Bɔ bɛ̀rɛbaa nɛ 27
27
Wúlu bɔ ǹ bǎã
1«Bɛ kio, n *wúlu bɔ ǹ bǎã lɛ zɛnaa ka kaasia gɔn nɛ. A sasabaa goã gùrù yii sooro, a pəməbaa goã gùrù yii sooro. A gùrùn tumaa doamaa nɛ ǹ goã goon. A wo lon goã gùrù yii sɔɔ. 2N bìbìn dɔ a gùrùn wɔkɔnlɛ ǹ bǎã sii kɛ tumaa ganaa, ǹ goã doa-n kɔn ka wúlu bɔ ǹ bǎã lɛ nɛ, n zan tã kaa la. 3N bǎã lɛ a ton kaa ǹ tasanan zɛnaa ka zan tã nɛ, ka a ton goa ǹ lasan nɛ, ka a mà pɛsɛ̃ ǹ tàanan nɛ, a siĩ fɔ̃ ǹ bàlàn nɛ, ka tɛ nàn kaa ǹ mànan nɛ. 4N tɛ nàn kaamala ǹ tɛmɛ zɛnaa ka zan tã nɛ, ka zan tã kaaran nɛ a lɛkoro sii lɛ a gogoonmaa ganaa. 5N bɛa tɛmɛ kɛ lɛ koa wúlu bɔ ǹ bǎã lɛ a tán laanka a lon bii ni, a lɛkiri giulun. 6N bàlàn zɛnaa bǎã lɛ wɔn lɛa ka kaasia gɔn nɛ, n zan tã kaa ǹ la. 7Ka bɛa bàlàn kɛn lɛn wɔ kaaranan lɛn nɛ. Bàlàn lɛn man die goɛ̃ wúlu bɔ ǹ bǎã lɛ wàãn paanan li, bɛ̀ ǹ gũ ni. 8Bɛa wúlu bɔ ǹ bǎã kɛ lɛ, a n die zɛnɛɛ ka gɔn sɛlɛɛn nɛ, a gɔ́ɔ̃ n die goɛ̃ koo. N toa n zɛnaa, ka ma bɛ́ ma a yɔrɔ nyaa n nɛ lɔn kele lɛ la.
Sumu lɛ a dɔ ǹ mànan
9«Bɛ kio kəni, n Kion lɛ a sumu dɔ ka mɔnaa guguru sonbore ne. Gusin a lɛ̀gɔn la, mɔnaa lɛ a sasabaa goã gùrù yii paabiɛ. 10A doa ǹ bàlàn man die goɛ̃ fuə, ǹ giãmala ǹ mànan dɔn man die goɛ̃ fuə, ǹ tumaa n zɛnaa-n ka zan tã nɛ. Doa ǹ bàlàn lɛn karan laanka ǹ mɔnaan lɔɔ ǹ bàlàn kɛn man die goɛ̃ wɔrɔgiala lɛa. 11A din goon ne gɔsɛ a lɛ̀gɔn paǹ kɛ dɔ li: A sasabaa lɛ li, mɔnaa goã a wo dɔ gùrù yii paabiɛ, ka a doa ǹ bàlà fuə ne, ka ǹ giãmala ǹ màn fuə ne, ǹ tumaa n zan tã lɛa. Ǹ doa ǹ bàlàn lɛn sɛn karan kɛn laanka ǹ mɔnaan lɔɔ ǹ bàlàn kɛn nə goã wɔrɔgiala lɛa. 12Sumu lɛ a pəməbaa sɛ, dia-n woe lɛ̀nyɛɛn la, mɔnaa lɛ dɔ gùrù yii posooro, a doa ǹ bàlàn nə goã fù ka giãmala ǹ màn fù ni. 13Sumu lɛ a pəməbaa ke, dia-n woe lɛ̀giala la, bɛ goã gùrù yii posooro. 14Kiɛnlɛ lɛ para goon li, mɔnaa lɛ goã gùrù yii fulusooro, ka doa ǹ bàlà sɔɔ nɛ, ka ǹ giãmala ǹ màn sɔɔ nɛ. 15A para goon kɛ dɔ li, mɔnaa gùrù yii fulusooro doo, ka a doa ǹ bàlà sɔɔ nɛ, ka ǹ giãmala ǹ màn sɔɔ nɛ. 16Mɔnaa goã koe-n sumu lɛ a kiɛnlɛ lɛ, mɔnaa dí-nyali sonboren na a dí nya. A goã gùrù yii fuə, a goã mɔnaa guguru sonbore lɛa, foɛ̃-n ka gɛ̀sɛ korebore ne, ka a tã nɛ, ka a tã zenzen ne. A doa ǹ bàlà goã sii ka ǹ giãmala ǹ màn sii ni. 17Mɔnaan lɔɔ ǹ bàlàn mɛnɛn bɛ́ zɛnaa-n ka wɔrɔgiala nɛ, bɛn man die sumu lɛ a doa ǹ bàlàn kɛn tumaa doɛ kɔn. Bàlàn lɛn karan man goɛ̃ wɔrɔgiala lɛa, ǹ giãmala ǹ mànan nə́ zan tã lɛa. 18Sumu lɛ a sasabaa n gùrù yii paabiɛ, wàã goon wɔ lɛa, a pəməbaa n gùrù yii posooro, wàã goon wɔ lɛ a. A wo lon nə goã gùrù yii sooro, a mɔnaa n zɛnaa-n ka mɔnaa guguru sonbore ne. A bàlàn kɛn giãmala ǹ mànan man zan tã lɛa. 19Kion lɛ a màn bisinin tumaa, ǹ bɛ́ re a dí nyɛɛ ka ǹ mɛnɛn nɛ, ǹ kiɛn mɛnɛn zumu Mɔnaa Kion lɛ nɛ, ka a sumu wɔn nɛ, bɛn tumaa na á goã zan tã lɛa.»
Bolon lɛ a nyɔɔ
20Lawa pɛ: «A pɛ Izirayeli nɛnyaanan lɛn manɛ, mà ǹ ga *olivie nyɔɔ li bolon lɛ wɔ lɛa. Nyɔɔ siĩn sonbore, màn mɛn bɛ́ toɛ, bolonən lɛn nə goã kuĩ miɛ̃. 21Kɔn yɛ ka Lawa nɛ ǹ Kion kɛ lɛ nɛ, mɔnaa kɛ lɛ goo lɛ siã, a kũ bɛ lɛ yɔrɔ-a miɛ̃, a ná a ba nimi wa. Aarɔn laanka a nɛgiĩn doamaa nɛ, ǹ na a sii yɔrɔ bɔ, a boo la a kũ Dɛnaa yɔrɔ-a tèlò-n a wo lɛawaa yaa. Mà bɛ n sii lɛa, Izirayeli nɛnyaanan doamaa bɛ́, ǹ màn mɛn zɛnaa lɛ̀ woo lɛ̀, a ná a ba sàabiɛ wa.»
اکنون انتخاب شده:
Bɔ bɛ̀rɛbaa nɛ 27: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.