1 Petrus 3
3
Is ap onugwami enemin welat enebabut
togulom wene
1-2 #
Efe. 5:22; Kol. 3:18 Ai ’gela’ge, his hwami ado honogunlak Allah iak wo erlak a’ge heniak mo’gulentagup pam puk. We, henebabut henil ha’buksogo honogunlak eniak hologo togwiam, is en enil hontoluk e, Allah iak oruak o’gwe wemarik iak wouwagoluk, honu’gwarek honogunlak lo’bok eneragam ’goluk eniak hologo togu lomup o. 3#1Tim. 2:9Henebam opsogo, henagap o’borl o’gwe a’ge paget wogu lorogup o. Ai re, henasu tualogulat, henalli a’ge emas a’ge wogulat, sum op o’go a’bik a’ge ’buktogulat, togu lorogup o. 4At e, henebam opsogo re, henede paget hisogo a’ge aiat wogu lomup o. Ai re, henebabut modok mun-mun welema a’ge enago welat, lioktak welat, togu lomup o. Henebabut Allah ilem asogo togwiam, at ogola en op modok epasu aiat o. 5Pageat is hwami Allah eiyagai a’ge enede Allah pam he’berik welat, enebam opsogo asogoat onogunlak lo’bok eneragam welat eniak hologo togu legesa. 6#Kej. 18:12At hwe Sara ai asogoat ogun Abraham eragam welat iak hologo tagalat, hau e,
“I, naik,” oluk werise laga. His yogodak ogo re, aphwami en honogorlok emagoluk togwiam honogorlok ho erlakma en op togu legep holuk e, at hwe Sara emaligat welegep o.
7 #
Efe. 5:25; Kol. 3:19 Ye, his ap ogo re, Allah ebabut op en honugwami enemin hegitsogoat henelaluk modok welemagoluk eiyerak henebesimu welegep ai en, his se’ban ogwiam Allah en heniak esa’go holu erlakma en mo uano oluk, honugwami enemin opsogo welat, honogola en e,
“Hwami enanni erlak,” oluk pobirak poluk, heniak lobuksogo mo’gulontogulat, henedeabonobogulat, togu lomup o.
“Henarilak honorokhwi enemin nede-hedesogo togu lomup o,” oluk mo’gulentesi wene
8Wene ai ologun wusogo disogo mo’gulhentaik. His henebe ’berlegat honogola en e,
“Nenebe Allah eiyagai nenarilak nonorokhwi enemin,” oluk, henede hwedik welat, henede mesigat a’ge en eberogulat, honogola mesigat a’ge en we’gerlogulat, togu lomup o. Asogo togulat, honu’gwarek en erlikhorlo erlakma en, henede sebelogo welat, his-his nede-hedesogo togu lomup o. 9Aphwami logon en his wiagaphonobogwiam, his en o’go wiagabonobogup o. Ye, eniak esegen wiaksogo yakhontogwiam, his en o’go heniak esegen wogentagup o. We, o’go re, Allah en enebe obabonobuagoluk, yo’go pogu lomup o. Pobuk at en op a’ge wokhentaigoluk yo’go henebesi ai en, his en o’go op a’ge wogontogu lomup o. 10-12#Mzm. 34:12-16Wene ai paget disogo egesa,
“Aphwami enebabut Nenaik ’gain Onuk Logo a’ge ogola agai epasu a’ge hegitsogo togwi a’ge nak,
at il enebam welat, se’ban yo’go pogwiam eniak esa’go hweliso yo.
A’geat de, is wiak togwi a’ge nak e,
il asu warentasu o.
Ai en e, ap sa en,
An nelaluk logon emin welle e, nin hwedik nan hwedigat op a’ge nak lau wagoam hasulle,
oluk wolom agai holuk e,
emage pam wiak wene u erlakma en welat,
emde pam en iak eseiyat aphwami logon lalenebiso erlak welat,
wiak a’ge o’borlma ukpoluk op a’ge nak tagalat,
ebabut aphwami logon enemin la’bulogo op welagai ai a’ge logo poluk annisogo til lasulat,
tagalom o,”
oluk Allah iak pam pelal wokho pegesa.
13His e, op togu lomogoluk a’goluksogo togu lorogup holuk e, sa en wiagaphonobo no. Wiagaphonobo mia o. 14#Mat. 5:10#Yes. 8:12,13A’geat de, hegitsogo togwiam wiagaphonobogwi holuk, di obotut yu obotut hogulat, honogola henagai hogu lomup o. Honogorlok emagoluk takhonobogwiam, honogorlok agalat henede mennei yat horok eberogup o. 15His en e, Kristus heniak lobuksogo mo’gulogulat,
“Nonue ’gain Onuk Logo a’geat o,” oluk henedemu en erliktogu lomup o. Erliktogwiam, is logon en hin henebam wokhogulat e,
“Op ema, oluk ebam eberak welegep ai nopaget,” oluk mo’gulhontogwiam e, o’go wene dokhumsogo mo’gulentagup a’ge henede eberak modok welat, 16heniak sakhosogo hau wusogo mo’gulontogu lomup o. Asogo mo’gulontogulat, honogola en e,
“An wene nebam pukmu o,” oluk opogulat, Kristus emin hwedik welat, op togwiam, aphwami en honobok wiak ’balua a’ge ai enil hontoluk ene’gerli ema o. 17His wiak togwiam henebam di obotut yu obotut henebabut pam hogu lorogup holuk e, wiak o. A’geat de, his en op togwiam, Allah en,
“Is di obotut yu obotut houwak,” oluk epasu holuk nak e, op o. 18Nis aphwami wiak togu lege ai paget nene’gik ologun pam, at Kristus pobuk warom erlakma en weleigoluk mesik erligeat waraga. Nenebe Allah e’bek woknonoboluk laigoluk e, at ebabut hegitsogo tago a’ge en, nis nenebabut wiak a’ge paget waraga ai o. Ebe nis aphwami a’geat werigisema waraga a’geat de, arogun ai Allah en elalugap pesi ai o. 19Elalugap pesimu re, is logon enarogun a’ge herle werak oruakma wene mo’gulentai laga. 20#Kej. 6:1–7:24Enarogun a’ge ai enebe re, pageat at Nuh en o werisokhwe, Allah ebabut op en yerentarok oruakhweat de, wene wo erlakma en ukpoluk wiak togwi modok oruakma ik ebe en warenebegeimu waregesa a’ge aiat o. Asogo warenebisokhwe re, is logon ik so ogola ’gwigisarik welegesa a’ge, enebe siragen weiyat ik ebe ano pam delenebegei ai o. 21Is ik pam delenebegei ai ’gela’ge, nis yogodak ik olomu ’bogu lege ai pam delnenebiso yo. Ik pam delnenebiso ai re, ik olomu ’belaknonobogwiam, nenagap ik ai pam emerago ai en delnenebiso puk. At e, nenedemu en wene nenebam selak emagoluk Allah yo’go pogwiam, Yesus Kristus waragarik elaluk aga ai pam delnenebiso yo. 22At ebe elaluk agarik e, ’bogorl pam ligagarik, Allah eragam e’gik ’bekhit akhit ’gain welat, malaikat Allah en yo’go peragonobou wago a’ge ebano emin, onuelak ’gain a’ge emin, enanni a’bik a’ge emin, tenentarok welago yo.
اکنون انتخاب شده:
1 Petrus 3: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید