Bɔ bɛ̀rɛbaa nɛ 26
26
Kion sonbore
1«Kion sonbore kɛ sɛ, bɛa dí-nyalin doamaa nɛ, ǹ zɛnaa ka mɔnaa gɔn fù ni, zɛnaa-n ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne, ǹ lon màn yiikoonaan nyínin zɛnaa ǹ ganaa nyaǹan lɛa. 2Mɔnaa gɔnɔn lɛn tumaa a sasabaa goã gùrù yii fuəwenkiwisi, ǹ pəməbaa goã gùrù yii sii. Ǹ tumaa a zɔɔ̃ goã goon. 3Ka mɔnaa gɔnɔn lɛn sooro nimi, ka ǹ kaa kun. Sooro kɔsɔ kɛ dɔ, ka bɛn dɔn nimi, ka ǹ kaa kun. 4Gɛ̀sɛ koreboredɛnaa dɔ mɔnaa gɔn bibinaa sooro kɛ lɛ, ka nimi kɔn lɛkoro ganaa. Kɔsɔ dɔ dɔ mɔnaa gɔnɔn nimi kɔn goon kɛ lɛ a mɔnaa gɔn nyɔɔbaa kɛ lɛ. 5Gɛ̀sɛ pɛnɛ kɔn posooro dɔ mɔnaa gɔn bibinaa lɛ lɛ, n posooro dɔ mɔnaa gɔnɔn nimi kɔn paabaa ǹ wɔ kɛ lɛ dɔ a mɔnaa gɔn nyɔɔbaa kɛ lɛ. N toa gɛ̀sɛn lɛn nə goã kɔn a peperebaa li. 6Kara posooro zɛnaa ka sana nɛ, n mɔnaa gɔnɔn lɛn doa kɔn ka bɛa karan kɛn lɛn nɛ, mɔnaa kion lɛ goã kɔn.
7«Bɛ kio, n bòe ka mɔnaa gɔnɔn zɛnaa, bɛn nə boo la ǹ goã Kion lɛ a kala lɛa. A zɛnaa mɔnaa gɔn fulugoon. 8Ǹ sasabaa goã gùrù yii pɔsɔɔ, ǹ pəməbaa goã gùrù yii sii. Ǹ fulugoonmaa lɛ tumaa a zɔɔ̃ goã goon. 9Mɔnaa gɔnɔn lɛn sooro nimi kɔn, n sɔrɔ kɛ dɔ nimi kɔn. N sɔrɔbaa ǹ wɔ kɛ yiɛ n kaa mɔnaa kion lɛ nyɛɛnaa ǹ kɛ la. 10Gɛ̀sɛ pɛnɛ kɔn posooro dɔ mɔnaa gɔn bibinaa kɛ lɛ, mɔnaa gɔnɔn nimi kɔn wɔ a nyɔɔbaa kɛ lɛ. Mɔnaa gɔnɔn nimi kɔn paabaa ǹ wɔ a nyɔɔbaa kɛ lɛ dɔ, n gɛ̀sɛ pɛnɛ kɔn posooro dɔ bɛ dɔ lɛ. 11Kara posooro zɛnaa ka zan tã nɛ. N bɛa karan kɛn lɛn wɔ gɛ̀sɛ pɛnɛ kɔn-an lɛn nɛ, n mɔnaa kion lɛ kũ ni, a goã kɔn. 12Mɔnaa kion lɛ a mɔnaa gɔnɔn lɛn tá re sɔsɔrɔ koe ǹ kiɛ̃, ǹ gialakun nə gisĩ ǹ kaa ǹ dinin li. Ǹ lɛkoro a kiɛ̃ kɔn la tá re kiɛ kion lɛ kio wɔlɔ li. 13Mɔnaa gɔnɔn lɛn sɔsɔrɔbaa dɔ li, gùrù yii goon tá re kiɛ̃ a paǹan paanan li, bɛn tá re gisĩ ǹ kaa Kion lɛ paǹan li, ǹ nə́ n kɔ kion lɛ lɛ. 14Mɔnaa Kion lɛ a kɔmalɛ ǹ wɔ zɛnaa ka sère gɔ̀lɔ̀n ki ni, n wɔ màn tã li. A kɔmalɛ ǹ wɔ kɔsɔ dɔ zɛnaa ka don siĩ ki kəkə ne, bɛ goã a lalan.
15«Kion lɛ a doa ǹ bàlàn zɛnaa ka kaasia gɔnɔn nɛ. N nə ǹ zumu, bɛn nə Kion lɛ kũ ǹ golee-n lon. 16Kion lɛ a doa ǹ bàlà gogoonmaa a sasabaa goã gùrù yii fù, a pəməbaa goã gùrù yii goon ka talɛɛ. 17Kion doa ǹ bàlàn lɛn tumaa goã goon. Wɔkɔnlɛ ǹ lɛ màn paa goã ǹ gogoonmaa ganaa, ǹ nə ǹ kaa kɔn para li. 18N bɛa Kion doa ǹ bàlàn kɛn lɛn fuə zɛnaa kion lɛ a gusin a lɛ̀gɔn la paǹ ganaa. 19N giãmala ǹ màn pusi zɛnaa ka wɔrɔgiala nɛ bɛa Kion doa ǹ bàlà fuə lɛ giulun: giãmala ǹ màn màn papaa bàlà gogoonmaa giulun, ǹ wɔkɔnlɛ ǹ lɛ màn paa lɛ a lɛa. 20Kion lɛ a paǹ goon kɛ li, dia-n woe gɔsɛ a lɛ̀gɔn la, doa ǹ bàlà fuə goã, 21ka ǹ giãmala ǹ màn pusi kɛ nɛ, zɛnaa-n ka wɔrɔgiala nɛ. Giãmala ǹ màn màn papaa goã bàlà gogoonmaa giulun. 22Kion lɛ gɔ́ɔ̃ wɔ a paǹ ke, dia-n woe lɛ̀nyɛɛn la, n doa ǹ bàlà sɔrɔ zɛnaa bɛ wɔ lɛa. 23N bàlà màn paa dɔ zɛnaa a tɔ-a, kion gɔ́ɔ̃ gùrù wɔkɔnlɛ ǹ wɔn lɛa. 24Bɛa bàlà màn paa kɛ giala n die goɛ̃ boe-n kɔn sɔnbɔraanɛ. Sɛnɛ, ǹ lɛwɔn wo n wɔ kɔn lɛ lon kaaran bibinaa kɛ nɛ. Bɛn màn paa kɛ wɔ n die n biɛ miɛ̃, maǹ die goɛ̃ ka doa ǹ bàlà kakan bɛ́ lɔn. 25Doa ǹ bàlà kiwisi n die goɛ̃ kəni, ka ǹ giãmala ǹ mànan kɛn nɛ, zɛnaa-n ka wɔrɔgiala nɛ. Giãmala ǹ màn fulusɔrɔ n die goɛ̃, màn papaa n bàlà gogoonmaa giulun.
26«Bɛ kio, n kerekaã ǹ bàlàn zɛnaa ka kaasia gɔn nɛ. Sooro goã kion lɛ a paǹ bibinaa kɛa doa ǹ bàlàn wɔn lɛa. 27Sooro goã kion lɛ a paǹ paabaa ǹ wɔ kɛa doa ǹ bàlàn wɔn lɛa, sooro dɔ goã kion gɔ́ɔ̃ lɛa paǹ kɛ wɔn lɛa, paǹ mɛn bɛ́ dia-n woe lɛ̀nyɛɛn la. 28Kerekaã ǹ bàlà kɛ goã kion doa ǹ bàlàn lɛn lon laanka tán bii ni. Ǹ zɛnaa miɛ̃, n bɔ kion lɛ lɛ goon ganaa, a wo goon yaa. 29N sana kaa doa ǹ bàlàn lɛn la, n nə ǹ kaaranan zɛnaa ka sana nɛ, n bii wɔ a kerekaã ǹ bàlàn lɛn wɔ bɛn nɛ, n sana kaa bɛa kerekaã ǹ bàlàn lɛn dɔn la. 30Màn mɛn nə n pɛ n nɛ kele lɛ la, Kion lɛ dɔ, a kɔnpɛ ka bɛ lɛ nɛ.
31«Bɛ kio, n mɔnaa zɛnaa ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne. Ka lon màn yiikoonaan nyínin zɛnaa a ganaa nyaǹan lɛa. 32Bɛa mɔnaa lɛ lɔɔ kaasia bàlà sii ganaa, sana n kaa nɛ ǹ la, karan nə́ ǹ ganaa sana lɛa, ǹ nə́ doa-n giãmala ǹ màn sii la, zɛnaa-n ka wɔrɔgiala nɛ. 33#EBR 6.19; 9.3-5. Mɔnaa lɛ da karanan lɛn giulun.
«Mɔnaa lɛ kio kəni, *lɛ kɔ kɔn la ǹ goo lɛ da walan. Bɛa mɔnaa kɛ lɛ n die bǎã sonbore kɛ laanka bǎã sonbore sonbore kɛa na kɔn-a ǹ wɔ biɛ. 34Goo lɛ a lɛpii kɔ lɛ, bǎã sonbore sonbore lɛ nɛ, 35n tabala lɛ da bǎã sonbore kɛ nɛ, n bolon da ǹ bǎã lɛ dɔ da tabala lɛ yɔrɔ-a. Bolon da ǹ bǎã lɛ goã Kion lɛ a gusin a gùrù ganaa, tabala lɛ sɛ ná a gɔsɛ wɔ ganaa.
36«Bɛ kio mɔnaa dí-nyali sonboren nə mɔnaa zɛnaa Kion lɛ a kiɛnlɛ wɔ lɛa. Ǹ zɛnaa ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne. 37Bàlà sooro zɛnaa ka kaasia gɔn nɛ. Bɛa mɔnaa kɛ lɛ wɔ lɛa, n sana kaa ǹ la, ǹ karan nə goã sana lɛa, n giãmala ǹ bǎã sooro zɛnaa ǹ wɔn lɛa ka zan tã nɛ.
اکنون انتخاب شده:
Bɔ bɛ̀rɛbaa nɛ 26: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.