MATIU 20

Yãlɛkɔ̃ana kũ zamalingakɛrinɔ

1Lákũ kpata kũ à bò Luda kĩnaa de nàn dí: Ɔmbede ke mɛ́ à bò kɔnkɔkɔnkɔ, à gɛ̀ɛ zamalingakɛrinɔ wɛtɛ ò zĩ kɛarɛ a bura. 2Ń yã kɔ̃ sɛ̀ à fĩna bońnɛ andurufu ɔgɔ mɛ̀n dodo. Akũ à ń gbárɛ a bura. 3À bò dɔ mɔ̀ kɛ̃ndo, akũ à gbɛ̃ pãndenɔ lè ɛtɛ gũn katɛna pã. 4À pìńnɛ: Ákɔ̃nɔ sɔ̃, à gɛ́ à zĩ kɛ ma bura, mani fĩna boárɛ a zɛ́a. 5Akũ ò gɛ̀ɛ. À ɛ̀ra à bò dɔ ifãntɛ̃ mìdangura, akũ à ɛ̀ra à bò ifãntɛ̃ ura kipana, à ò gbɛ̃ pãndenɔnɛ lɛ dɔ. 6Kũ à bò ɔkɔsi, à gbɛ̃ pãndenɔ lè katɛna, akũ à ń lá à pì: Bɔ́yãi á katɛna la pã zaa kɔnkɔɔ? 7Ò wèa ò pì: Kũ òdi zĩ dawɛrɛro yãimɛ. À pìńnɛ: À gɛ́ à zĩ kɛ ma bura se. 8Ifãntɛ̃ gɛ̃na kpɛ́nn burade pìi pì a zamalingakɛrinɔ gbɛ̃ zɔ̃kɔ̃ɔnɛ: Ǹ zamalingakɛrinɔ sísi ǹ fĩna bońnɛ. Ǹ naa gbɛ̃ kpɛdenɔa ari à gɛ́ mì dɛ gbɛ̃ káakunɔa. 9Akũ ɔkɔsidenɔ sù, ò andurufu ɔgɔ lè mɛ̀n dodo. 10Kũ gbɛ̃ káakunɔ sù, òtɛn da ń ɔgɔ nigɔ̃ de gbɛ̃ kpɛdenɔ pɔ́lamɛ, akũ andurufu ɔgɔ mɛ̀n don ò lè ń pínki. 11Kũ ò ń ɔgɔ sì, akũ ò lɛ́fɔtɔ kà bede pìii 12ò pì: Awa don gbɛ̃ kpɛdenɔ zĩ kɛ̀, akũ n ń kɛ́ sára kũ ókɔ̃nɔ kũ o zĩ zɔ̃kɔ̃ɔ kɛ̀ ifãntɛ̃ gbãna gũnwoo yá? 13Akũ à wè ń gbɛ̃ do pìia à pì: Ma gbɛ̃, mádi n blero. O kɔ̃ yã mà andurufu ɔgɔ mɛ̀n do musunloo? 14Ǹ n pɔ́ sí ǹ tá. Má ye mà kpá gbɛ̃ kpɛde díkĩnaa lán n pɔ́ bàmɛ. 15Má zɛ́ vĩ mà kɛ kũ ma ɔgɔo lákũ má yei nàroo? Ntɛn wɛ́ boboi kũ má gbɛ̃kɛ vĩ yãin yá? 16Lɛn gbɛ̃ kpɛdenɔ nigɔ̃ gbɛ̃ káakunɔ ũ lɛ, gbɛ̃ káakunɔ nigɔ̃ gbɛ̃ kpɛdenɔ ũ.

Yesu ɛra à a ga kũ a vunaao yã'onaa

(Maa 10:32-34; Luk 18:31-34)

17Gɔrɔ kũ Yesu tɛn gɛ́ Yurusalɛmu, à a ìba gbɛ̃nɔn kuri awɛɛplanɔ sɛ̀tɛ ńdona, à yã òńnɛ zɛ́n à pì: 18Ótɛn gɛ́ Yurusalɛmumɛ. Gwen oni Bisãsiri Nɛ́ kpá sa'orikinɔa kũ ludayãdannɛrinɔ, oni yã daala à ga, 19oni a kpá buri pãnde gbɛ̃nɔa. Oni a fobo, oni a gbɛ̃ kũ flã̀ao, oni a pá lía ò a dɛ, a gɔrɔ aakɔ̃de zĩ ani vu.

Yamisi kũ Yuhanao wɛ́kɛnaa

(Maa 10:35-45)

20Akũ Zebedi nɛ́nɔ da sù Yesu kĩnaa kũ a nɛ́nɔ. À ye à wɛ́ kɛa, akũ à kùtɛnɛ. 21Akũ à a là à pì: Bɔ́n ń yeii? À wèa à pì: Ǹ tó ma nɛ́ gbɛ̃nɔn pla dínɔ vutɛ kũnwo n kpatan, gbɛ̃ do n ɔplai, gbɛ̃ do ɔzɛi. 22Akũ Yesu pì nɛ́ pìnɔnɛ: Á yã kũ átɛni a wɛ́ kɛma dɔ̃ro. Toko'i kũ mani mi, áni fɔ̃ à mi yá? Ò wèa ò pì: Óni fɔ̃. 23Yesu pìńnɛ: Toko'i kũ mani mi, áni mi fá, ama vutɛna ma ɔplai ke ma ɔzɛi bi ma yãnlo. Gbɛ̃ kũ ma De kɛ̀kɛńnɛnɔ pɔ́mɛ. 24Kũ a ìba gbɛ̃nɔn kuri kparanɔ yã pìi mà, ń pɔ fɛ̃̀ vĩ̀ni kũ dakũnaoo pìii. 25Akũ Yesu ń kákara à pìńnɛ: Á dɔ̃ kũ buri pãnde kínanɔ dì gbãna ble ń gbɛ̃nɔa, gbãnadenɔ sɔ̃ òdi iko mɔńnɛ, 26ama à de lɛ á kĩnaaro. Á tɛ́ gbɛ̃ kũ à ye à gɔ̃ gbɛ̃ zɔ̃kɔ̃ ũ, sé ade kɛ á zĩ̀ri ũ. 27Lɛmɛ dɔ gbɛ̃ kũ à ye à gɔ̃ gbɛ̃ káaku ũ, sé ade kɛ á zɔ̀ ũ. 28Zaakũ Bisãsiri Nɛ́ dí su de ò zĩ kɛnɛro, à sù de à zĩ kɛńnɛmɛ, à a zĩda wɛ̃̀ndi kpá de à gbɛ̃nɔ bo dasi yãi.

Vĩ̀na barakɛrinɔ werekɔ̃anaa

(Maa 10:46-52; Luk 18:35-43)

29Gɔrɔ kũ òtɛn bo Yɛriko, pari tɛ́ Yesui. 30Vĩ̀na gbɛ̃nɔn planɔ vutɛna zɛ́ lɛ́a, ò mà Yesu mɛ́ àtɛn gɛ̃tɛ, akũ òtɛn lɛ́ gbãna zu ò pì: Dikiri, Dauda Buri, ǹ ó wɛ̃nda gwa! 31Ò gìńnɛ ò pì ò yĩtɛ, akũ ò lɛ́ gbãna zunaa kàra òtɛn pì: Dikiri, Dauda Buri, ǹ ó wɛ̃nda gwa! 32Akũ Yesu zɛ̀ à ń sísi, à ń lá à pì: Bɔ́n á ye mà kɛárɛɛ? 33Ò wèa ò pì: Dikiri, ó ye ó wɛ́ gu emɛ. 34Yesu ń wɛ̃nda gwà, à ɔ nà ń wɛ́a. Gwe gɔ̃̀nɔ ń wɛ́ gu è, akũ ò tɛ̀i.

اکنون انتخاب شده:

MATIU 20: BB2005

های‌لایت

کپی

مقایسه

به اشتراک گذاشتن