Luku 19
19
Yesu pita꞉ Sa꞉kiasi yaapo
1Yesuta꞉ mo Dietiko daoni monema꞉ tilao polueke alo oni daoni pa꞉ta꞉ honda꞉ pambeekeme. 2Koto pa꞉ta꞉ta꞉ dakisi mu hayeke hamoko hali ma꞉nda꞉ Sa꞉kiasi hayekeme. 3Ipikita꞉ mo Yesu lo haemeke hali handulueke alo epeekepate doka꞉tiki yeke ekima꞉ wanda꞉hali tieke momba꞉la haemekeeki yaalo hata꞉ Yesu handa꞉peke ana꞉ na piekeme. 4Koto ekina꞉ ipiki amba꞉la pototo laa pua nose ti ma꞉nda꞉ a꞉meiya pita꞉ Yesu kotoeki mea wendiao yapilia꞉ alena꞉ handulueke hone wiekeme. 5Yesu koto alena꞉ opolo a꞉pa oli ti nane handa꞉liaaso Sa꞉kiasi pa꞉ta꞉ alota꞉ Neke ota꞉ a̱i̱ hola꞉pa꞉e. Pa ekipeke. I̱ta꞉ ameta꞉ naka꞉ da pa꞉ta꞉ a꞉pa꞉peke ya꞉leke loa꞉me.
6Sa꞉kiasi koto kone hola꞉pa꞉niaota꞉ Yesu pa꞉ta꞉ ta꞉na꞉ma꞉ homolo hata꞉ handa꞉ miekeme. 7Wanda꞉hali paeyaoma꞉ Kutu piekeeki hando haota꞉ hambilikima꞉ hambilikima꞉ pitolo alota꞉ Do halita꞉ mo hande hoke hau pa꞉la꞉ halina꞉ da pa꞉ta꞉ kimisu pula꞉me lemekeme. 8Kutu pimikipate Sa꞉kiasi tiao hata꞉ Tekehali pa꞉ta꞉ alota꞉ Tekehalio. Opie. I̱ma꞉ yaka ala꞉ta꞉ ala꞉ta꞉ tukikina꞉ telipa mandane ekita꞉ mo natehali wanda꞉hali pa꞉ta꞉ halueke. Kutupa I̱ma꞉ wanda꞉hali a꞉nda꞉ makeao pake a꞉nda꞉ noa꞉ka꞉na꞉ta꞉ kota꞉ I̱ma꞉ta꞉ hoto tonkopuna꞉ paka꞉lao paa hala꞉tiki pulueke leekeme.
9Yesuma꞉ mo hali pa꞉ta꞉ alota꞉ Da꞉ta꞉la꞉ ekita꞉ ame do da pa꞉ta꞉ a꞉pa꞉la꞉me. Pa ekipeke do halita꞉ Eipoloha꞉ma꞉na꞉ mondu tanka꞉la꞉ peala꞉ tapake hali yeke loa꞉me. 10Wanda꞉halina꞉ Eiyeketa꞉ mo alu pa꞉la꞉ wanda꞉hali handa꞉ wia peteluekema꞉ yeke a꞉pa꞉la꞉me leekeme.
Manima꞉ e pokolo hata꞉ haka꞉ta꞉pao mina꞉la꞉eki
(Ma꞉tiu 25꞉14-30)
11Wanda꞉halima꞉ pi opitolo haena꞉ Yesuma꞉ iki pa꞉ta꞉ onkoluma꞉ pi ma꞉nda꞉ la haleekeme. Koto wanda꞉halima꞉ Yesuta꞉ Diutuseleme nane teke pa꞉ta꞉ polukuma꞉ peeke handaa ikana꞉ma꞉ ekima꞉ Koda꞉na꞉ Kilu Tombuao Hala꞉ ekita꞉ koto kone ipula꞉me hone wimikime. 12Koto ekina꞉ Yesuma꞉ alota꞉ Hali tieke ma꞉nda꞉ta꞉ kenke ma꞉nda꞉ nane pua ipikita꞉ ika꞉ kini hali pituluekema꞉ peekepate kone paa la꞉ka꞉la ipuluekema꞉ peekeme. 13Poluekema꞉ hata꞉ ipikana꞉ma꞉ ipika꞉ e pokao haemeke kiki yaapo haliweki wi la꞉ meaata꞉ iki paeyao pa꞉ta꞉ 20 kina hale hale pea iki pa꞉ta꞉ alota꞉ I̱ polua꞉ hoki nane do kitolo manima꞉ bisinisi pea ikana꞉ma꞉ ekipa haka꞉ta꞉pao milimio laa e poka꞉pa꞉peke leekeme.
14Koto laa peekepate mo hande halina꞉ da haliwekima꞉ ipiki honditi pitolo hata꞉ ipika꞉ peeke hoki nane mandane haliwekima꞉ pua lena꞉ tapaaso alota꞉ Do halita꞉ nika꞉ kini hali pitaapeketa꞉ nikita꞉ ki pa꞉la꞉me laa lolo pena꞉ tapaemekeme.
15Kutu pimikipate hande halita꞉ kini hali ana꞉na꞉ pitata꞉ paa ipika꞉ da nane la꞉ka꞉la epeekeme. Koto kone ipika꞉ e pokao haena꞉ mani halaa peeke haliweki wi la꞉ mipi peaata꞉ ika꞉ haka꞉ta꞉pao mimiki ekita꞉ ekipupe laa handuluekema꞉ piekeme.
16Titina꞉ halima꞉ a꞉pa alota꞉ Tekehalio. Hande 20 kina ki manima꞉ta꞉ pa mandane 200 kinamanu make haka꞉ta꞉pao mealome laa leekeme. 17Hande kinima꞉ alota꞉ Epeke tupa꞉ peleme. Neketa꞉ e epeke tupa꞉ pokale halie. Nakana꞉ma꞉ hosiki e kone epeke tupa꞉ handeteke haeke handa loa꞉ma꞉ ameta꞉ teke damanu kiki yaapo handeteke halena꞉yeke kitolome leekeme.
18Kutupa ipika꞉ hoki nane epeeke halima꞉ a꞉pa alota꞉ Tekehalio. Hande 20 kina ki manima꞉ pa mandane 100 kinamanu make haka꞉ta꞉pao mealome laa leekeme. 19Hande kinima꞉ koto some pa꞉ta꞉ alota꞉ Nakana꞉ma꞉ teke damanu kiki homeke handeteke halena꞉yeke kitolome leekeme.
20Kutupa koto hoki nane e pokao hayeke hali ma꞉nda꞉ a꞉pa alota꞉ Tekehalio. Hande naka꞉ 20 kina doe. I̱ma꞉ta꞉ dau siki pa꞉ta꞉ panka꞉ ua꞉me. 21Neketa꞉ taka꞉lake hali hale ekina꞉ I̱ma꞉ paala꞉ma꞉ homoa꞉me. Pa ekipeke. Nakana꞉ma꞉ na nokopekeeki kone mondu no hale make na tandelekeeki kone tulu no haleme leekeme.
22Hande kinima꞉ mo halina꞉ pi hombo peaaso alota꞉ Neketa꞉ hoke e pokao hale halie. Naka꞉ ale pima꞉ kone naka꞉ hoke hau peleeki peneme yaalueke. Naka꞉ honema꞉ta꞉ I̱ta꞉ taka꞉lake hali haloma꞉ hone ta wika꞉ta꞉me. I̱ma꞉ na nokopekeeki no halo make na tandelekeeki tulu no halome hone witele yekea. 23Kota꞉ a꞉pa꞉la꞉me. Yaka manita꞉ ba꞉nka꞉ pa꞉ta꞉ wia wetepena꞉ haka꞉ta꞉pao muluekema꞉ ekipeke na wiaepe. Kutu pika꞉na꞉ yoluta꞉ wetepena꞉ I̱ ipulua꞉ dina꞉ta꞉ I̱ma꞉ta꞉ handeeki make haka꞉ta꞉pao wilieeki apa꞉tao mulu pua꞉me leekeme. 24Kotoeki laa ipikana꞉ma꞉ koto pa꞉ta꞉ haemeke haliweki pa꞉ta꞉ alota꞉ Do halina꞉ 20 kina meaata꞉ hande 200 kina wia hala꞉ e pokaasa꞉ hali pa꞉ta꞉ hala꞉pe laa leekeme.
25Mo haliwekima꞉ ipiki pa꞉ta꞉ alota꞉ Tekehalio. Pa ekipeke. Mo halita꞉ 200 kina amba꞉ wia hala꞉me lemekeme. 26Mo kini halima꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Amba꞉ wia hala꞉ halima꞉ta꞉ mandaneeki make haka꞉ta꞉pao milieke. Koto pa꞉la꞉pate na wia hala꞉ halima꞉ta꞉ ipika꞉ wia hala꞉eki siki kone yoka꞉ milieke. 27Kutupa ameta꞉ hande I̱ta꞉ ika꞉ kini hamena꞉ kiaemeke a꞉nda꞉ tunkuliki haliweki ikita꞉ hatuku a꞉pa yaka leke popelekena꞉ hata꞉ lia꞉pa꞉peke laa leekeme leekeme.
Kini hali tupa꞉ Diutuseleme daoni pa꞉ta꞉ opolo peekeeki
(Ma꞉tiu 21꞉1-11, Maka 11꞉1-11, Dioni 12꞉12-19)
28Yesuma꞉ koto pimanu laata꞉ ipiki amba꞉la titina꞉ mo wanda꞉hali mea wetepe yao mo Diutuseleme da teke pa꞉ta꞉ peekeme. 29-30Kutupa ipikita꞉ oli Olipi peiyene tea꞉na꞉ hayeke Betepeisi make Bedani da yaapo pa꞉ta꞉ opolo a꞉paata꞉ ipika꞉ disaipolo hali yaapo amba꞉la tapaaluekema꞉ hata꞉ta꞉ dupa leekeme. Oni hala꞉ da nane opolo pua꞉pa꞉peke. Koto pa꞉ta꞉ opolo pepeka꞉na꞉ta꞉ donki ikiki hali ma꞉na꞉ endi bala꞉eki handilipipikie. Mo donkita꞉ ota꞉ homeke a꞉nda꞉ na pita pomu halemeekie. Hola꞉ tapao mea a꞉pa꞉peke. 31Kutu pipikina꞉ ma꞉nda꞉ma꞉ ipiliki lota꞉ pia꞉ka꞉na꞉ta꞉ kota꞉ ipilikana꞉ma꞉ alota꞉ Tekehalima꞉ muluekema꞉ hone pa꞉la꞉me lapa꞉peke leekeme.
32Kutupa mo hande hali yaapo pua Yesuma꞉ leeke tupa꞉ kone ota꞉ pua handepepekeme. 33Mo hande donki ikiki hali ma꞉na꞉siki hololo haena꞉ta꞉ mo teke haliwekima꞉ alota꞉ Ekipeke hola꞉ mina꞉lepepe lemeke handaa mo hali yaapoma꞉ hombo peaaso alota꞉ 34Tekehalima꞉ muluekema꞉ hone pa꞉la꞉me lepekeme. 35Kutupa mo hande hali yaapoma꞉ mo donki ikiki hali ma꞉na꞉ta꞉ Yesu pa꞉ta꞉ mea pepekeme. Kutupa mo disaipolo haliwekima꞉ ika꞉ daumanu mo donkina꞉ hoki manda wiata꞉ Yesu pitulu a꞉meina꞉ tamba꞉ mimikime.
36Yesuma꞉ mo ma꞉na꞉ hokina꞉ pita ipulu haena꞉ta꞉ wanda꞉halima꞉ ika꞉ daumanu lepolona꞉ peolao yamoma꞉ yamoma꞉ pimikime. 37Kutupa ipiki mo Diutuseleme teke pa꞉ta꞉ opolo poluekema꞉ yeke mo Olipi pote tea꞉ nane u niayeke pota꞉na꞉ hola꞉pa pulu haena꞉ mo ipika꞉ hoki nane telimea pemeke wanda꞉hali aneke hapuma꞉ kini pea Koda꞉ pa꞉ta꞉ Keiyae laata꞉ ipika꞉ biki anekema꞉ mea mina꞉liaemekeme. Pa ekipeke Yesuma꞉ hau tieke tieke ma꞉nda꞉ ma꞉nda꞉ pieke ekimanu ota꞉ aneke hapu handemekeme.
38Mo wanda꞉halima꞉ la꞉tia pulu alota꞉ Mo Tekehalina꞉ bikina꞉ ipula꞉ kini halita꞉ Koda꞉ma꞉ epeaena꞉e. Hepeni nane haleme tapakema꞉ a꞉nda꞉ peliaaso hata꞉ Koda꞉na꞉ biki tieke miniliaena꞉e la꞉tia pemekeme. 39Koto lemeke handaa koto wanda꞉hali anka꞉lopuna꞉ haemeke Pa꞉tisi haliwekima꞉ Yesu pa꞉ta꞉ alota꞉ Disao. Naka꞉ disaipolo haliweki pa꞉ta꞉ Kutupiki pi na lapepe laa lae lemekeme. 40Yesuma꞉ ika꞉ pi hombo peaaso hata꞉ alota꞉ I̱ma꞉ iki pa꞉ta꞉ Pi na lapa꞉pee loa꞉ka꞉na꞉ta꞉ kota꞉ do toopimanu ika꞉ kone e̱ alo hata꞉ poya꞉ tieke lelimikie leekeme.
Yesuma꞉ Diutuseleme daonina꞉ e̱ leekeeki
41Yesu mo Diutuseleme da teke pa꞉ta꞉ opolo a꞉pa mo da handolo hata꞉ta꞉ e̱ alo alota꞉ 42Nakana꞉ma꞉ ame a꞉nda꞉ peliaasa꞉eki muluekema꞉ pea꞉pekeeki hone witolo yoluta꞉ epolo pia꞉me. Koto pa꞉la꞉pate ameta꞉ nakana꞉ma꞉ ana꞉na꞉ handa꞉peke na ya꞉la꞉me. 43Nate ma꞉nda꞉ a꞉nda꞉na꞉ta꞉ naka꞉ a꞉nda꞉ tunkuliki haliweki a꞉pa a꞉nda꞉ pape tieke tieke hopa꞉liao pokaata꞉ naka꞉ pota꞉ poka꞉niao pitilimikie. A꞉nda꞉ puluekema꞉ta꞉ mandane mandane a꞉pa dupalimikie. 44Ikana꞉ma꞉ neke make naka꞉ pape tukiki pa꞉ta꞉ haleme wanda꞉hali paeyaota꞉ ota꞉ lia paeyaalimikie. Kutupa naka꞉ toopi ma꞉nda꞉ ipika꞉ ula꞉ alena꞉ ota꞉ na wina꞉ lelimikie. Pa ekipeketa꞉ nakana꞉ma꞉ Koda꞉ma꞉ neke peteluekema꞉ peneme yao epena꞉ lea꞉ nate leketa꞉ na handa꞉ wima꞉e leekeme.
Yesu tembolo da peekeeki
(Ma꞉tiu 21꞉12-17, Maka 11꞉15-19, Dioni 2꞉13-22)
45Kutupa Yesuma꞉ mo tembolo da pa꞉ta꞉ honda꞉ pamba pua ne anemone alemanu tapaaso pitimiki haliweki tolu litolo alota꞉ 46Mo Baibolona꞉ wape pea ula꞉ pita꞉ Koda꞉ma꞉ alota꞉ Yaka data꞉ wanda꞉halima꞉ yeni pea꞉tiki pulu pa꞉la꞉ dae lolo pa꞉la꞉pate ikana꞉ma꞉ta꞉ mo pake no hala꞉ haliwekina꞉ a꞉mbalo peleme da haena꞉ alememe leekeme.
47Kutupa hoto paeyao Yesuma꞉ mo tembolo da pa꞉ta꞉ pi wala꞉tiki pu hayekeme. Pate mo hande yeni peao haemeke haliwekina꞉ you haliwekima꞉ make pi ula꞉eki walo haemeke haliwekima꞉ make mo wanda꞉halina꞉ you haliwekima꞉ make Yesu luekema꞉ hone wimikime. 48Kutu pimikipate ikana꞉ma꞉ pota꞉ ma꞉nda꞉ na handa꞉ wimikime. Pa ekipeke. Wanda꞉hali paeyaoma꞉ ipika꞉ pi pa oputia pulu hata꞉ ipika꞉ pi ma꞉nda꞉ hosiki siki make mina꞉pa꞉laluekema꞉ na taapemekeme.
اکنون انتخاب شده:
Luku 19: SEMB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
