1 Petrus 1
1
Hau warenebegei wene
1-2Narilak norokhwi. An Petrus, Yesus Kristus en yo’go noboluk peraknobou waga a’ge ano en, wene yu pelal wokho his nenaik Allah en, henebe nadugat poliknenebesi a’ge, yogodak ya we lodu paget o di owi yu owi ’bogulogo legeptik, o propinsi Pontus emin, Galatia emin, Kapadokia emin, Asia emin, Bitinia emin, aphwami ene’gerlak o’gwe lo’bok welegep a’ge ano, hene’bek perakpou wegi o. Henebe Allah enat ede opoluk polikhenebesirik, Yesus Kristus iak hwelakpoluk togu lemagoluk eragam henebasulat, emep pam hohenebiselat, tigoluk e,
“An nu’gwarek neiyagai orogup oluk wokhenebegis o,” oluk at Arogun en wokhenebegei ai o. Allah ebabut op ano en op a’ge wokhentasulat, henede pobuk naduk ha’bugaphenebiselat, loksogoat taga lemak o.
His en e, “Pobuk Allah en obapnonobua, oluk honogola henagai hogulom o,”
oluk mo’gulentesi wene
3Nonue ’gain Onuk Logo a’ge Yesus Kristus aik Allah anoat erliktogu lomok o. At Allah nenebe modok ede en, Yesus Kristus ebe waragarikmu en elalugap pesi ai pam nis nenelalugapnenebegei ai o. Nenelalugapnenebegeimu welat e, nonogola en e,
“At en, pobuk obapnonobua o, egei ai sogwi ema erlak,” oluk nonogola nenagai hogu lege. 4Asogo obapnenebasuam e, eiye omul a’ge ai, muk ago erlak, wiak ago erlak, erlak om erlakma en, otok modok welema a’ge ’bogorl pam logon his henebesimu oruak o. 5Henede at Allah ebam he’berik welegep ai en, at anni pam tenhentarok welemarik e, pobuk henebe obaphonobua a’ge o ologun pam selakma ema ai o.
6Ai enat, yogodak ya, Allah en henebabut ’baliogoluk tagoam, henebam di obotut yu obotut hogulat, we lodu paget henede wiak ago a’geat de, honogola henagai hogu lomup o. 7Emas o’go a’bik ’balogwi a’ge ai,
“Op a? Wiak a,” oluk odouk magale pam walhogwi ai ’gela’ge, Allah en e,
“Is enede an nebam demat he’berik oruak a? Erlak a,” oluk, enagat emagoluk epasuam, henebam di obotut yu obotut hogu legep ai o. Emas ai re, we ’burlat erlak ema a’geat de, ebe logo re, henede Allah ebam he’berik welegep aiat o. His henede at ebam he’berik wolorogup holuk e, at en henebabut ’balise lemarik e, Yesus Kristus selakmasogo perakpouma ai erlige re, erlikhenebiselat, hau do’goksogo wathenebiselat, logo henebasulat, tua o. 8His en nadugat, at ebe henil ho erlak a’geat de, at ebe henede welegep ai. Asogo welat e, yogodak ya henil hogu legep erlak a’geat de, honogola en e,
“Pobuk op modok taknonobouwa,” oluk heniak pam no’gosogo ’beli’gogo u ’gela’geat welat, honogola henagai a’bik hogu legep ai o. 9Henede en e,
“O ologun pam obapnonobuak,” oluk henede at ebam he’berik welat, yogodak eiye aga legebat o.
10Nenebe obapnonobua wene ai re, naduk is ap Allah iak mo’gulontogu legesa a’ge ebano en wene ai pagerat heratogulat, hin wogulat, togu legesa. Asogo heratogulat, Allah ebabut op ano en,
“Obabenebasu lema,” oluk ebe his obaphenebiso ai pagerat owan oruakhwe mo’gulontogu legesa ai o. 11Asogo mo’gulontogu legesa ai, at Kristus Arogun onogola welat disogo mo’gulentesi,
“Kristus obotut hil-hil warema. Waremarik e, pobuk elaluk agoam erliktogu lomul o,” oluk mo’gulentesimu is en ogulat e,
“No’gosogo ema. Metne erlige ema,” oluk hin dokhumsogo wogu legesa. 12Hin wogwiam, at Allah en e,
“Wene ai re, his honu’gwarek paget e, erlak o. Is pobuk owan a’ge enebaget togu legep o,” oluk his henebagerat egei o. Asogo mo’gulentesirik welagarik en, pobuk Allah Arogun ’bogorl pam en ’belakpou wagama, is ap op wene Yesus Kristus tegei wene ano mo’gulhontouwagoluk onogola welat yogodak ’baksogo mo’gulhontogwi ebe ai paget ogu legesa ai o. Wene ai, is malaikat Allah en yo’go ’belabonobou wago a’ge ebano en e,
“Eige, nis wene ai dokhumsogo nenaluk olo e,” oluk opogwi o.
Allah paget degelak modok welemagoluk enesa’go weregei wene
13Ai en e, wene ai pobi toluk e, ebela pungtak louwogoluk enebagase pam ’bagaluk ’betesogo wantogwi ai ’gela’ge, henebabut heberlogo, henede we’gerlogo wolomup o. Asogo welat, henede en e,
“Allah en Yesus Kristus ebe selakmasogo perakpou wagoam op a’ge woknentauma o,” oluk henede at ebam poluk ebam eberak modok wolomup o. 14His nadugat e, wene ai heneperlak welat, di a’ge yu a’ge henagai en henede en nasuam togu legep ano, pobuk e, henebabut ai a’ge wagup o. Malik en enaiklak eniak hwelak welat hegitsogo togwi ai ’gela’ge, his Allah iak henesa’go hwelakpoluk hegitsogo togu lomup o. 15-16#Ima. 11:44-45; 19:2At Allah en e,
“An nebabut wiak tu erlakma en degelak modok welegi ai en e,
his ogo re, an nebaget henebabut degelak modok wolomup o,”
oluk egeimu pelal wokho pegesa ai en, his en e, di a’ge yu a’ge togulat, henebabut at Allah en yo’go henebesi a’ge ebabut ’gela’geat degelak modok welat togu lomup o.
17At Allah ebabut e, aphwami enagap pam nak il ontoluk, mesik olukhwema enebasulat, mesik o’borlma enebasulat, tago erlak o. We, enebabut togwi lo’bok hegitsogoat wene enebam pasulat, no’gorliselat, tago ai en e, his en e,
“Nenaik Allah o,” oluk yo’go pogulat, ’gwiangma yema we lodu paget henebe ap ’bok ’gela’ge welat, at ebe honogorloksogo togu lomup o. 18Naduk e, hena’bu hene’balak en togu legesa ai ’gela’ge, is enebabut wokho erlak om a’ge paget ’burlat almasogo togu legep ano en, hene’gik herle werak ’gela’ge oruakma, Allah en henebe hono’go ’balogo delhenebegei ai henalugat o. O’go ai re, erlak ema a’ge emas pam, perak pam hono’go ’balhenebegei puk. 19At e, o’go lok a’ge pam ’balogo delhenebegei o. Wam domba wam emalik wiak a’ge puk, we, asu modok pok ’boguntak a’ge Allah paget emep enamogo warom ’gela’ge, at Kristus emep enamogo waraga ai pam, hono’go ’balogo delhenebegei ai o. 20Kristus, Allah en ’bogorl ’gwiang owan walho erlak welat, ede opoluk yo’go pesirik welagarik e, ebe yogodak o ologun pam his henebaget selakmasogo perakpou wagama henebe delhenebegei ai o. 21Ebe waragama Allah en elalugap poluk erliktogu lemagoluk edikpesimu, henede Allah pam he’berik poluk,
“Pobuk at en obapnonobua,” oluk ebam eberak welegep ai o.
22Dem wene ai henesa’go hologulat, honogola en wiak a’ge hosogo ukpoluk, henarilak honorokhwi Allah eiyagai a’ge demat henedesogo togu legep ai, henemin hwedik modok welat nede-hedesogo togu lomup o. 23Allah en pobuk dakhenebegei ai, aphwami waragai a’ge en dagonobogwi ai ’gela’ge dakhenebegei puk. We, Allah elaluk otok modok welat iak erlak ema erlak welema a’ge pam dakhenebegei o. 24#Yes. 40:6-8Ai, Allah iak disogo oluk pelal wogo oruak ’gela’ge,
“Aphwami ’berlegat e, enebe e e’gela ’gela’geat o.
Op o, oluk, erligonobogwi ai, e owil erliktogwi ai ’gela’ge erligonobogwi ai o.
E’gela ’buk agalat, owil lologo ’biselat, tiso ai o.
25A’ge re, nonue ’gain Onuk Logo a’ge iak ai modok welema o,”
oluk egeimu pelal wokho pegesa ai o. At iak ai ebe re, nis en op wene mo’gulhontogu lege aiat o.
اکنون انتخاب شده:
1 Petrus 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید