Bɔ bɛ̀rɛbaa nɛ 29
29
Wúlu-bɔlen bɔ a koa
1«N bɛ́ re Aarɔn laanka a nɛgiĩn koɛ lɔn masɛ Lawa wɔn lɛa, ǹ maa dí nya, bɛ á ke: ga dii gɔ̀lɔ̀ ten li ka sère gɔ̀lɔ̀ màn paa nɛ, wɔ̀lɔ̀ ná a ba ǹ ganaa wa. 2Yɔ bùbaã buuru zɛnaa, n kiɔmɔsɔ̃ wùsu yaa ka nyɔɔ nɛ, yɔ bù ná a ba li wa, n da. N mɔ̀mɔ dɔ da ka nyɔɔ nɛ yɔ bù ná a ba li wa. Bɛ tumaa zɛnaa ka buuru wùsu ni. 3Ǹ kaa kankaan nɛ, n da kɔ Lawa la, kun ka dii gɔ̀lɔ̀ ten lɛ laanka sère gɔ̀lɔ̀ màn paa lɛ nɛ. 4N da Aarɔn laanka a nɛgiĩn lɛn nɛ, kɔn yɛ ka Lawa nɛ ǹ Kion lɛ a kiɛnlɛ-a, n nə ǹ zoo mu li. 5N wúlu-bɔlen mɔnaan lɛn goa, n dɔnkɛ kɛ wɔ Aarɔn ganaa ka dɔnkɛ sasa kɛ nɛ, ka dí nya ǹ mɔnaa kɛ nɛ, ka tìãbii zéwo kɛ dɔ nɛ. N dí nya ǹ mɔnaa lɛ a biɛn kɛn pɛnɛ a ganaa. 6N mìi yii ǹ mɔnaa gɔn kɛ da a mìi ganaa, n bɔ n koa Lawa wɔ lɛa ǹ gɛlɛ da mìi yii ǹ mɔnaa lɛ ganaa. 7Bɛ kio, n min koa Lawa wɔ lɛa ǹ nyɔɔ kɛ saa, n kaa a mìi ni, n koa masɛ Lawa wɔ lɛa.
8«Da ka Aarɔn a nɛgiĩn lɛn dɔn nɛ, n mɔnaa wɔ ǹ ganaa. 9N binbin yii ǹ màn yii ǹ bɔsɔ̃-n, n bafolon wɔ ǹ mìin ganaa kəni. Wúlu bɔ ǹ dí lɛ nə ǹ dinin wɔ lɛa, a kɔnpɛ ka sii yɔrɔ bɔ kɛ nɛ. Bɛ ba n bɔyɛɛ doo duduu wa. Bɛa sii kɛ lɛ n die wúlu bɔ ǹ dí lɛ koe Aarɔn laanka a nɛnyaanan la.
10«Da ka dii gɔ̀lɔ̀ ten lɛ nɛ kɔn yɛ ka Lawa nɛ ǹ kion lɛ a kiɛnlɛ-a. Aarɔn laanka a nɛgiĩn nə n gɔn da a mìi ni. 11N dii gɔ̀lɔ̀ lɛ bɔlɔ kuru Dɛnaa yɔrɔ-a, kɔn yɛ ka Lawa nɛ ǹ kion lɛ a kiɛnlɛ-a. 12Dii lɛ mà bɔ ka n gòon ne, n da *wúlu bɔ ǹ bǎã lɛ a bìbìn ganaa. Bɛ kio, a mà gialakun kɛ lɛ tumaa kaa wúlu bɔ ǹ bǎã lɛ giala ganaa. 13Nyɔɔ mɛn bɛ́ tɔɔ lɛ gɔ́ɔ̃ nɛ, a nànan lɛnpɛnɛ, n bɛ bɔ, ka a foo ne, ka a dɔ̀ɔ̃ koron màn paa kɛ nɛ, ka nyɔɔ mɛn bɛ́ ǹ ganaa, n tã wúlu bɔ ǹ bǎã lɛ nɛ. 14Sɛnɛ, dii siĩ lɛ sɛ, a ki ni, ka a bù ni, n soo ka bɛn nɛ, n nə bɔ kaa giã ǹ bǎã nɛ, n wo ǹ tã kaa bǎã lɛ kio. Bɛn man die goɛ̃ wúlu mànan lɛa, màn mɛn bɛ́ toɛ, wúlu-bɔlen lɛn sii baraan nə n toa ǹ nɛ.
15«Bɛ kio, n sère gɔ̀lɔ̀ bibinaa kɛ kũ, Aarɔn laanka a nɛgiĩn nə n gɔn da a mìi ni. 16N sère lɛ bɔlɔ kuru, n na a mà bɔ n pɛsɛ̃ wúlu bɔ ǹ bǎã lɛ tumaa ganaa. 17Tɔɔ lɛ kukuru kɔn, n na a nànan laanka a gòãn pii, n nə ǹ kaa wúlu bɔ ǹ bǎã lɛ la, siĩ kukurii lɛ laanka a mìi lɛ lalan. 18#EFƐ 5.2; FILI 4.18. N sère gɔ̀lɔ̀ lɛ tumaa tã wúlu bɔ ǹ bǎã lɛ nɛ, a goã *wúlu màn tiɛ̃ lɛa Dɛnaa wɔ lɛa. Wúlu màn tiɛ̃ wole ne, a gìĩ n kɔɔ̃n masɛ Dɛnaa ganaa.
19«Bɛ kio doo, n sère gɔ̀lɔ̀ lɛ a paabaa ǹ wɔ kɛ kũ, Aarɔn laanka a nɛgiĩn nə n gɔn da a mìi ni. 20N sère gɔ̀lɔ̀ lɛ bɔlɔ kuru, n na a mà bɔ, n da Aarɔn gusin a too lɛwɔn ganaa, n da a nɛgiĩn lɛn dɔn too lɛwɔnɔn ganaa. N da ǹ gusin a gɔn a gòon mìi gole ganaa, ka ǹ gusin a gòã wɔ nɛ. N mà lɛ gialakun pɛsɛ̃ wúlu bɔ ǹ bǎã lɛ gɔ̀nɔn tumaa ganaa. 21N mà kɛ saa wúlu bɔ ǹ bǎã lɛ la, ka min koa Lawa wɔ lɛa ǹ nyɔɔ lɛ nɛ, n nə ǹ pɛpɛsɛ̃ Aarɔn ganaa, ka a mɔnaan nɛ. N pɛpɛsɛ̃ a nɛgiĩn lɛn dɔn ganaa ka ǹ mɔnaan nɛ. Bɛa yɔrɔ kɛ la, ǹ tá re masɛ wɔn biɛ: Aarɔn nɛ ka a mɔnaan nɛ, a nɛgiĩn ni ka ǹ mɔnaan nɛ.
22«Sère gɔ̀lɔ̀ lɛ a nyɔɔ kɔ ǹ bǎã saa, a mui gòã nɛ, a nyɔɔ kɛ nɛ a nànan lɛnpɛnɛ, a foo ne, ka a dɔ̀ɔ̃ koron màn paa kɛ laanka nyɔɔ mɛn bɛ́ doa nɛ ǹ ganaa, ka a gusin a nyàa dɔ nɛ. Sère paabaa ǹ wɔ lɛ a dɛ n wúlu-bɔlen lɛn bɔ a koa ǹ sii nyɛɛ. 23Bɛ kio kəni, ga buuru kankaan kɛ lɛ nɛ masɛ Dɛnaa yɔrɔ-a, n buuru luurii bɔ, ka kiɔmɔsɔ̃ nyɔɔnaa nɛ, ka mɔ̀mɔ nyɔɔnaa nɛ. 24N bɛ lɛ din tumaa kaa Aarɔn gɔn, ka a nɛgiĩn ni, n pɛ ǹ nɛ mà ǹ kɔ masɛ la, a kɔnpɛ ka a zɛnaa ǹ gɔn nɛ masɛ din Dɛnaa yɔrɔ-a. 25N wusoo n bɔ ǹ gɔnɔn nɛ, n tã wúlu bɔ ǹ bǎã lɛ nɛ, kun ka wúlu màn tiɛ̃ wole kɛ nɛ, ǹ gìĩ kɔɔ̃n kɔ masɛ din Dɛnaa ganaa. Wúlu màn tiɛ̃ wole ne, a gìĩ á kɔɔ̃n masɛ din Dɛnaa ganaa.
26«Sère paabaa ǹ wɔ kɛ lɛ, Aarɔn koa a dí lɛ la ǹ wúlu màn lɛa, n bɛ lɛ tìãbii saa, n din kɔ masɛ la, a kɔnpɛ ka a zɛnaa ǹ gɔn kɛ nɛ masɛ din Dɛnaa yɔrɔ-a. Bɛ lɛ n die n wɔ gii biɛ. 27N tìãbii mɛn kɔ masɛ la, ka nyàa mɛn bɛ́ ń bɔ Aarɔn laanka a nɛgiĩn koa ǹ sère lɛ ganaa, bɛn lɛn man masɛ wɔn lɛa. 28Bɛ a re sàabiɛ doo wa. Izirayeli nɛnyaanan doamaa nɛ, ǹ bɛa paǹan kɛn lɛn bɔ. Ǹ nə́ ǹ bɔ bii kɔɔ̃n kɔ kɔn ka Lawa nɛ ǹ wúlu mànan lɛa, ǹ nə́ ǹ bɔ ǹ nə́ ǹ kɔ Aarɔn laanka a nɛgiĩn la. Màn boe ne ǹ tá re koe Dɛnaa la.
29«Aarɔn a gɛ̀ kio, a mɔnaa sonboren lɛn man doe a nɛnyaanan ganaa. Ǹ dɔn manə ǹ we, ǹ dí laanka ǹ bɔ a koa kɛ wɔn lɛa. 30Lɛawaa sɔbaa gɔ́ɔ̃ nɛ, wúlu-bɔle mɛn bɛ́ re koɛ Aarɔn la, a ná a din a nɛgiĩ goon lɛa, bɛ nə ǹ we, a wɔ kɔn yɛ ka Lawa nɛ ǹ Kion kɛ nɛ, a dí nya Lawa nɛ bǎã sonbore kɛ nɛ.
31«Aarɔn koa ǹ sère gɔ̀lɔ̀ kɛ lɛ saa, n na a siĩ kɔrɛ bǎã sonbore kɔ́n nɛ. 32Aarɔn laanka a nɛgiĩn man soɛ̃, kɔn yɛ ka Lawa nɛ ǹ kion lɛ a kiɛnlɛ-a, sère gɔ̀lɔ̀ siĩ lɛ nɛ, ka buuru kɛ nɛ kankaan nɛ. 33Ǹ dininsɔɔ̃nɔn man bɛa mànan kɛn lɛn soɛ̃, mànan mɛnɛn nə n zɛnaa, ǹ dinin bɔ a koa laanka ǹ dí kɔmala ǹ mànan lɛa, màn mɛn bɛ́ toɛ, Lawa nə ǹ sãn toa ǹ nɛ. Min kooro kɔ́n ba bɛa màn kɛ lɛ we a lɛ-n wa, a giala, màn sonbore ne. 34Bɛ̀ dí kɔmala ǹ siĩ kɛ lɛ kɔ́n goã baayɛlɛ, ka buuru kɛ dɔ nɛ, n na a tumaa tã tɛ-n. Min baran sɔ̃ wa, a giala, màn sonbore ne.
35«A zɛnaa miɛ̃ Aarɔn laanka a nɛgiĩn lɛn manɛ, a kɔnpɛ ka boo kɛ lɛ din tumaa nɛ masɛ pɛ nɛ. Lɛawaa sɔbaa gɔ́ɔ̃ nɛ, Aarɔn laanka a nɛgiĩn lɛn koa kɛa siin zɛnaa. 36Baraabaraa, dii gɔ̀lɔ̀ dɛ ga sii baraan toa li ǹ wúlu màn lɛa. N *gɔ̀ bɔ wúlu bɔ ǹ bǎã lɛ ganaa miɛ̃. Bɛ kio, n nyɔɔ kaa a ganaa, n kɔ Lawa la. 37Bɛ dɔ a siin zɛnaa doamaa nɛ, ǹ belebɔ yǎa lɛawaa sɔbaa. Bɛ tumaa kio kəni, wúlu bɔ ǹ bǎã lɛ á re goɛ̃ bǎã sonbore sonbore lɛa, min hinlaa màn mɛn bɛ́ re n loe a ganaa, bɛ á re soɛ̃ màn biɛ.
Baraabaraa a wúlu màn tiɛ̃ màn paa
38«Ǹ bɛ́ re màn mɛn zɛnɛɛ wúlu bɔ ǹ bǎã lɛ la doo, bɛ dɔ á ke: Ǹ lɛ̀ goon sère nɛ màn paa dɛ baraabaraa yǎa duduu. 39Sère nɛ bibinaa ke, ǹ bɛ dɛ baayɛlɛ, a paabaa ǹ wɔ ke, ǹ bɛ dɛ wasamiɛ̃nɛ. 40-41Baayɛlɛ wɔ a sère nɛ lɛ laanka wasamiɛ̃n wɔ lɛ nɛ, bɛ̀ ǹ tá bɛn dii, maǹ dii ka wùsu kilo sɔɔ nɛ, ǹ yia ka nyɔɔ tàan yii goon ka talɛɛ nɛ, maǹ dii ka yɔ paan yii goon ka talɛɛ dɔ nɛ. Bɛa wúlu mànan kɛn lɛn gìĩ á kɔɔ̃n masɛ Dɛnaa ganaa. 42Bɛ lɛ n die wúlu màn tiɛ̃ lɛ biɛ, ka doamaa bɛ́ ka ǹ mɛn bɔ biikoo tumaa li, lɛ̀ woo lɛ̀. Ka bɔ Dɛnaa yɔrɔ-a, kɔn yɛ ǹ kion kɛ lɛ a kiɛnlɛ-a, masɛ bɛ́ re n diɛ ka lɛ bǎã mɛn nɛ lɛn, ma boo da n nɛ.
43«Man die n diɛ Izirayeli nɛnyaanan lɛ bǎã kɛ lɛ nɛ, ma din bɔ, má maa gugurubaa koa a nɛ. 44Kɔn yɛ ǹ kion lɛ laanka wúlu bɔ ǹ bǎã lɛ n masɛ din wɔn lɛa. Aarɔn dɔ laanka a nɛgiĩn man masɛ din wɔn lɛa, màn mɛn bɛ́ toɛ, ǹ dí nya masɛ din ni. 45Masɛ n die goɛ̃ Izirayeli nɛnyaanan bii, ma goã Lawa lɛa ǹ yii li. 46Ǹ tá re doɛ̃, mà masɛ din lɛ n Dɛnaa lɛa, ǹ mɛn lɛ bɛ́ ǹ Lawa lɛa. Ma din mɛn bɛ́ má soo ǹ ne, má ǹ bɔ Ezipti gána nɛ, má giã kunu ǹ ni. Ma din lɛ n Dɛnaa lɛa, ǹ mɛn lɛ bɛ́ ǹ Lawa lɛa.»
اکنون انتخاب شده:
Bɔ bɛ̀rɛbaa nɛ 29: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.