Mlk 6
6
Bandu ba Nazaleti ndabaki tabuka Yeesu
(Mat 13.53-58; Luk 4.16-30)
1Yeesu we nyomoka mudye bua bya yena mu mukola kokwa kwe kudileeye, mitonge baaye be yena naye. 2Halwe bambana lusu lwa Sabato*, bya somba kulangidila bandu munda mwa sinagogi. Bandu babule be muteejyanga haba hanunuka na kuboya ti: «Nguni kwa vukileye bii byoso? Njyuni wamwabila yiyi nyinyi na butangala bwa kuta bindu bikataadi? 3Be, yuhu nda yuhu kiluka byende, mwana wa Malia, na mukwaye na Yakobo na Yose na Yuda na Simoni? Na batabwaye ndabaki yakana hakehaaŋa hiitu?» Kwabebya haba kushwa kumutabuka.
4Haŋo, Yeesu bya basaudila: «Musauzi* wa Kabejya ukitumbibwa mabua mooso, alaa mu kisi kye butukeye, kilongo kyaye na kyende kyaye.» 5Yeesu ndeeta lungi kingulu ngulu, ila we hibika biboko haulu habamo bandu bene na lufu na kuba fuula. 6Bya hanunuka na kukushwa kwa butabuke bwa bandu ba mukola waaye.
Yeesu wayiisha mitonge yaye kumi na babidi
(Mat 10.5-15; Luk 9.1-6)
Nyuma ya haŋo, Yeesu bya sumukila mikola yooso ya mumangondo kulangidila bandu. 7Haŋo bya taana mitonge baaye kumi na babidi, bya somba kuba yiisha babidibabidi. Byaba habila butangala bwa kuzyanga mizuka; 8-9haya bakwata kumakushu na kuboya: «Ndamubuula kindu hamwenanga ila bobo kikooma; ndamubuula mukati, nee taba dyaluendo, wala falanga mumbote yiinu. Mutubile makubaati kubidimba, ila ndamushwaala ngubu yibidi».
10Yeesu haya basaudila lungi ti: «Bua dyooso dyabi batabuka mukyende, muyakane momwa mupaka beebya byamu hezela muwowa mukola. 11Itu bandu baumo mukola babenga kuba tabuka ao kumuteejya, muezele mudye bua. Na mukukumune mateke#6.11 Kukumuna mateke, ngumonesha ti badingisi ndabadi na kiyo kya kusaula mauya ma Kabejya mu wowa mukola mabidimba biinu: Yiyakana kumanyiibwa kwabadi.» 12Haŋo, mitonge baye kumi na babidi haba yena, kuka saula mauya ma Kabejya kubandu booso ti baki bambana kufundulula buyakane bwaabo. 13Be jyanga mizuka yabule na kufuula bandu babule beene na lufu mu kuba lalabisha maani.
Kumota kwa Yohane luyabikana mu meema
(Mat 14.1-12; Luk 9.7-9)
14Haŋo, kolo Heloode we teezya musau wa Yeesu, kumona longo dyaye dye bambana mabua mooso. Bamo be boya ti: «Yohane luyabikana mumeema wa tundumuka! Ni bobwa udi na butangala bwa kuta bingulungulu.» 15Bobwa, bangi bandu be boya ti: «Ni Elia.» Bangi lungi haba boya: «Yuhu Musauzi wa Kabejya, bidi yumo Musauzi mukulukulu». 16Haŋa heva teejya Helode wowa musau bya yakula ti: «Ni Yohane luyabikana mumeema! Wambee tembesha mushu, ila watundumuka!»
17Nembebya, Helode we hana kilau kyaku kwaata Yoane na kumuzitika, buangibwe mikulu ya byuma. Yene kukidila Helodia, wee tundula Helode nembe bye nangiye mukazi wa mukwaye Fidipo. 18Kumona Yoane we saudila Helode ti: «Ndayiki bambana kwoobe kubuula mukazi wa mukwoobe!» 19Haŋo, Helodia bya mukwatila Yoane kiizi na kuvula kumuya, ila nde samuna, 20Kumona, Helode we tiina Yoane. Kumona we yukanga ti wene mundu yidi buludi na usidi na bubi, we mukungulula. Haŋa he muteejyeye, bya beleka kabisa, wala we vula kumuteejya.
21Nibobwa, hakwa moneka zila kudi Helodia lusu lwa kusehelela kubutuka kwa Helode. Helodia bya loba bandu babutangala bwaye, bakulu ba balonga-buvadi na bakulu bamikola ya Galilaya.
22Musika wa Helodia bya shwela mudye bua na kusemba; Helode bya seelela na baini baaye. Kolo bya saudila yowa musika: «Nguazye kindu kyooso kyaukivula, ni kwabilekyo.» 23Na bya musaudila kwa kumulapila ti: «Ngilapa kyooso kyauhazya nikwabila, nee luba lwa butangala bwaami.»
24Musika bya nyomoka na kuzyongondela nazye: «Naajye kaayi?» Najye bya mujyongodela ti: «Mushu wa Yohane luyabikana mumeema.» 25Musika bya haluka yayaya kudi Kolo na kumu saudila ti: «Ngiazya ungwabile akeano mushu wa Yoane haulu hasinia!» 26Kolo bya mona susu; bobwa ndevula kumubengela, kukidila kilapo kyeteeye busu bwa baini baye. 27Hakeaŋa, Kolo bya tuma yumo mulonga-buvadi muba baki mudindikijya, na mulao wakuvisha mushu wa Yoane. Mulonga-buvadi bya yena ku zitikilu#6.27 Zitikilu ni bua dyakuzitikila bandu ao kafwalubi na kuka temba mushu wa Yohane. 28Haŋo bya visha mushu haulu ha sinia na kumwabila yowa musika, yowa musika naaye bya habila najye.
29Haŋa badingisi ba Yohane habee teejya wowa musau, habaava kuvabuula kitumba kyaaye na kukaziika kumufungu.
Yeesu wadisha bandu elufu yitano
(Mat 14.13-21; Luk 9.10-17; Yoh 6.1-14)
30Baba mitonge* haba haluka kudi Yeesu na kumusaudila byooso bya beeta na kulangidila. 31Bobwa, bandu beyena na beviyanga bene babule bobwa Yeesu na badingisi baye nda beene nee kindi kyakudya bidyazi. Nibobwa haya basaudila: «Twene mubua disidi bandu tukaume kamo kaindi.» 32Haba yena hibo bunga mu mutumbu, mubua disidi bandu. 33Bobwa bandu babule be bamona ibokweyena na haba yuka kwa benanga; haba yena kabilo mikola yooso na bidimba na kusosoka mudedya bua busu bwa Yeesu na badingisi baye. 34Haŋa heeva sala Yeesu mu mutumbu, haya mona kiandu kikata kya bandu, byaba fiila lusa, kumona benee bushwa mikooko yisidi na mulolezi, bya somba kuba langidila bindu bya bule.
35Yene ndayite kyoolwa, haŋo badingisi baaye haba muyila Yeesu na kumusaudila ti: «Ndayite nyuma na diino bua ni lungu. 36Mbilweela usaudile baa bandu ba yeene kuma kunda na kumikola yidi tonono bakakwi udile bya kudya.» 37Haŋo Yeesu byaba saudila: «Banyu benikindu mubaabile bidyaazi!» Naibo haba muyuujya: «Haŋo! Ukivula twene tukaule mikate ya dinadi mia yibidi#6.37 Dinadi mia yibidi: Ni falanga ya kuabila muvubi mu miango kitemaa na tubaabile baadye»?
38Yeesu bya basaudila: «Mudi na mikate yinga? Mweene muka lole.» Habeewa kumona haba musaudila ti: «Tudi na mikate yitano, na bibelelo bibidi.» 39Haŋo, Yeesu bya basaudila ba yakanishe bandu booso haasi musunyi byandubyandu. 40Bandu haba yakana mu byandu bya mia na bya makumi matano. 41Haŋo Yeesu bya buula yeya mikati yitano na bebya bibelelo bibidi, bya lola haulu na kufiyudila, bya bela yeya mikati na kuabila mitonge baye bayi habe kudi bandu. Na bebya bibelelo bibidi naabyo bya biaba kudi bandu booso. 42Bandu bya baadya booso byaba shiba. 43Badingisi haba tondola makobwa mabindi bya mikati na bibelelo bye shaala, byooso habya yula taba kumi na yibidi. 44Na baba beedya yeya mikate bene bandu helufu yitano.
Yeesu wasumuka haulu ha meema
(Mat 14.22-33; Yoh 6.15-21)
45Akeaŋa, Yeesu bya saudila badingisi baye ba bande mutumbu, bakwi tondokele busu bwaye mbanga ya kabidi yaziba dya Galilaya ku yelekela ku kisi kya Betesaida, mukekya kindi iye wene mukulaa kiandu. 46Nyuma yaku balaa bya yena kukituulu kimo kuka hajya Kabejya.
47Haŋa hayisite kyoolwa, mutumbu wene ndaute hamukidi haziba na Yeesu wene iye bunga kuaŋongo. 48Haŋa hemoneye ti badingisi baaye basuba kwabule kwa kuyisha mutumbu kumbala, kumona mwee wene mukuhumba kwabadi; haŋa tonono na bufuku kukya, Yeesu bya yena kwabadi kusumuka haulu ha meema, na bya vula kuba kila. 49Haŋa habe mumona mukusumuka haulu ha meema, haba yaba haba nizya ti muzuka. 50Kumona, booso bemumona haba teezya moyo. Akeaŋa, Yeesu bya yakula nabo: «Muhuume, ndamutiina ŋjyami!» 51Haŋo, bya banda mu mutumbu mwabeenange, na mwee hawa sama.
Naibo haba hanunuka kabisa. 52Kumona ndabe yuka ngingu ya yeya mikati: Nganyi yabo yene yinemaneema.
Yeesu wafuula badi na lufu ku kisi kya Genezaleti
(Mat 14.34-36)
53Habeewa kuyabuka ziba ndabate mbanga ya Genezaleti haba tukama. 54Habe nyomoka mu mashua, akeaŋa bandu haba muyuka Yeesu. 55Bandu haba yena kabilo mu mikola yooso haba siki muvishila baa badi na lufu haulu ha tulako twaabo, haba bashwala bua dyooso dyabe teejya ti Yeesu udi kwakale. 56Bua dyoso dye yena Yeesu, ku mikola yikata, ku mikola yishenene ao kuma kunda, bandu bebika badi na lufu mu byambala na kukwi haya na Yeesu ti ba lengele nee ni subi yangubu yaye. Na baa booso be mulengela be fuuka.
اکنون انتخاب شده:
Mlk 6: bnx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Forum Communautairre des Traducteurs de la bible et Alphabetisation
