Bɔ bɛ̀rɛbaa nɛ 30
30
Màn gìĩ kɔɔ̃n tã ǹ bǎã
1Dɛnaa Lawa pɛ: «Màn gìĩ kɔɔ̃n tã ǹ bǎã zɛnaa ka kaasia gɔn nɛ. 2A sasabaa goã gùrù yii goon, a pəməbaa goã gùrù yii goon, a gùrùn tumaa die ǹ kɔnpɛ. A wo lon goã gùrù yii paa. A bìbìn nə goã kɔn ka a din ni. 3Sana yoreen yoreen yo n kaa la. N kaa a lalan la, ka a gùrù sii lɛ a gɔ̀nɔn tumaa nɛ, ka a bìbìn ni. N na a lɛkiri zɛnaa ka sana nɛ, n na a lɛnpɛnɛ nɛ. 4Sana kaaranan zɛnaa a lɛkiri lɛ giulun, a paǹan paanan li, n bɛn zɛnaa a wàãn paanan li, màn mɛn bɛ́ toɛ, ǹ na a gũ ǹ bàlàn kɛn wɔ ǹ nɛ. 5Bɛa bàlàn lɛn zɛnaa ka kaasia gɔn nɛ, n sana yo n kaa ǹ la. 6Mɔnaa mɛn bɛ́ *lɛ kɔ kɔn la ǹ goo lɛ siã, n da bɛ lɛ yɔrɔ-a, masɛ bɛ́ re n diɛ n lɛ bǎã mɛn nɛ. 7Aarɔn die a màn gìĩ kɔɔ̃n kɛ tã bɛ la. Baayɛlɛ, baayɛlɛ, bɛ̀ á daa bolonən lɛn zɛnaa, a bɛa màn lɛ tã. 8Bɛ̀ Aarɔn daa bolonən lɛn lɛ sã wasamiɛ̃n doo, a màn lɛ tã. Bɛ n màn lɛa, màn mɛn doamaa bɛ́, a n tã biikoo tumaa li Dɛnaa yɔrɔ-a yǎa duduu. 9Ka baran màn gìĩ kɔɔ̃n tɔrɔ kooro tã la wa, ka baran *wúlu màn tiɛ̃ wole bɔ la wa, ka baran Lawa gɔ ǹ màn da la wa, ka baran yɔ zuməə a ganaa wa. 10Gunyin goon lɛ̀ goon gɔ́ɔ̃ nɛ, Aarɔn die a *gɔ̀ bɔ a ganaa, a na a yoreen kɔ. Bɛ̀ á tɔɔ mɛn dii sii baraan toa ǹ wúlu màn lɛa, a die a bɛ mà lɔ bǎã lɛ a bìbìn kɛn ganaa. Bɛa sii lɛ nə n zɛnaa lɛ̀ woo lɛ̀, yǎa duduu. Màn gìĩ kɔɔ̃n tã ǹ bǎã kɛ lɛ n die goɛ̃ masɛ wɔ lɛa, a n die goɛ̃ bǎã sonbore lɛa.»
Kion sonbore kɛ lɛ a màn-boboe
11Dɛnaa boo da Muizu ni, á pɛ: 12«Bɛ̀ ń Izirayeli nɛnyaanan lɛn nimi, ǹ gogoonmaa na a din nyin giɔ̀mɔ saraa masɛ la, màn mɛn bɛ́ toɛ, sii baraa kɔ́n baran ǹ yɛ minin nimii biikoo lɛ li wa. 13#BBN 38.25-26; MAT 17.24. Min gogoonmaa mɛn doamaa bɛ́ ka nimii ni, didie die a wɔrɔgiala garamu sooro kɔ, a kɔnpɛ ka kion sonbore kɛ a màn-boboe a talɛɛ nɛ. Bɛa wɔrɔgiala kɛ n die n boe masɛ wɔ lɛa. 14Bɛ n Izirayeli nɛnyaan nimii wole gogoonmaa mìi ni, a kũ lɛ̀ fuədɛnaa ganaa, a wo nyɛɛnaa ǹ yaa, didie n bɛ boe Dɛnaa wɔ lɛa. 15Bɛ̀ ǹ tá re bɛa màn lɛ boe Dɛnaa wɔ lɛa, ǹ nyin giɔ̀mɔ lɛa, pàãman wɔ baran kiɛ̃ a lɛ la wa, doobaan dɔn wɔ baran nyaabaa a lɛ ganaa wa. 16Bɛ̀ n bɛa wɔrɔ kɛ lɛ tumaa si Izirayeli nɛnyaanan lɛn la ǹ mɛn waáraa, a saa, a goã kɔn yɛ ǹ kion kɛ lɛ a tamaa ǹ màn lɛa. Masɛ á re n yiri koɛ Izirayeli nɛnyaanan nɛ miɛ̃, ma ǹ nyin tamaa.»
Gɔ̀ bɔ ma-a ǹ doo
17Dɛnaa boo da Muizu ni, á pɛ: 18#BBN 38.8. «Doo kaaraagoon zɛnaa ka zan tã nɛ, a koamala ǹ màn dɔ goã zan tã lɛa. Bɛ zɛnaa a goã mu kũ ǹ màn lɛa, kɔn yɛ ǹ kion lɛ laanka *wúlu bɔ ǹ bǎã kɛ bii ni, n mu kaa a nɛ. 19Aarɔn laanka a nɛgiĩn tá re ǹ gɔnɔn laanka ǹ gòãn pii a nɛ. 20Bɛ̀ ǹ tá re we kɔn yɛ ǹ kion lɛ nɛ, ǹ tá re n zoe ka mu lɛ nɛ, ń giɛ ǹ baran gã wa. Hinlaa bɛ̀ ǹ tá re n mɔrɛ wúlu bɔ ǹ bǎã lɛ ganaa, ǹ nə́ die wúlu màn koe masɛ Dɛnaa la, 21ǹ tá re ǹ gɔnɔn laanka ǹ gòãn pii, ń giɛ ǹ baran gã wa. Bɛ n die goɛ̃ sii lɛa, ǹ doamaa bɛ́ nɛ ǹ sii mɛn zɛnaa, a din ni ka a nɛnyaanan nɛ, yǎa duduu.»
Minin bɔ a koa ǹ nyɔɔ
22 #
BBN 37.29. Dɛnaa boo da Muizu-n doo, á pɛ:
23– Ga nyɔɔn li, ǹ goã nyɔɔ tɔrɔ sonboren lɛa, màn ná a ba ǹ nyɛɛn nyɔɔ lɛa wa. N ga nyɔɔ tɔrɔn kɛn li:
*miíri nyɔɔ gìĩ kɔɔ̃n: bɛa kilo sooro,
sinaamono nyɔɔ gìĩ kɔɔ̃n ke: bɛa kilo paa ka talɛɛ,
buruu nyɔɔ gìĩ kɔɔ̃n kɛ dɔ: bɛa kilo paa ka talɛɛ,
24kaasi nyɔɔ kɛ dɔ: bɛa kilo sooro.
Màn lɛ tumaa zɔɔ̃, a kɔnpɛ ka Kion sonbore kɛ lɛ a màn-boboe kɛ nɛ. Ga *olivie nyɔɔ tàan yii sɔrɔ dɔ li. 25Nyɔɔ dí-nyali sonbore bɛa nyɔɔn kɛn lɛn kaa kun, a ǹ lɔlɔkɔn, ǹ nə n baa nyɔɔ sonbore lɛa, minin bɔ a koa taman yii. 26Ǹ kɔ́n kaa kɔn yɛ ǹ kion lɛ ganaa, ka lɛ kɔ kɔn la ǹ goo kɛ nɛ, 27ka tabala kɛ laanka a màn bisinin tumaa nɛ. A kaa bolon da ǹ bǎã kɛ ganaa ka a màn bisinin ni. Nyɔɔ kɔ́n kaa màn gìĩ kɔɔ̃n tã ǹ bǎã kɛ ganaa, 28ka wúlu màn tã ǹ bǎã kɛ laanka a màn bisinin tumaa nɛ. A kaa doo kaaraakɛ laanka a gũ ǹ màn kɛ ganaa. 29Bɛa mànan kɛn lɛn tumaa koa masɛ wɔn lɛa, ǹ tá re goɛ̃ màn sonbore-sonboren lɛa. Min hinlaa màn mɛn bɛ́ re n loe ǹ ganaa, bɛ á re soɛ̃ màn biɛ. 30Nyɔɔ kaa Aarɔn laanka a nɛgiĩn dɔn ganaa, n nə ǹ bɔ n nə ǹ koa masɛ wɔn lɛa, màn mɛn bɛ́ toɛ, ǹ masɛ a dí nya.
31A pɛ Izirayeli nɛnyaanan man kɛnɛn: «Kɛ n nyɔɔ sonbore lɛa, minin bɔ a koa ǹ wɔ nɛ, masɛ Dɛnaa wɔ nɛ, a n die goɛ̃ bɛa dí kɛ nyɛɛ yǎa duduu. 32Min kooro kɔ́n baran saa, a lɔ a din gɔ̀nɔn ganaa wa. Min dɔ baran ǹ miã tɔrɔ zɛnaa lɛn zɔɔ̃ wa, a giala, nyɔɔ sonbore ne. Ǹ doamaa nɛ, ǹ nə n nyɛnaa bɛa màn kɛ lɛ nɛ. 33Min mɛn bɛ́ re nyɔɔ kɛ lɛ a zɛnaa lɛn zoɛ̃, a lɔ min kooro ganaa, ǹ tá re bɛa dɛnaa boe, ǹ bɔ ǹ dɔɔ̃nɔn bii.»
Màn gìĩ kɔɔ̃n kɛa zɛnaa
34Dɛnaa pɛ Muizu ni: «Ga màn gìĩ kɔɔ̃nɔn li: sitoraksi ni ka oniksi ni, galbanumu gìĩ kɔɔ̃n nɛ, ka da yon gìĩ kɔɔ̃n sonbore ne. N die n toa ǹ tumaa kɔnpɛ. 35N bɛ lɛ tumaa lɔlɔkɔn, ǹ màn gìĩ kɔɔ̃n baa. Nyɔɔ dí-nyalin die ǹ bɛa dí nya doɛ̃, ǹ yìsi kaa li, ǹ toa a yoreen kɔ, a màn sonbore baa. 36Bɛa màn lɔlɔkɔn kɛ lɛ kɔ́n lɔ, a wùsu baa, n wùsu lɛ a boɛɛn da Goo lɛ yɔrɔ-a, kɔn yɛ ka Lawa nɛ ǹ kion lɛ nɛ, ma bɛ́ re n diɛ n lɛ bǎã mɛn nɛ lɛn. Ka die ka toa ka n nyɛnaa bɛa màn kɛ lɛ nɛ. 37Màn gìĩ kɔɔ̃n kɛ lɛ, n nə́ die zɛnɛɛ, min kɔ́n baran ǹ miã zɛnaa a din wɔ lɛa wa. Ka toa ka dɔ̃, mà a n koa nɛ masɛ Dɛnaa dinsɔɔ̃ a lɛa. 38Min mɛn bɛ́ re ǹ miã tɔrɔ zɛnaa lɛn zoɛ̃ a din wɔ lɛa, a na a gìĩ kɔ, ka tá re bɛa dɛnaa boe, ka bɔ ǹ dɔɔ̃nɔn bii.»
اکنون انتخاب شده:
Bɔ bɛ̀rɛbaa nɛ 30: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.