ດານີເອນ 9
9
ຄຳອະທິຖານຂອງດານີເອນ
1ໃນປີທຳອິດຂອງການປົກຄອງຂອງດາຣິອຸດລູກຊາຍຂອງເຊເຊັດ#9:1 ພາສາເຮັບເຣີວ່າ ອາຫະສຸເອລັດ (ມີເຊື້ອສາຍຈາກຄົນເມເດຍ), ເຊິ່ງໄດ້ຂຶ້ນປົກຄອງອານາຈັກບາບີໂລນ#9:1 ຫລື ກັນເດອານ 2ໃນປີທຳອິດຂອງການປົກຄອງຂອງເພິ່ນ, ຂ້າພະເຈົ້າດານີເອນ ໄດ້ເຂົ້າໃຈຈາກພຣະຄຳພີທີ່ກ່ຽວກັບຖ້ອຍຄຳຂອງພຣະເຈົ້າຢາເວທີ່ໄດ້ກ່າວໄວ້ກັບຜູ້ທຳນວາຍເຢເຣມີຢາວ່າ ເຢຣູຊາເລັມຈະຮົກຮ້າງຫັກພັງເປັນເວລາເຈັດສິບປີ. 3ຂ້າພະເຈົ້າຈຶ່ງຕັ້ງໜ້າອະທິຖານຕໍ່ພຣະເຈົ້າ ອົງພຣະຜູ້ເປັນເຈົ້າ ດ້ວຍການອະທິຖານ, ການອ້ອນວອນ, ຖືສິນອົດອາຫານ, ນຸ່ງຜ້າກະສອບເຂົ້າ ແລະ ເກືອກຂີ້ເຖົ່າຢູ່.
4ຂ້າພະເຈົ້າອະທິຖານຕໍ່ພຣະເຈົ້າຢາເວ ພຣະເຈົ້າຂອງຂ້າພະເຈົ້າ ແລະ ສາລະພາບບາບວ່າ:
“ຂ້າແດ່ອົງພຣະຜູ້ເປັນເຈົ້າ, ພຣະເຈົ້າຜູ້ຍິ່ງໃຫຍ່ ແລະ ໜ້າຢຳເກງ, ຜູ້ຮັກສາພັນທະສັນຍາແຫ່ງຄວາມຮັກຕໍ່ບັນດາຜູ້ທີ່ຮັກພຣະອົງ ແລະ ເຊື່ອຟັງຄຳສັ່ງຂອງພຣະອົງ, 5ພວກຂ້ານ້ອຍໄດ້ເຮັດບາບ ແລະ ເຮັດຜິດ. ພວກຂ້ານ້ອຍໄດ້ເຮັດຊົ່ວ ແລະ ກະບົດຕໍ່ພຣະອົງ; ພວກຂ້ານ້ອຍໄດ້ຫັນໜີໄປຈາກຄຳສັ່ງ ແລະ ກົດເກນຕ່າງໆຂອງພຣະອົງ. 6ພວກຂ້ານ້ອຍບໍ່ໄດ້ເຊື່ອຟັງບັນດາຜູ້ທຳນວາຍຜູ້ຮັບໃຊ້ຂອງພຣະອົງ, ເຊິ່ງໄດ້ເວົ້າໃນນາມຂອງພຣະອົງຕໍ່ບັນດາກະສັດ, ບັນດາເຈົ້ານາຍ ແລະ ບັນດາບັນພະບຸລຸດຂອງພວກຂ້ານ້ອຍ ແລະ ຕໍ່ປະຊາຊົນທັງໝົດຂອງແຜ່ນດິນ.
7“ຂ້າແດ່ອົງພຣະຜູ້ເປັນເຈົ້າ, ພຣະອົງຊອບທຳ ແຕ່ວັນນີ້ພວກຂ້ານ້ອຍຖືກອັບອາຍຂາຍໜ້າ ບໍ່ວ່າຈະເປັນຊາວຢູດາຍ, ຊາວເຢຣູຊາເລັມ ແລະ ຊາວອິດສະຣາເອນທັງໝົດ, ທັງຜູ້ທີ່ຢູ່ໃກ້ ແລະ ໄກໃນປະເທດຕ່າງໆທີ່ພຣະອົງໄດ້ເຮັດໃຫ້ພວກຂ້ານ້ອຍກະຈັດກະຈາຍໄປ ເພາະພວກຂ້ານ້ອຍບໍ່ສັດຊື່ຕໍ່ພຣະອົງ. 8ຂ້າແດ່ພຣະເຈົ້າຢາເວ, ພວກຂ້ານ້ອຍ ແລະ ບັນດາກະສັດຂອງພວກຂ້ານ້ອຍ, ບັນດາເຈົ້ານາຍຂອງພວກຂ້ານ້ອຍ ແລະ ບັນດາບັນພະບຸລຸດຂອງພວກຂ້ານ້ອຍຕ້ອງຖືກອັບອາຍຂາຍໜ້າ, ເພາະພວກຂ້ານ້ອຍໄດ້ເຮັດບາບຕໍ່ພຣະອົງ. 9ຂ້າແດ່ອົງພຣະຜູ້ເປັນເຈົ້າ ພຣະເຈົ້າຂອງພວກຂ້ານ້ອຍແມ່ນເຕັມດ້ວຍຄວາມເມດຕາ ແລະ ໃຫ້ອະໄພ, ເຖິງແມ່ນວ່າພວກຂ້ານ້ອຍໄດ້ກະບົດຕໍ່ພຣະອົງກໍຕາມ. 10ພວກຂ້ານ້ອຍບໍ່ໄດ້ເຊື່ອຟັງພຣະເຈົ້າຢາເວ ພຣະເຈົ້າຂອງພວກຂ້ານ້ອຍ ຫລື ບໍ່ໄດ້ປະຕິບັດຕາມກົດບັນຍັດທີ່ພຣະອົງໄດ້ມອບໃຫ້ຜ່ານທາງບັນດາຜູ້ທຳນວາຍຜູ້ຮັບໃຊ້ຂອງພຣະອົງ. 11ຊາວອິດສະຣາເອນທັງໝົດໄດ້ລ່ວງລະເມີດກົດບັນຍັດຂອງພຣະອົງ ແລະ ໄດ້ຫລົງຕະເຫລີດໄປ, ບໍ່ຍອມເຊື່ອຟັງພຣະອົງ.
“ເຫດສະນັ້ນ ຄຳສາບແຊ່ງ ແລະ ຄໍາສາບານທັງຫລາຍທີ່ມີຂຽນໄວ້ໃນກົດບັນຍັດຂອງໂມເຊຜູ້ຮັບໃຊ້ຂອງພຣະເຈົ້າຈຶ່ງໄດ້ເທລົງມາໃສ່ພວກຂ້ານ້ອຍ, ເພາະພວກຂ້ານ້ອຍໄດ້ເຮັດບາບຕໍ່ພຣະອົງ. 12ພຣະອົງໄດ້ເຮັດຕາມທີ່ໄດ້ກ່າວໄວ້ກັບພວກຂ້ານ້ອຍ ແລະ ບັນດາຜູ້ປົກຄອງຂອງພວກຂ້ານ້ອຍ ໂດຍການນຳເອົາໄພພິບັດໃຫຍ່ມາສູ່ພວກຂ້ານ້ອຍ. ທົ່ວໃຕ້ຟ້າສະຫວັນບໍ່ມີສິ່ງໃດເກີດຂຶ້ນເທົ່າກັບທີ່ເກີດຂຶ້ນກັບເຢຣູຊາເລັມ. 13ໄພພິບັດທັງໝົດນີ້ເກີດຂຶ້ນກັບພວກຂ້ານ້ອຍ, ຕາມທີ່ໄດ້ຂຽນໄວ້ໃນໃນກົດບັນຍັດຂອງໂມເຊ. ແຕ່ເຖິງປານນັ້ນ ພວກຂ້ານ້ອຍກໍບໍ່ໄດ້ສະແຫວງຫາຄວາມເມດຕາຈາກພຣະເຈົ້າຢາເວ ພຣະເຈົ້າຂອງພວກຂ້ານ້ອຍໂດຍຫັນກັບຈາກຄວາມບາບທັງຫລາຍຂອງພວກຂ້ານ້ອຍ ແລະ ບໍ່ໄດ້ສົນໃຈຕໍ່ຄວາມຈິງຂອງພຣະອົງເລີຍ. 14ພຣະເຈົ້າຢາເວບໍ່ໄດ້ລັງເລໃຈທີ່ຈະນຳໄພພິບັດມາສູ່ພວກຂ້ານ້ອຍ, ເພາະພຣະເຈົ້າຢາເວ ພຣະເຈົ້າຂອງພວກຂ້ານ້ອຍນັ້ນຊອບທຳໃນທຸກສິ່ງທີ່ພຣະອົງກະທຳ; ແຕ່ເຖິງປານນັ້ນ ພວກຂ້ານ້ອຍກໍຍັງບໍ່ຍອມເຊື່ອຟັງພຣະອົງ.
15“ບັດນີ້, ຂ້າແດ່ອົງພຣະຜູ້ເປັນເຈົ້າ ພຣະເຈົ້າຂອງພວກຂ້ານ້ອຍ ຜູ້ທີ່ໄດ້ນຳປະຊາຊົນຂອງພຣະອົງອອກມາຈາກເອຢິບດ້ວຍມືອັນຍິ່ງໃຫຍ່ຂອງພຣະອົງ ແລະ ຜູ້ສະຖາປະນານາມຂອງພຣະອົງ ເຊິ່ງຍືນຍົງຈົນເຖິງທຸກວັນນີ້, ພວກຂ້ານ້ອຍໄດ້ເຮັດບາບ ແລະ ພວກຂ້ານ້ອຍໄດ້ເຮັດຜິດໄປແລ້ວ. 16ຂ້າແດ່ອົງພຣະຜູ້ເປັນເຈົ້າ, ເພື່ອໃຫ້ສອດຄ່ອງກັບການກະທຳອັນຊອບທຳທັງໝົດຂອງພຣະອົງ ຂໍໂຜດຫັນຄວາມໃຈຮ້າຍຂອງພຣະອົງ ແລະ ຄວາມໂກດຮ້າຍຂອງພຣະອົງອອກຈາກເຢຣູຊາເລັມ, ເມືອງຂອງພຣະອົງ ແລະ ພູເຂົາສັກສິດຂອງພຣະອົງ. ເພາະຄວາມບາບຂອງພວກຂ້ານ້ອຍ ແລະ ຄວາມຊົ່ວຊ້າຂອງບັນພະບຸລຸດຂອງພວກຂ້ານ້ອຍ ເປັນເຫດໃຫ້ເຢຣູຊາເລັມ ແລະ ປະຊາຊົນຂອງພຣະອົງກາຍເປັນທີ່ຢຽດຢາມຂອງຄົນທັງໝົດທີ່ຢູ່ອ້ອມພວກຂ້ານ້ອຍ.
17“ຂ້າແດ່ພຣະເຈົ້າຂອງພວກຂ້ານ້ອຍ, ບັດນີ້ ຂໍໂຜດຟັງຄຳອະທິຖານ ແລະ ຄໍາອ້ອນວອນຂອງຜູ້ຮັບໃຊ້ຂອງພຣະອົງ. ຂ້າແດ່ອົງພຣະຜູ້ເປັນເຈົ້າ ເພື່ອເຫັນແກ່ພຣະອົງເອງ, ຂໍໂຜດຫລຽວເບິ່ງສະຖານນະມັດສະການອັນຮົກຮ້າງຂອງພຣະອົງດ້ວຍຄວາມກະລຸນາດ້ວຍ. 18ຂ້າແດ່ພຣະເຈົ້າຂອງພວກຂ້ານ້ອຍ, ຂໍໂຜດງ່ຽງຫູຟັງພວກຂ້ານ້ອຍ; ຂໍເປີດຕາຂອງພຣະອົງອອກ ແລະ ເບິ່ງຄວາມຮົກຮ້າງຂອງເມືອງທີ່ໃຊ້ນາມຂອງພຣະອົງ. ພວກຂ້ານ້ອຍອ້ອນວອນຂໍຕໍ່ພຣະອົງ ບໍ່ແມ່ນເພາະພວກຂ້ານ້ອຍເປັນຄົນຊອບທຳ, ແຕ່ເພາະຄວາມເມດຕາອັນຍິ່ງໃຫຍ່ຂອງພຣະອົງ. 19ຂ້າແດ່ອົງພຣະຜູ້ເປັນເຈົ້າ, ຂໍໂຜດຮັບຟັງພວກຂ້ານ້ອຍ! ຂ້າແດ່ອົງພຣະຜູ້ເປັນເຈົ້າ, ຂໍໂຜດອະໄພໃຫ້ພວກຂ້ານ້ອຍ! ຂ້າແດ່ອົງພຣະຜູ້ເປັນເຈົ້າ, ຂໍໂຜດຮັບຟັງພວກຂ້ານ້ອຍ ແລະ ໂຜດຊ່ວຍ! ຂ້າແດ່ພຣະເຈົ້າຂອງຂ້ານ້ອຍ, ເພື່ອເຫັນແກ່ພຣະອົງ, ຂໍໂຜດຢ່າຊັກຊ້າເລີຍ, ເພາະວ່າເມືອງຂອງພຣະອົງ ແລະ ປະຊາຊົນຂອງພຣະອົງໃຊ້ຂອງພຣະອົງ”.
ເຈັດສິບຂອງ “ເຈັດ”
20ໃນຂະນະທີ່ ຂ້າພະເຈົ້າກໍາລັງເວົ້າ ແລະ ອະທິຖານສາລະພາບບາບຂອງຂ້າພະເຈົ້າ ແລະ ບາບຂອງຊາວອິດສະຣາເອນພີ່ນ້ອງຮ່ວມຊາດຂອງຂ້າພະເຈົ້າ ແລະ ອ້ອນວອນພຣະເຈົ້າຢາເວ ພຣະເຈົ້າຂອງຂ້າພະເຈົ້າເພື່ອພູເຂົາສັກສິດຂອງພຣະອົງ 21ໃນຂະນະທີ່ຂ້າພະເຈົ້າຍັງອະທິຖານຢູ່ນັ້ນ, ຄັບຣີເອນ ຜູ້ທີ່ຂ້າພະເຈົ້າເຫັນໃນນິມິດຄັ້ງນັ້ນ, ເຫາະມາຫາຂ້າພະເຈົ້າຢ່າງວ່ອງໄວເປັນເວລາຖວາຍເຄື່ອງບູຊາໃນຕອນແລງ. 22ເພິ່ນໄດ້ແນະນໍາຂ້າພະເຈົ້າ ແລະ ເວົ້າກັບຂ້າພະເຈົ້າວ່າ, “ດານີເອນ, ບັດນີ້ ເຮົາໄດ້ມາເພື່ອໃຫ້ເຈົ້າຮູ້ຢ່າງຈະແຈ້ງ ແລະ ເຂົ້າໃຈ. 23ທັນທີທີ່ເຈົ້າເລີ່ມອະທິຖານ, ພຣະເຈົ້າກໍໃຫ້ຄຳຕອບ ເຊິ່ງເຮົາໄດ້ນຳມາບອກເຈົ້າ ເພາະເຈົ້າເປັນຜູ້ທີ່ພຣະອົງຮັກຫລາຍ. ເຫດສະນັ້ນ ຈົ່ງຕຶກຕອງເບິ່ງຖ້ອຍຄໍາ ແລະ ເຂົ້າໃຈນິມິດນັ້ນດັ່ງນີ້:
24“ເຈັດສິບຂອງ ‘ເຈັດ’#9:24 ຫລື ‘ອາທິດ’ ເຊັ່ນດຽວກັບຂໍ້ 25, 26 ແລະ 27 ໄດ້ກຳນົດໄວ້ສຳລັບພີ່ນ້ອງຮ່ວມຊາດຂອງເຈົ້າ ແລະ ເມືອງສັກສິດຂອງເຈົ້າ ໃຫ້ເຊົາເຮັດການລ່ວງລະເມີດ, ເຊົາເຮັດບາບ, ລຶບລ້າງຄວາມຊົ່ວ ແລະ ນໍາຄວາມຊອບທຳອັນໝັ້ນຄົງຕະຫລອດໄປມາໃຫ້, ເພື່ອປະທັບຕານິມິດ ແລະ ຄຳທຳນວາຍ ແລະ ເພື່ອເຈີມບ່ອນສັກສິດທີ່ສຸດ.#9:24 ຫລື ຜູ້ບໍລິສຸດທີ່ສຸດ
25“ຈົ່ງຮັບຮູ້ ແລະ ເຂົ້າໃຈຂໍ້ນີ້ຄື: ຕັ້ງແຕ່ມີຄຳສັ່ງໃຫ້ກອບກູ້ ແລະ ສ້າງເຢຣູຊາເລັມຂຶ້ນໃໝ່ ຈົນເຖິງຜູ້ພຣະເຈົ້າໄດ້ເຈີມຕັ້ງໃຫ້ເປັນຜູ້ຄອບຄອງນັ້ນຈະມາເຖິງ ຈະມີເຈັດຂອງ ‘ເຈັດ’ ແລະ ຫົກສິບສອງຂອງ ‘ເຈັດ’. ຈະມີການສ້າງຖະໜົນຫົນທາງ ແລະ ຄູເມືອງ, ແຕ່ເຮັດໃນຊ່ວງທຸກຍາກລຳບາກ. 26ຫລັງຈາກຫົກສິບສອງຂອງ ‘ເຈັດ’, ຜູ້ທີ່ພຣະເຈົ້າໄດ້ເຈີມຕັ້ງໄວ້ຈະຖືກຂ້າ ແລະ ຈະບໍ່ເຫລືອຫຍັງ.#9:26 ຫລື ປະຫານ ແລະ ຈະບໍ່ມີຜູ້ໃດ ຫລື ປະຫານແຕ່ບໍ່ແມ່ນສຳລັບພຣະອົງ ປະຊາຊົນຂອງຜູ້ທີ່ຄອບຄອງຈະມາທຳລາຍເມືອງນັ້ນ ແລະ ສະຖານນະມັດສະການ. ວາລະສຸດທ້າຍຈະມາເໝືອນນ້ຳຖ້ວມຄື: ສົງຄາມຈະດໍາເນີນໄປຈົນເຖິງຈຸດຈົບ ແລະ ຈະວິບັດຕາມທີ່ກຳນົດໄວ້. 27ຜູ້ນັ້ນຈະຢືນຢັນຄໍາໝັ້ນສັນຍາກັບຄົນເປັນຈຳນວນຫລວງຫລາຍເປັນເວລາໜຶ່ງຂອງ ‘ເຈັດ’ ແຕ່ກາງຂອງ ‘ເຈັດ’ ນັ້ນ ລາວຈະເຊົາຖວາຍເຄື່ອງບູຊາ ແລະ ຂອງຖວາຍຕ່າງໆ. ແລ້ວຜູ້ທີ່ກໍ່ໃຫ້ເກີດວິບັດຈະຕັ້ງສິ່ງທີ່ໜ້າກຽດຊັງອັນເປັນຕົ້ນເຫດຂອງວິບັດໄວ້ທີ່ດ້ານໜຶ່ງຂອງວິຫານ ເຊິ່ງເປັນເຫດໃຫ້ເກີດຄວາມຮົກຮ້າງ ຈົນເຖິງວາລະສຸດທ້າຍມາເຖິງລາວ#9:27 ຫລື ມັນ ຕາມທີ່ໄດ້ກຳນົດໄວ້”.
اکنون انتخاب شده:
ດານີເອນ 9: LCV
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.