MATIU 16

Farisinɔ manafiki

(Maa 8:11-21; Luk 12:54-56)

1Farisinɔ kũ Sadusinɔ sù Yesu kĩnaa de ò a yɔ̃ ò gwa, akũ ò a gbɛ̀ka à sèeda ke kɛńnɛ kũ Luda gbãnao ò e. 2Akũ Yesu wèḿma à pì: Tó ifãntɛ̃ gɛ̃̀ kpɛ́n adì pi, ludambɛ ni kɛ̃kɔ̃a, zaakũ à tɛ̃ra kũ̀. 3Tó kɔnkɔmɛ adì pi, legũ ni ma gbãra, zaakũ ludambɛ de tɛ̃ɛ gɛ̃̀nɛgɛ̃nɛ. Á ludambɛ wɛ́ dɔ̃kɔ̃nɛ, ama ádi fɔ̃ à gɔrɔ díkĩna sèeda dɔ̃ro. 4Gbãragbɛ̃ vãni ludanaanikɛrisarinɔ mɛ́ òdi sèedaa gbɛkama, ama mani sèeda ke kɛńnɛro, sé Inusa pɔ́. Akũ à ń tó gwe à tà.

5Kũ a ìbanɔ bikũ̀ bara gwe, burodi zàna yã sã̀ńgu. 6Akũ Yesu pìńnɛ: Àgɔ̃ á zĩda kũna dɔ̃! À laakari kɛ Farisinɔ kũ Sadusinɔ lùbɛnɛɛi. 7Akũ òtɛn pikɔ̃nɛ: Kũ ódi burodi sɛ́ro yãin à ò lɛ. 8Yesu dɔ̃̀ḿma, akũ à ń lá à pì: Ludanaanikĩanadenɔ, bɔ́yãin átɛn pikɔ̃nɛ kũ á burodi vĩro yãimɛɛ? 9Ari tera adi dɔ̃roo? Burodi mɛ̀n sɔɔro kũ ma kpà gbɛ̃nɔn dúbu sɔɔronɔa yã dí dɔáguroo? Á sɛ̀tɛ tãnko mɛ̀n ũgbamɛɛ? 10Burodi mɛ̀n suppla kũ ma kpà gbɛ̃nɔn dúbu siikɔ̃nɔa sɔ̃, a sɛ̀tɛ tãnko mɛ̀n ũgbamɛɛ? 11Bɔ́yãin adi dɔ̃ kũ burodi yãn mádi oárɛroroo? À laakari kɛ Farisinɔ kũ Sadusinɔ lùbɛnɛɛi! 12Akũ ò dɔ̃̀ sà adi kɛ lùbɛnɛɛn àtɛn ońnɛ ò laakari kɛiro, Farisinɔ kũ Sadusinɔ yãdannɛnaamɛ.

Pita Yesu Arumasihukɛna onaa

(Maa 8:27-33; Luk 9:18-22)

13Kũ Yesu kà Sizaria Filipi bùsun, akũ à a ìbanɔ là à pì: Dín gbɛ̃nɔ tɛn pi Bisãsiri Nɛ́ de a ũu? 14Ò wèa ò pì: Gbɛ̃kenɔ dì pi Yahaya Da'itɛkɛriimɛ, gbɛ̃kenɔ dì pi Iliasu, gbɛ̃kenɔ dì pi dɔ Ilimia ke annabi yãnɔ dokemɛ n ũ. 15Yesu pì: Ákɔ̃nɔ sɔ̃, dín adì pi má de a ũu? 16Simɔ Pita wèa à pì: Arumasihumɛ n ũ, Luda Wɛ̃̀ndide Nɛ́. 17Akũ Yesu pìnɛ: Arubarikademɛ n ũ, Inusa nɛ́ Simɔ! Zaakũ adi kɛ bisãsiri mɛ́ à yã bire dànnɛro, ma De kũ à kú musumɛ. 18Matɛn onnɛ: Pitamɛ n ũ, gbɛ̀si pìn mani ma sɔsi kátɛa, gyãwãn gbãna ni zĩ̀ blearo. 19Mani kpata kũ à bò Luda kĩnaa mɔ̀nɛnɔ kpámma. Pɔ́ kũ n yĩ̀ zĩtɛ yĩna musu. Pɔ́ kũ n pòro zĩtɛ porona musu. 20Akũ Yesu a ìbanɔ sã fĩ̀ńnɛ de òsun o gbɛ̃kenɛ kũ Arumasihun a ũro.

Yesu a ga kũ a vunaao yã'onaa

(Maa 8:31-38; Luk 9:22-26)

21Zaa gɔrɔ kũ̀a Yesu tɛni a Yurusalɛmu gɛna bɔkɔtɛ a ìbanɔnɛ à pì, séde à wɛ́tãmma le manamana gbɛ̃ zɔ̃kɔ̃nɔ kũ sa'orikinɔ kũ ludayãdannɛrinɔ ɔĩ, oni a dɛ, a gɔrɔ aakɔ̃de zĩ áni vu. 22Akũ Pita gɛ̀ɛ kãao kpado, àtɛn gínɛ à pì: Kai Dikiri! Abirekũ ni n lero! 23Akũ Yesu lìtɛ à pì Pitanɛ: Ǹ gomɛnɛ gwe Setan! Ń ye ǹ zɛ́ zɔ̃mɛnɛmɛ. N laasun bi Luda pɔ́nlo, bisãsiri pɔ́mɛ.

24Akũ Yesu pì a ìbanɔnɛ: Tó gbɛ̃ ye à kɛ ma ìba ũ, séde à gí a zĩda wɛ̃̀ndiii, à a lígbãndurukpana sɛ́ à tɛ́omai. 25Gbɛ̃ kũ à ye àgɔ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii ma yãi sɔ̃, ade mɛ́ anigɔ̃ wɛ̃̀ndi vĩ. 26Tó gbɛ̃ gɔ̃̀ à andunia vĩ pínki, tó à kùra a wɛ̃̀ndiii, bɔ́ àreen ani lee? Bɔ́n gbɛ̃ ni le à a wɛ̃̀ndi lilin kɛoo? 27Zaakũ Bisãsiri Nɛ́ ni ɛra à su a De gakuri gũn kũ a malaikanɔ, ani fĩna bo baadinɛ a yãkɛnaaa.

28Yãpuran matɛn oárɛ, gbɛ̃kenɔ kú gu dín oni garo ari ò Bisãsiri Nɛ́ e, àtɛn su kína ũ.

اکنون انتخاب شده:

MATIU 16: BB2005

های‌لایت

کپی

مقایسه

به اشتراک گذاشتن