दानिय्येल 4
4
नबूकदनेस्सर राजे री सबी राजेया खे चिट्ठी
1कुछ दिन बाद नबूकदनेस्सर राजे रिया तरफा ते देश-देश, जाति-जाति ओर लग-लग पाषा बोलणे वाल़े जितणे लोक तरतिया पाँदे रओ थे, तिना सबी खे ये चिट्ठिया दे लिखी की बोलेया, “तुसे सयी-सलामत रओ! 2परमपरदान परमेशरे माखे जो-जो नशाण ओर चमत्कार दखाए, माखे ये अच्छा लगेया कि तिना रा मतलब तुसा खे बताऊँ।#4:2 पज. 66:16 3परमेशरे बड़े-बड़े चमत्कार दखाए ओर तेसरे चमत्कारा दे बड़ी शक्ति ओई! परमेशरो रा राज तो सदा रा ओर तेसरा राज पीढ़िया ते पीढ़ी तक बणेया रा रओआ। 4तेस बखते आऊँ नबूकदनेस्सर राजा आपणे राज दे सुख चैना दे था ओर बऊत खुश रऊँ था। 5पर एक राती मैं एड़ा सुफना देखेया जेतेरी बजा ते आऊँ बऊत डरीगा ओर माँजे पाँदे पड़ी-पड़ी की जो बिचार मेरे मनो रे आए ओर जो गल्ला मैं देखिया, तिना रिया बजा ते आऊँ कबराईगा था।” 6तेबे मैं आपणे राज दे आपणे सिपाईया खे ये आज्ञा दित्ती कि बाबेलो रे सारेया पण्डता खे मांगे ल्याओ, ताकि सेयो मेरे सुफने रा मतलब मांगे बताओ। 7तेबे मेरिया आज्ञा रे मुताबिक ज्योतषी, तान्त्रिक, कसदी ओर मरी री आत्मा साथे गल्ल करने वाल़े मेरे मईलो दे पीतरे आए ओर मैं तिना खे आपणा सुफना बताया, पर सेयो तिजी रा मतलब नि बताई सके। 8बादो ते दानिय्येल मां सामणे आया, जेसरा नाओं मेरे देवते रे नाओं पाँदे बेलतशस्सर राखेया था ओर जेसरे पवित्र परमेशरो री आत्मा तेसदे रओ थी, तेसगे मैं आपणा सुफना ये बोली की बताईया, 9ओर मैं बोलेया, “ओ बेलतशस्सर तूँ तो आपणे ज्योतषिया रा परदान ए, आऊँ जाणूंआ कि तांदे पवित्र देवतेया री आत्मा रओई ओर तूँ केसी पेतो री वजह ते नि डरदा, इजी री खातर जो सुफना मैं देखी राखेया तिजी खे मतलब समेत माखे समजयाई दे।” 10जो दर्शण मैं सऊँदे ऊए देखी राखेया से ये: मैं देखेया, कि तरतिया रे बीचो-बीच एक डाल़ लगी रा, ओर से बऊत ऊच्चा ए। 11से डाल़ बऊत मजबूत था ओर बऊत ऊच्चा ऊईगा था; एड़ा लगो था कि तेसरी चूँडी सर्गो खे छूणे लगी री थी, ओर सारी तरतिया रे लोक तिजी खे देखी सको थे। 12तेस डाल़ो रे पत्ते सुन्दर थे ओर तिदे बऊत फल़ लगी रे थे एथो तक कि सब कोई तिना खे खाई सको था। तेते डाल़ो निठे बणो रे सबी किस्मा रे जानवरा खे छांए मिलो थी ओर तिजी री डाल़िया दे चिड़िया बसेरा करो थिया सारी दुनिया रे सब जीव-जन्तुआ खे तेते डाल़ो ते खाणा मिलो था।#4:12 मत्ती 13:32 13जेबे आऊँ माँजे पाँदे लेटी रा था तेबे मैं सुफना देखदे ऊए देखेया, कि एक पवित्र स्वर्गदूत स्वर्गो ते उतरी की आया। 14तिने जोरे की आका पाई की ये बोलेया, डाल़ो खे बाडी देयो, इजी री डाल़िया खे छाँटी देयो, इजी रे पत्ते चाड़ी देयो ओर इजी रे फल़ चाड़ी की थाले सेटी देयो; जानवरा खे इजी निठा ते नठाई देयो ओर चिड़िया खे एते पाँदा ते उडाई देयो। 15तेबे बी इजी रा ठूँठ जड़ी ते नि पटो बल्कि जमीना देई छाडी देयो ओर तिजी खे पीतल़ ओर लोए रे साँगल़ा साथे बानी की मैदानो रे अरे डाल़ा बीचे रणी देयो। से सर्गो रे पाल़े साथे सिंजेया करो ओर मैदानो दे बणो रे जानवरा जेड़ा काआ खाया करो। 16एबे तेसखे माणूंए रा मन नि देणा चाईयो। इजी रे बदले, तेसखे डांगरो रा मन देणा चाईयो। से तदो तक ईंयाँ ई रणे देणा चाईयो जदुए तक सात साल नि बीती जाओ। 17ये सजा पईरेदारा रे फैंसले ते ओर ये गल्ल पवित्र लोका रे वचनो ते निकल़ी कि जो बी माणूं जिऊँदा ए से ये जाणी लो कि परमपरदान परमेशर माणूंआ रे राजो दे राज करोआ ओर तिजी खे जेसखे चाओ तेसखे देई देयोआ ओर से छोटे ते छोटे माणूंए खे बी तिजी पाँदे नियुक्त करी देयोआ। 18ओ बेलतशस्सर, मैं, राजा नबूकदनेस्सरे येई सुफना देखेया था। एबे माखे बता कि सुफने रा क्या मतलब ए। माखे एतेरे बारे दे ओर कोई नि बताई सकदा। मैं आपणे सारे राज्य रे बुद्धिमान लोका ते पूछेया कि सेयो माखे एतेरा रा मतलब बताओ, पर सेयो कुछ नि बताई सके। इजी रिया तँईं ओ बेलतशस्सर, पर तांदे तो पवित्र देवतेया रा आत्मा रओआ, इजी बजा ते तूँ माखे तिजी खे समजयाई सकेया।
दानिय्येलो रे जरीये दूजे सुफने रा मतलब बताणा
19मैं, जेसरा नाओं बेलतशस्सर था, थोड़ी देरा तक कुछ नि बोलेया, कऊँकि आऊँ सुफने रे मतलबो खे लई की बऊत परेशान था। बादो ते राजे माखे बोलेया, “ओ बेलतशस्सर, एस सुफने ते या इजी रे मतलबो ते तूँ डर नि।” मैं ज्वाब दित्तेया, “ओ राजा, आऊँ चाऊँआ कि तुसा रे सुफने दे बताई राखी मुसीबता तुसा रे दुश्मणा पाँदे पड़ी जाओ, ना कि तुसा साथे एड़ा ओ, 20तैं से डाल़ देखेया, जो बड़ा ओर मजबूत ऊईगा ओर जेते री चूँडी सर्गो खे छूणे लगी री थी, ओर जो तरतिया रे कूणेयां ते बी दिशो थी, 21जेतेरे पत्ते सुन्दर थे ओर तिदे बऊत फल़ बी थे ओर जिदे सबी खे रोटी थी, जेते निठे मैदानो दे बणो रे सारे जानवर बी रओ थे ओर जेते पाँदे चिड़िया बी बसेरा करो थिया।” 22ओ राजा, तूँ तेस डाल़ो जेड़ा ए। तूँ महान ओर सामर्थी ऊईगा रा ए। तेरी महिमा बढ़ी ओर सर्गो तक पऊँची गी ओर तेरा राज तरतिया रे कूणेया तक फैलीगा रा ए। 23ओर तेबे ओ राजा, तैं एक पवित्र स्वर्गदूत स्वर्गो ते उतरदे ऊए देखेया। तिने स्वर्गदूते बोलेया, “डाल़ो खे बाडी देयो, ओर तेसरिया पाँगटिया बी बाडी देयो! एसरे सारे पत्ते बी चाड़ी देयो, ओर एसरे फल़ बी बखेरी देयो। पर डाल़ो रा चोठ ओर इजी रया जड़ी खे जमीना देई रणे देयो। चोठो रे चऊँ कनारे लोए ओर पीतल़ी रे साँगल़े की बानी देयो ओर तेसरे चऊँ कनारे रे काओ साथे तेसखे तेथी रणे देयो। हर रोज प्यागा तेल़ तेस पाँदे पड़ने देयो ताकि से माणूं, जो डाल़ो री नशाणी था, दीन ऊई जाओ। तेसखे साता साला तक डांगरा साथे डोरूआ दे रणे देयो। 24ओ राजा, इजी रा फल जो परम पिता परमेशरे ठाणी राखेया कि राजे पाँदे बीतो, से ये, 25तूँ माणूंआ बीचा ते नठाई देणा ओर मैदानो दे बणो रे जानवरा साथे रणा; तां बल़दा जेड़ा काआ चरना ओर सर्गो रे पाल़े साथे सिंजेया करना ओर तां पाँदे सात साल बीतणे, जदुओ तक कि तूँ जाणी नि लये कि माणूंआ रे राजो दे परमपरदान परमेशर ई राज करोआ ओर जेसखे चाओ तेसखे राज देई देयोआ। 26पर तेस डाल़ो खे ठूँठो समेत छाडणे री स्वर्गदूते जो आज्ञा देई राखी, इजी रा मतलब ये कि तेरा राज बणेया दा रणा ओर जेबे ताखे पता लगी जाणा, पर तेते ते पईले ताखे ये समजणा पड़ना कि स्वर्गो दे परमेशर ई राज करोआ। 27इजी बजा ते ओ राजा, मेरी ये सलाह् मान कि जे तूँ पाप छाडी की तर्म करने लगे ओर बुरे काम छाडी की गरीबा-कंगाल़ा पाँदे दया करने लगे, तो ऊई सकोआ कि एड़ा करने ते ताखे शान्ति मिलो।”
नबूकदनेस्सरो री बेज्जती
28सुफने दे जो कुछ देखेया था से सब कुछ नबूकदनेस्सर राजे पाँदे बीती गा। 29बारा मीन्ने बीतणे ते बाद, एक दिन नबूकदनेस्सर राजा बाबेलो दे आपणे मईलो रे छतो पाँदे कूमणे लगी रा था, 30“जेबे तिने शईरो ते बारे देखेया, तो तिने आपणे मनो दे बोलणे लगेया, मैं ये महान शईर बाबेल आपणी तागत ओर सामर्था साथे बसाई राखेया ताकि आऊँ तीजी पाँदे राज करुँ। मैं ये आपणी तागत दखाणे रिया तँईं बणाई राखेया ए, ताकि लोका खे आपणी महिमा दखाई सकूँ, तिना खे दखाई सकूँ कि आऊँ बऊत महान ए!” 31यो वचन राजे रे मुंए ते निकल़ी नि रये थे कि तदुओ खे आकाशबाणी ऊई, “ओ राजा नबूकदनेस्सर तेरे बारे दे ये आज्ञा निकल़ी री कि तैं आपणा राजा ऊणे रा अधिकार खोईता। 32ओर तूँ माणूंआ बीचा ते नठाया जाणा ओर मैदानो दे बणो रे जानवरा साथे रया करना ओर बल़दा जेड़ा काआ चरेया करना ओर सात साल तां पाँदे बीतणे, जदुओ तक तूँ जाणी नि लये कि परमपरदान परमेशर माणूंआ रे राजो दे राज करोआ ओर जेसखे चाओ तेसखे राज देई देयोआ।” 33तेबुई ये वचन नबूकदनेस्सर राजे रे बारे दे पूरा ऊआ। से माणूंआ बीचा ते नठाईता ओर बल़दा जेड़ा काआ चरने लगेया ओर तेसरा शरीर सर्गो रे पाल़े साथे सीजो था, एथो तक की तेसरे बाल़ उकाब पंछिये रे पंखा जेड़े ओर तेसरे पैर चिड़िया रे पैरा जेड़े ऊईगे।
नबूकदनेस्सर राजे रे जरीये परमेशरो री तारीफ
34जेबे सेयो सात साल बीतीगे, मैं नबूकदनेस्सर राजे आपणियां आखी सर्गो रिया तरफा खे ऊबे चकिया ओर मेरी बुद्धि फेर जेड़ी की तेड़ी ऊई गी, तेबे मैं परमेशरो रा तन्यवाद कित्तेया ओर जो सदा जिऊँदा ए तेसरी स्तुति ओर महिमा ये बोली की कित्ती, तेसरा राज सदा राए ओर तेसरा राज पीढ़ी दर पीढ़ी बणेया रा रणे वाल़ा ए।#4:34 पज. 145:13, 1 तीमु. 1:17 35तरतिया रे सब रणे वाल़े तेस सामणे तुच्छ गिणे जाओए ओर से स्वर्गो री सेना ओर तरतिया पाँदे रणे वाल़ेया बीचे आपणी इच्छा रे मुताबिक करोआ ओर इजी री खातर तेसखे कोई रोकी की नि पूछी सकदा कि तैं ये क्या करी राखेया? 36तेस ई बखते, परमेशरे मेरी बुद्धि फेर माखे वापस देईती, तो माखे फेर इज्जत मिली, ओर आऊँ फेर दुबारा आपणे महान राज्य दे राज करने दे सक्षम ऊईगा। मेरे मंत्री ओर परदान लोक मां साथे मिलणे खे आऊणे लगे कि क्या करना चाईयो, ओर आऊँ पईले ते बी जादा महान ओर सामर्थी ऊईगा। 37इजी री खातर आऊँ नबूकदनेस्सर राजा स्वर्गो रे परमेशरो री तारीफ करूँआ ओर तेसरी स्तुति ओर महिमा करूँआ, कऊँकि तेसरे सारे काम सच्चे ओर तेसरे सारे बर्ताओ न्याय रे ए ओर जो लोक कमण्डो साथे हांडोए, तिना खे से निठा करी सकोआ।#4:37 बिध. 32:4
اکنون انتخاب شده:
दानिय्येल 4: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.