MATIU 15

Futɛokarayã

(Maa 7:1-13)

1Farisinɔ kũ ludayãdannɛri kenɔ bò Yurusalɛmu ò sù Yesu kĩnaa, akũ ò a là ò pì: 2Bɔ́yãi n ìbanɔ dìgɔ̃ ó dizinɔ futɛokarayã kũnaroo? Òdi ɔ pípi gbasa ò pɔ́ blero. 3Akũ Yesu wèḿma à pì: Bɔ́yãin adì pã kpá Luda yãditɛnanɔa de àgɔ̃ a futɛokarayã kũnaa? 4Zaakũ Luda pì, à á de kũ á dao bɛ̀ɛrɛ dɔ̃. À pì dɔ, gbɛ̃ kũ à a de ke a da kpe bò, ò ade dɛ. 5Ákɔ̃nɔ sɔ̃ adì pi, tó gbɛ̃ pì a de ke a danɛ, pɔ́ kũ á vĩ à ń kpe tao gɔ̃̀ Luda pɔ́ ũ, 6àton a de kpe taoro. Lɛmɛ adì Luda yã kɛ pã lɛ, de àgɔ̃ á futɛokarayã kũna yãi. 7Á manafikidenɔ! Isaya annabikɛyã ò á yã musu swáswa à pì:

8Buri bire dì bɛ̀ɛrɛ limɛnɛ kũ lɛ́omɛ,

ń swɛ̃̀ dɔmaro.

9Òdigɔ̃ donyĩ kɛmɛnɛ pãmɛ,

bisãsiri yãzɛkpatɛn òdi dańnɛ.

Yã kũ àdi tó ò gɔ̃ gbãsĩ

(Maa 7:14-23)

10Akũ Yesu pari sìsiai à pì: À sã kpá à yã ma. 11Adi kɛ pɔ́ kũ àdi gɛ̃ lɛ́n mɛ́ àdi tó gbɛ̃ gɔ̃ gbãsĩro. Yã kũ àdi bo lɛ́n mɛ́ àdi tó gbɛ̃ gɔ̃ gbãsĩ. 12Akũ a ìbanɔ nài ò pì: Ń dɔ̃ kũ Farisinɔ yã pìi mà à ń zɔ̃ ń swɛ̃̀ɛaroo? 13Yesu wèḿma à pì: Pɔ́ kũ ma De kũ à kú musu dí tɔ̃ro oni wutɛmɛ. 14À ń tó gwe. Vĩ̀na don'arɛdenɔmɛ! Tó vĩ̀naa gò kũna vĩ̀naanɛ, ń pla ń pínki ni zu wɛ̀ɛmmɛ. 15Pita pìnɛ: Ǹ yã pì bɔkɔtɛwɛrɛ. 16Akũ Yesu pì: Á laasun kpɛ́ yĩda se yá? 17Á dɔ̃ kũ pɔ́ kũ à gɛ̃̀ lɛ́n dì tá gbɛrɛn gbasa a bo mɛ̀ gũnloo? 18Yã kũ àdi bo lɛ́n sɔ̃ àdi bo swɛ̃̀ɛ gũmmɛ. Àkũ mɛ́ àdi tó gbɛ̃ gɔ̃ gbãsĩ. 19Zaakũ zaa swɛ̃̀ɛ gũnn laasun vãni dì bon: Gbɛ̃dɛnaa, zinakɛnaa, pãpãkɛnaa, kpãni'onaa, ɛ́kɛtona kũ gbɛ̃sɔ̃sɔ̃naao. 20Yã birenɔ mɛ́ àdi tó gbɛ̃ gɔ̃ gbãsĩ. Pɔ́blena ɔpipisari dì tó gbɛ̃ gɔ̃ gbãsĩro.

Nɔgbɛ̃ zĩ̀tɔ wɛ́kɛnaa

(Maa 7:24-30)

21Akũ Yesu bò gwe, à gɛ̀ɛ Taya kũ Sidɔ̃o bùsun. 22Kanaa nɔgbɛ̃ ke kú bùsuu pìn, à sù à wiki lɛ̀a à pì: Dikiri, Dauda Buri, ǹ ma wɛ̃nda gwa. Tãna tɛn wɛ́ tã ma nɛ́nɔkparea manamana. 23Akũ Yesu dí wearo. A ìbanɔ nài, ò wɛ́ kɛ̀a ò pì: Ǹ pɛ́ nɔgbɛ̃ pìia, zaakũ àdigɔ̃ tɛ́wái kũ wikiomɛ. 24Yesu wèḿma à pì: Isarailanɔ sãtɛna lán sãnɔ bàmɛ. Ń kĩnaan Luda ma zĩn ado. 25Akũ nɔgbɛ̃ pìi sù à donyĩ kɛ̀nɛ à pì: Dikiri, ǹ kpámai. 26Yesu pìnɛ: À mana ò nɛ́nɔ pɔ́ble sɛ́ ò zu gbɛ̃danɔnɛro. 27Akũ nɔgbɛ̃ pìi pì: Yãpuramɛ Dikiri! Ama bee gbɛ̃danɔ dì pɔ́ble bùru kũ ò lɛ̀tɛ ń dikiri teburuu zĩtɛnɔ sɛ́sɛ. 28Akũ Yesu wèa à pì: Nɔgbɛ̃, ń ma náani vĩ zɔ̃kɔ̃. À kɛnnɛ lákũ ń yei nà. Akũ a nɛ́nɔkpare pìi aafiaa lè gɔrɔ birea gɔ̃̀nɔ.

Yesu gyãrenɔ werekɔ̃anaa

29Yesu bò gwe à gɛ̀ɛ àtɛn do Galili sɛ̀bɛɛi, akũ à bikũ̀ à vùtɛ sĩ̀sĩia. 30Ò sùnɛ kũ ɛrɛnɔ kũ vĩ̀nanɔ kũ kɔ̃̀nɔdenɔ kũ sãto kpáturukunɔ kũ gyãre pãndenɔ dasidasi. Ò ń kátɛ a arɛ, akũ à ń wérekɔ̃a. 31Kũ gbɛ̃nɔ è sãto kpáturukunɔ tɛn yã o, kɔ̃̀nɔdenɔ tɛn gɔ̃ swáswa, ɛrɛnɔ tɛn táa o, vĩ̀nanɔ tɛn gu e, yã pìi bò ń sarɛ, akũ ò Isarailanɔ Luda sáabu kpà.

Yesu pɔ́blekpana gbɛ̃nɔn dúbu siikɔ̃nɔa

(Maa 8:1-10)

32Yesu a ìbanɔ sìsiai à pìńnɛ: Gbɛ̃ dínɔ kɛ̀mɛnɛ wɛ̃nda, zaakũ ò gĩnakɛ ò kú kũmao gɔrɔ aakɔ̃, akũ ò pɔ́ke vĩ ò blero. Má ye mà ń gbarɛ kũ nàaoro, de gu sún liḿma zɛ́nlo yãi. 33Akũ a ìbanɔ a là ò pì: Mákpan óni pɔ́ble len sɛ̃̀ntɛpɔrɔtu la, à pari dí taka kãa? 34Akũ Yesu ń lá à pì: Burodi mɛ̀n ũgban á vĩi? Ò pì: Mɛ̀n supplamɛ kũ kpɔ̀ kete kenɔ. 35Akũ à pì pari vutɛ zĩtɛ. 36Akũ à burodi mɛ̀n suppla pìnɔ sɛ̀ kũ kpɔ̀nɔ, à sáabu kɛ̀, akũ à lìlikɔ̃rɛ à kpà a ìbanɔa, ò kpà gbɛ̃nɔa. 37Gbɛ̃ sĩnda pínki pɔ́ blè ò kã̀. Ò a kpara kũ à gɔ̃̀nɔ sɛ̀tɛ ari tãnko mɛ̀n suppla pà. 38Gɔ̃gbɛ̃ kũ ò pɔ́ blènɔ kà gbɛ̃nɔn dúbu siikɔ̃, nɔgbɛ̃nɔ kũ nɛ́nɔ baasi. 39Kũ Yesu gbɛ̃nɔ gbàrɛ, akũ à gɛ̃̀ gó'itɛ gũn, à gɛ̀ɛ Magadã bùsun.

اکنون انتخاب شده:

MATIU 15: BB2005

های‌لایت

کپی

مقایسه

به اشتراک گذاشتن

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

Bisã Bible © SIM International, 2005.

در مورد Bisã Bible 2005 اطلاعات بیشتر کسب کنید