapaloua deiphao phoulowo alia süsü tukhalowo; alia zai hi khah, tei hi raohou ae dei hi hrikhaona hrülai pei tukhalowo” toure. 29Alia Ramai nou paoe, “Zhukhaio, dei hi thoushiyu rashibe ae shira shiyu süübe teitei hai neletaoye pa toure donou Enou neletao hi peiwure.” 30Alia resou khaona ae tei hi raohou ae pounou taitayu hrikhaona alia ssühaiyu hrikhaona, alia vupou teitei Enou puletao vei touso soure donou peiwure. Alia süsü sübüloure. 31Alia Ramai nou lah puhnou soukhai touyu teitei hai zhuposhu khasho-a veishode tea paore. Koukhe talapa shona daore- sünasü teithe arou chena-e.
Tällä hetkellä valittuna:
SHURAI 1: POUMBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.