Bɔ bɛ̀rɛbaa nɛ 25
25
Lawa guguru kɔ ǹ bǎã lɛ a dɔ ǹ gɔn
(25.1—31.18)
Izirayeli nɛnyaanan màn boboe
1Dɛnaa pɛ-n doo: 2«A pɛ Izirayeli nɛnyaanan manɛ ǹ mànan bobo masɛ Lawa wɔ lɛa. Min mɛnɛn tumaa bɛ́ boe la, ǹ bɛa sii kɛ lɛ zɛnaa ka foo sonbore ne, ka màn si bɛn la. 3Ka bɛ́ re mànan mɛnɛn sii ǹ la, ǹ goã sana lɛa, wɔrɔgiala nɛ ka zan tã nɛ. 4Ka kɛn dɔn si. Gɛ̀sɛ korebore ne, a tã nɛ, a tã zenzen ne, mɔnaa guguru sonboren ne, ka bòe ka mɔnaan nɛ, 5ka sère kin ni, ǹ nə́ ǹ yii tã kɔ, ka ki kəkə tɔrɔn nɛ. Ka gɔn dɔ si, a n boe da kɛ nɛ a tɔ n kaasia. 6Ka bolon da ǹ nyɔɔ si, ka nyɔɔ gìĩ kɔɔ̃nɔn nɛ, lɔ minin ganaa ǹ wɔ lɛa, ka a tã ǹ wɔ nɛ. 7Ka kɔlɔ sonboren dɔn si, ǹ tɛnɛn nə goã wúlu-bɔlen kiã a dí nya ǹ mɔnaa kɛ paǹ tɛn zɛnaa ǹ kɔlɔn lɛa, ka tìãbii zéwo kɛ nɛ. 8Izirayeli nɛnyaanan lɛn tá re ma guguru kɔ ǹ bǎã zɛnɛɛ, ma á re goɛ̃ ǹ bii. 9Mɔnaa kion sonbore lɛ zɛnaa, ka màn sonboren kɛn tumaa nɛ, a kɔnpɛ ka sii yɔrɔ-bɔn kɛn nɛ, má n die nyɛɛ ka nɛ.
Lɛ kɔ kɔn la ǹ goo
10«A pɛ Izirayeli nyɛnyaanan lɛn nɛ, ǹ goo zɛnaa ka kaasia gɔn nɛ. A sasabaa goã gùrù yii paa ka talɛɛ, a pəməbaa goã gùrù yii goon ka talɛɛ, a wo lon dɔ goã gùrù yii goon ka talɛɛ. 11N sana yoreen yoreen kaa la, n kaa a gɔ́ɔ̃ la, n kaa a kanaa la, n sana dɔ a lɛkoro ganaa, n na a lɛnpɛnɛ nɛ. 12N sana kaaran màn sii zɛnaa goo lɛ wɔn lɛa, n nə ǹ doa a gòã sii kɛ ganaa. A màn paa goã paǹ goon ganaa, a màn paa dɔ goã paǹ goon kɛ dɔ ganaa. 13Bàlàn zɛnaa ka kaasia gɔn nɛ, n sana kaa ǹ la. 14Bɛa bàlàn kɛn lɛn wɔ goo lɛ a paǹan li ǹ kaaran yalan kɛn nɛ, ǹ goã goo lɛ a gũ ǹ bàlàn lɛa. 15Bàlàn lɛn man goɛ̃ goo lɛ a kaaran yalan kɛn lɛn nɛ, min ba ǹ boe wa. 16Ma bɛ́ re dí-pɛn mɛnɛn koe n la ke, n bɛn koa goo lɛ gɔ́ɔ̃ nɛ.
17 #
EBR 9.5. «Bɛ kio, n goo lɛ a lɛpii zɛnaa ka sana yoreen yoreen ne. A sasabaa goã gùrù yii paa ka talɛɛ, a pəməbaa goã guru yii goon ka talɛɛ. 18N sana dɛ, n lon màn yiikoonaa nyín màn paa zɛnaa nɛ, n nə ǹ zɛnaa n nə ǹ doa Goo lɛpii lɛ a lɛkoron paanan ganaa. 19Goon zɛnaa a lɛkoro goon ganaa, n goon kɛ dɔ zɛnaa a lɛkoro goon kɛ dɔ ganaa. Lon mànan nyínin lɛn zɛnaa, n nə ǹ doa kɔn ka lɛpii lɛ nɛ, gogoon ná a lɛkoron paanan ganaa. 20Lon mànan nyínin lɛn nə n nyàan lɛ bɔ, ǹ nə ǹ dia lon, ǹ nə n nyàa kan kɔ goo lɛpii lɛ lɛ. Ǹ yɔrɔ goã dia-n kɔn la, bɛ̀ ǹ nə́ giɛ Goo lɛpii lɛ ganaa. 21Ma bɛ́ re dí-pɛn mɛnɛn koe n la, bɛn koa Goo lɛ gɔ́ɔ̃ nɛ, n tɔn lɛpii lɛ kɔ lɛ. 22Masɛ n die n toɛ walan lɛ nɛ, man din nyaa n nɛ, Goo lɛpii lɛ lalan, lon mànan lɛn bii ni dí-pɛn tamaa ǹ Goo lɛ la. Ma doamaa bɛ́ nɛ, ma boon mɛnɛn tumaa kɔ n la Izirayeli nɛnyaanan wɔ lɛa, ma á re bɛn tumaa pii n ni.
Tabala boo
23«Bɛ kio, n tabala goon zɛnaa ka kaasia gɔn nɛ. A sasabaa goã gùrù yii paa, a pəməbaa goã guru yii goon, a wo lon goã gùrù yii goon ka talɛɛ. 24N sana yoreen yoreen kaa la, n na a lɛkiri zɛnaa ka sana nɛ, n na a lɛnpɛnɛ nɛ. 25N na a lɛ dɔ doo ka gɔn kɔsɔ nɛ, pəmə ka gɔn yii goon bɛ́ lɔn, n na a lɛnpɛnɛ nɛ. N sana kaa bɛa gɔn kɛ lɛ lɛkoro ganaa. 26N sana kaaran màn sii zɛnaa tabala lɛ wɔn lɛa, ǹ kaa a gòã màn sii kɛa gùrù sii kɛ ganaa. 27N kaaranan lɛn doa kunu a lɛ dɔ ǹ gɔnɔn kɛn lɛn li. Ǹ bɛ́ re bàlàn mɛnɛn we tabala lɛ li, ǹ saa, bɛn man we kaaranan kɛn lɛn nɛ. 28Bàlàn zɛnaa ka kaasia gɔn nɛ, n sana kaa ǹ la. Ǹ dinin lɛn man die tabala lɛa saa ǹ bàlàn biɛ. 29N wúlu mànan kaa ǹ mànan zɛnaa: tasanan nɛ, gongonən ne, tàanan nɛ ka yɔ zuməə ǹ mànan nɛ. N nə ǹ tumaa zɛnaa ka sana yoreen yoreen ne. 30#LWS 24.5-8. Biikoo tumaa waáraa, n masɛ gɔ ǹ buuru da tabala lɛ la ma yɔrɔ-a.
Bolon da ǹ bǎã gùrù sɔbaadɛnaa
31«Bɛ kio kəni, n bolon da ǹ bǎã zɛnaa ka sana yoreen yoreen ne. N sana dɛ, n zɛnaa nɛ. A giala nɛ, a bàlà nɛ, a tàanan nɛ, a kòròn ne ka a nyaǹan kɛn nɛ ka da buũn bɛ́ lɔn, bɛn tumaa nə n zɛnaa kɔn, ka a din sana goon lɛ nɛ. 32N gùrù sɔrɔ bɔ a paran li, n bolon da ǹ bǎã lɛ a gùrù sɔɔ bɔ a para goon ganaa, n sɔɔ bɔ a para goon kɛ dɔ ganaa. 33Gùrù goon ganaa tàan sɔɔ goã ka da nɛ bɛ́ lɔn, kòròn laanka da buũ nyaǹan ná a ganaa. Gùrù goon kɔsɔ dɔ ganaa doo, tàan sɔɔ ka da nɛ bɛ́ lɔn, kòròn laanka da buũ nyaǹan ná a ganaa. A n baa miɛ̃ gùrù sɔrɔ kɛ lɛ tumaa ganaa boe bolon da ǹ bǎã lɛ ganaa. 34Gùrù mɛn bɛ́ bii, bɛ ganaa, tàan sii goã ka da nɛ bɛ́ lɔn, kòròn laanka da buũ nyaǹan ná a ganaa. 35Gùrù bibinaa màn paa mɛn bɛ́ boe bolon da ǹ bǎã lɛ ganaa, kòrò goã bɛn giulun, kòrò goã gùrù màn paa kɔsɔ kɛ dɔ giulun, kòrò goã màn paa nyɔɔbaa kɛ dɔ giulun. A n baa miɛ̃, ka gùrù sɔrɔ kɛ lɛ din tumaa nɛ, boe bolon da ǹ bǎã lɛ ganaa. 36Kòròn lɛn laanka gùrùn lɛn man die goɛ̃ kɔn, ǹ tumaa n zɛnaa-n ka a din sana yoreen yoreen kɛ lɛ nɛ, ǹ nə́ dɛ. 37Bolonən zɛnaa, màn sɔbaa, ǹ bɛ́ boe la ǹ fúlu bɔ ka yɔrɔ-a lɔn, ǹ koa miɛ̃. 38Bolon lɛ bɔ ǹ banbaalanan laanka ton kaa ǹ mànan lɛn dɔn doamaa nɛ ǹ goã sana yoreen yoreen lɛa. 39Bolon da ǹ bǎã lɛ laanka a màn bisinin tumaa doamaa nɛ ǹ nə n zɛnaa ka sana yoreen yoreen kilo pɔsɔɔ nɛ. 40#NDS 7.44; EBR 8.5. Muizu, toa n màn lɛ tumaa zɛnaa, ká a yɔrɔ bɛ́ á n nyaa n nɛ lɔn kele lɛ la.
اکنون انتخاب شده:
Bɔ bɛ̀rɛbaa nɛ 25: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.