2 कुरिन्थियन 12
12
पवलुस काहीं दरसन मिलब
1जबकि घमन्ड करे से कउनव फायदा नहीं होय, तऊ हमहीं घमन्ड करँइ पर रहा हय, एसे जउन दरसन अउर प्रकासन प्रभू हमहीं दिहिन हीं, हम उनखर चरचा करब। 2अउर हम मसीह के ऊपर बिसुआस करँइ बाले एकठे मनई काहीं निकहा से जानित हएन, जउने काहीं चउदा बरिस पहिले तिसरे स्वरग तक उठाय लीनगा रहा हय, हम इआ नहीं जानी, कि उआ देंह सहित उठाय लीनगा रहा हय, इआ कि बिना देंह के। इआ बात काहीं त केबल परमातिमय जानत हें। 3अउर हम उआ मनई काहीं निकहा से जानित हएन, पय इआ नहिं जानी, कि उआ देंह सहित उठाय लीनगा रहा हय, इआ कि बिना देंह के। इआ बात काहीं त केबल परमातिमय जानत हें। 4उआ मनई जउन स्वरग लोक माहीं उठाय लीनगा रहा हय, उआ अइसन बातन काहीं सुनिस, कि जिनहीं बताबा नहीं जाय सकय; अउर जिनहीं बतामँइ के अनुमति मनई काहीं नहिं आय। 5उआ मनई के ऊपर त हम घमन्ड करब, पय हम अपने निबलता काहीं छोंड़िके, अउर कउनव बात माहीं अपने ऊपर घमन्ड न करब। 6एसे अगर हम अपने ऊपर घमन्ड करँइ चाही, तऊ मूरुख न कहाउब। काहेकि हम सहिन सही बोलब; तऊ हम रुक जइत हएन, कि कहँव अइसा न होय, कि जइसन हमहीं कोऊ समझत हय, इआ कि हमसे सुनत हय, त ओसे बढ़िके हमहीं समझँय लागय। 7अउर इहव बात ही, कि जउन हमहीं एतने भारी प्रकासन मिले हँय, त हम उनखे कारन घमन्ड से फूल न जई। एसे हमरे देंह माहीं एकठे काँटा छेदा ग हय, अरथात सइतान के एकठे दूत हमहीं कस्ट देत रहत हय, जउने हम घमन्ड से फूल न जई। 8अउर इआ काँटा के बारे माहीं हम प्रभू से तीन बेरकी बिनती किहेन, कि इआ हमरे जीबन से दूर होइ जाय। 9पय प्रभू हमसे कहिन, कि “हमार किरपय तोंहरे खातिर खुब ही; काहेकि निबलता माहीं हमार सक्ती पूरी तरह से काम करत ही।” एसे हम अपने निबलता के ऊपर बड़े खुसी के साथ घमन्ड करित हएन, कि जउने मसीह के सक्ती हमरे भीतर रहय। 10इहय कारन से हम मसीह के खातिर अपने कमजोरिन माहीं, अपमान सहँइ माहीं, अउर गरीबी माहीं, अउर अपने ऊपर होंइ बाले अत्याचारन माहीं, अउर दुख-मुसीबतन माहीं, खुसी रहित हएन। काहेकि जब हम निबल होइत हएन, तबहिन हमहीं बल मिलत हय।
कुरिन्थुस सहर के बिसुआसी लोगन के खातिर पवलुस के चिन्ता
11हम मूरुख त बनेन, पय तुहिन पंचे हमहीं अइसन करँइ के खातिर मजबूर किहा तय, तोंहईं पंचन काहीं त हमार बड़ाई करँइ चाही, जबकि हम अपने-आप काहीं कुछू नहीं मानी, तऊ इआ जानिल्या, कि हम उन बड़े से बड़े यीसु मसीह के खास चेलन से कउनव बात माहीं कम नहिं आहेन। 12अउर जब हम तोंहरे पंचन के बीच माहीं रहेन हय, त यीसु मसीह के खास चेला होंइ के सबूत देखायन तय, जइसन कि हरेकमेर के धीरज के साथ चिन्हन काहीं देखाउब, अउर अचरज के कामन काहीं करब, अउर सामर्थ के कामन काहीं घलाय कइके देखाउब। 13अउर तूँ पंचे कउनव बात माहीं दुसरे मसीही मन्डलिन से कम नहीं रहे आह्या। केबल इआ बात माहीं, कि हम तोंहरे पंचन के ऊपर आपन बोझ नहीं डारेन, कि तूँ पंचे हमार खरचा उठाबा; हमरे इआ गलती काहीं माफ करा।
14देखा, अब हम तिसराय तोंहरे पंचन के लघे आमँइ के खातिर तइआर हएन। पय हम तोंहरे ऊपर कउनव मेर से बोझ न बनब। काहेकि हमहीं तोंहरे धन-सम्पत के कउनव जरूरत नहिं आय, बलकिन तोंहार जरूरत ही। एसे कि लड़िका-बच्चा अपने महतारी-बाप के खातिर धन नहीं जोरय, बलकिन महतारी-बाप लड़िकन-बच्चन के खातिर धन जोरत हें। 15हमरे लघे जउन कुछू हय, त ओही हम तोंहरे खातिर खुसी के साथ खरचा करब, इहाँ तक कि अपने-आप काहीं घलाय तोंहरे खातिर खरचा कइ डारब। जब हम तोंहसे एतना प्रेम करित हएन, त का तोंहऊँ काहीं हमसे ओतनय प्रेम न करँइ चाही? 16का तूँ पंचे अइसा सोचते हया? कि हम तोंहरे ऊपर कउनव बोझ नहीं डारेन। पय चलाँकी से धोखा दइके, तोंहईं पंचन काहीं फँसाय लिहेन हय। 17अउर तूँ पंचे इआ बताबा, कि जिनहीं हम तोंहरे लघे पठएन तय, त का उनमा से कउनव के द्वारा तोंहईं पंचन काहीं धोखा दइके कुछू लिहेन हय? 18अउर हम तीतुस काहीं समझाइके, तोंहरे लघे पठएन तय, अउर उनखे साथ एकठे भाई काहीं घलाय पठएन तय, त इआ बताबा, कि का तीतुस तोंहईं पंचन काहीं धोखा दइके तोंहसे कुछू लिहिन तय? का हम पंचे एकय आत्मा से नहीं चली? अउर का एकय गइल माहीं नहीं चली?
19तूँ पंचे अबय तक इहय सोचते होइहा, कि हम पंचे अपने बारे माहीं सफाई दइ रहेन हय। नहीं, पय हम पंचे त परमातिमा काहीं हाजिर जानिके, मसीह के सेबक के रूप माहीं बोलि रहेन हय। अउर हे पियार भाई-बहिनिव, ईं सगली बातँय, हम पंचे, तोंहईं आत्मिक रूप से मजबूत बनामँइ के खातिर कहि रहेन हय। 20काहेकि हमहीं इआ बात के डेर हय, कि कहँव अइसा न होय, कि जब हम तोंहरे लघे अई, त जइसन तोंहईं पंचन काहीं हम पामँइ चाहित हएन, त उआमेर न पाई, अउर तुहूँ पंचे घलाय हमहीं जइसन पामँइ चहते हया, त उआमेर न पाबा। अउर हम इआ नहीं चाही, कि तोंहरे बीच माहीं, लड़ाई-झगड़ा होय, डाह होय, क्रोध होय, बिरोध होय, जलन होय, चुगली करब होय, घमन्ड होय, कउनव बात के बखेड़ा होय। 21अउर हमहीं इहव बात के डेर हय, कि जब हम तोंहसे मिलँइ के खातिर अई। त तोंहरेन आँगे, हमार परमातिमा हमहीं लज्जित न करँइ; अउर हमहीं उनखे खातिर दुखी होंय परय, जउन पहिले पाप किहिन तय, अउर घिनहे-घिनहे काम किहिन तय, अउर ब्यभिचार किहिन तय, अउर भोग-बिलास के काम किहिन तय, पय उनखे खातिर पस्चाताप नहीं किहिन आय।
اکنون انتخاب شده:
2 कुरिन्थियन 12: bag
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.