निर्गमन 23
23
न्याय ओर निष्पक्षता
1तूँ चूठिया गल्ला नि फैलाया। चूट्ठा गवाह् बणी की दुष्टो रा साथ नि देणा। 2जेती बऊत जणे केसी री बुराई करने खे कट्ठे ऊई रे ओ, तिना पीछे नि जाणा ओर ना तिना पीछे चली की मकद्दमा बिगाड़ने खे चूठी गवाई देणी
3ओर गरीबो रे मकद्दमे रे पक्षपात नि करयो।
4जे तेरे दुश्मणो रा बल़द या गह्दा पटकदा ऊआ ताखे मिलो, तो से तेसरे मालको गे जरूर वापस लई जाणा।
5फेर जे तूँ आपणे दुश्मणो रे गह्दे खे बोजो साथे दबी की रूड़ेया रा देखो, तो चाए तेसखे तेसरे मालको खे छुड़ाणे रा तेरा मन नि करो, तेबे बी जरूर मालको रा साथ देई की तेस गह्दे री मताद करनी।
6तेरे लोका बीचे जो गरीब ओ, तेसखे आपणी कचरिया रे न्याय दलाणे रे पीछे नि आटणा।
7चूठे मकद्दमे ते दूर रणा ओर निर्दोष ओर तर्मी नि काणे, कऊँकि एड़े दुष्ट मां माफ नि करने।
8रिश्वत नि लणी, कऊँकि रिश्वत देखणे वाल़े माणूंआ खे बी अन्दा करी देओई ओर तर्मिया रिया गल्ला बदली देओई।
9परदेसिये पाँदे अन्देर नि करना; कऊँकि तुसे बी मिस्र देशो रे परदेशी थे इजी खे तुसे जाणोए कि एक परदेशी ऊई की रणा क्या ओआ।
सातुआ साल ओर सातुआ दिन
10छे साला तक तो आपणी जमीन बाणी ओर तिजी री फसल कट्ठी करनी; 11पर सातुए साले से जमीन ईंयाँ ई पड़ी री राखणी ओर तिंयाँ ई छाडी देणी, ताकि तेरे पाई-बन्दुआ रे गरीब लोक तिजी ते खाई सको ओर जो कुछ तिना ते बी बचो, से बणो रे डांगरा रे खाणे रे कामे आओ ओर आपणे अंगूरा ओर जैतूना रे बगीचे रे बी एड़ा ई करना।
12छे दिना तक तो आपणा काम-काज करना पर सातुए दिने राम करना ताकि तेरे बल़द ओर गह्दे सुस्ताओ ओर तेरी दासिया रे पाऊ ओर परदेशी बी जो तुसा बीचे जिऊँणे लगी रे राम करी सको।
13चौकस रओ, जो कुछ मैं यहोवे तुसा खे बोली राखेया तिदे सम्मल़ी की रणा ओर दूजे देवतेया रे नाओं री गल्ल तक नि करनी ओर ना ई तिना रे नाओं तुसा रे मुंए ते निकल़ो बल्कि तुसा बीचे सुणने पनि चाईयो।
तीन खास त्योआर
14हर साल तीन बार माखे त्योआर मनाणा। 15बिना सजेड़े रिया रोटिया रा त्योआर मनाणा; तिदे जिंयाँ मैं तुसा खे आज्ञा देई राखी तिजी रे मुताबिक आबीब मीन्ने#23:15 आबीब मीन्ने मतलब चैत्र मीन्ना या 15 मार्चो ते 15 अप्रैलो तक ए रे ठीक बखतो पाँदे, साता दिना तक बिना सजेड़े री रोटी खाया करनी, कऊँकि तेस मीन्ने रेई तुसे मिस्र देशो ते निकल़ी की आए थे इजी खे तेस बखते कोई बी खाली आथे मां सामणे नि आओ बल्कि आपू साथे कुछ पेंट लई की आऊणा।
16ओर जेबे तेरी बायी री फसला री पईली फसल त्यार ओ, तेबे बडाईया रा त्योआर मनाणा; फेर पूरी फसल कट्ठी करने ते बाद सालो रे आखरी रे फसल कट्ठी करने रा त्योआर मनाणा।
17हर साल तीनो बार इस्राएलिया रे सारे मर्द परमेशर यहोवे री मौजुदगिया रे कट्ठा ओ।
18मेरे बलिया रे डांगरो रा खून सजेड़ी रोटिया साथे नि चढ़ाणा ओर ना मेरे त्योआरो री चर्बिया बीचा ते कुछ प्यागा तक राखणी।
19आपणी जमीना री पईली फसला रा पईला पाअग आपणे परमेशर यहोवे रे भवनो रे ली आऊणा। बाकरिया रा बच्चा तेसरी माया रे दूदो रे नि पकाणा।
वादे ओर चेतावणी
20सुण, आऊँ एक दूत तांते आगे-आगे पेजुँआ, जिना बाटा रे तेरी रक्षा करनी ओर जो जगा मैं त्यार करी राखी, तिदे तूँ पऊँचाणा। 21तेस सामणे सम्मल़ी की रणा ओर तेसरी गल्ला मानणियां ओर तेसरी गल्ला रा बरोद नि करना, कऊँकि तेस तेरा पाप माफ नि करना; से इजी खे कि तेसदे मेरा नाओं रओआ। 22पर जे तूँ सच्ची तेसरी माने ओर जो कुछ आऊँ बोलूँ से करे, तो मां तेरे दुश्मणा रा दुश्मण ओर तेरे बरोदिये रा बरोदी बणी जाणा। 23ईंयाँ ई मेरे दूतो तांते आगे-आगे चली की तूँ एमोरी, हित्ती, परिज्जी, कनानी, हिब्बी ओर यबूसी लोका रे देशो रे पऊँचाणा ओर मां तिना रा सत्यानाश करी देणा।
24तिना रे देवतेया गे माथा नि टेकणा ओर ना तिना री पूजा करनी ओर ना ई तिना जेड़े काम करने, बल्कि सेयो मूर्तिया पूरी तरअ ते नाश करी देणियां ओर तिना रे पूजा रे खम्बेया रे टुकड़े-टुकड़े करी देणे।
25तैं आपणे परमेशर यहोवे री पूजा करनी, तेबे तेस तेरे नज्जो-पाणिए पाँदे आशीष देणी ओर मां तेरी बमारिया दूर करनिया।
26तेरे देशो रे ना तो केसी री टाल़ जाणी ओर ना कोई बांझ ऊणी ओर मां ताखे लाम्बी उम्र देणी। 27जितणे लोका बीचे तूँ जाणा तिना सबी रे मनो रे मां पईले तेई आपणा डर एड़ा समायी देणा कि सेयो बेचैन ऊई जाणे ओर तेरे सारे दुश्मण तां सामणे ते मुड़ी की नठी जाणे। 28मां तांते पईले तिना पाँदे महामारी पेजणी, जेसा हिब्बी, कनानी ओर हित्ती लोक तेरे सामणे ते नठाई की दूर करी देणे। 29पर मां सेयो तेरे सामणे ते एक ई सालो रे तो नि निकयाल़ने, एड़ा नि ओ कि देश सुनसाण ऊई जाओ ओर बणो रे डांगर बढ़ी की तेरा नुकशाण करने लगो। 30जदुओ तक तूँ फल़ी-फूली की देशो खे आपणे अक्को रे नि करी लएगा, तदुओ तक मां सेयो तेरे सामणे ते थोड़े-थोड़े निकयाल़दे रणे। 31मां लाल समुद्रो ते लई की पलिश्तिया रे समुद्रो तक ओर सुनसाण जगा ते लई की फरात नदिया तको रे देश तेरे वशो रे करी देणे; मां तेस देशो रे रणे वाल़े बी तेरे वशो रे करी देणे ओर तां सेयो आपू सामणे ते जबरदस्ती निकयाल़ी देणे।
32तैं ना तो तिना साथे ओर ना ई तिना रे देवतेया साथे कोई वाचा बानणी। 33तिना खे आपणे देशो रे रणे नि देओ, कऊँकि तिना मेरे खलाफ तांते पाप करवाणा; जे तूँ तिना रे देवतेया री पूजा करेगा, तो ये ताखे फन्दा बणना।
اکنون انتخاب شده:
निर्गमन 23: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.