JOHN 13
13
1Cuticun Lanhtâk Thô hlanah Jesuh nih vawlei hi chuah takin Pa sinah a kal cân a phâncang ti kha a hngalh, vawlei i a ummi a dawtmi ami le hna cu, a dongh tiangin a dawt hna. 2Zanriah an ei dih in khuachia nih Simon fapa Judas Iskoriot lungthin ah rawi dingin rian a rak ṭuan cang. 3Jesuh nih a kutah Pa nih thil vialte a pêk cangnâk le, Pathian sinin a rat bangin Pathian sinah a kir ṭhân lai ti kha a hngalh, 4zanriah an ei khawh in a tho i angki fual phoih in hmaihmawhnâk puan a lak i â venh. 5Cuhnuah khengpi ah ti a thlet i lamkaltu ke kha a ṭawl hna, cun hmaihnawhnâk puan â venhmi in a hnawh hna. 6Simon Peter sinah a ra i anih nih, “Bawipa, ka ke na ṭawl lai maw?” tiah a ti. 7Jesuh nih, “Ka tuahmi hi atu ah cun na theithiam rih lai lo. Asinain hnu deuh ah na theihthiam te lai,” tiah a ti. 8Peter nih, “Ka ke na ṭawl hrim lai lo,” tiah a ti. Jesuh nih, “Kan ṭawl lo ahcun ka sinin covo zeihmanh na ngei lai lo,” tiah a ti. 9Simon Peter nih, “Bawipa, cutiasiahcun ka ke lawng si loin ka kut le ka lu zong,” tiah a ti. 10Jesuh nih, “Â khawlh cangmi cu an ke dah ti lo cu ṭawl a herh ti lo, a thiang dih ko, nannih cu nan thiang- nan dihlak bel si loin,” tiah a ti. 11Zeitintiah a rawitu ding kha a hngalh chung cang, cucaah, “Nan dihlak cun nan thiang lo,” a tinâk cu a si. 12Cubangin anke a ṭawl dih cun, â chiahmi a thil kha i lâk in a thu ṭhân i an sinah, “Nancung i ka tuahmi hi a sullam nan hngal maw? 13Nannih nih Cawnpiaktu le Bawipa nan ka ti, a ṭha ko, zeitintiah ka si taktak ko. 14Keimah Bawipa le Cawnpiaktu hmanh nih nan ke ka ṭawl ahcun, nannih zong nan ke nan i ṭawl piak awk a si. 15Zeitintiah nan sin i ka tuah bantukin nan tuah nâkhnga zohchunh awk kan tuah piak hna. 16Biataktein biataktein, kan chimh hna. Sinum cu a pu nâkin a ngan deuh lo. Lamkaltu tu zong a fialtunâk in a ngan deuh lo. 17Hi thil hna hi nan hngalh ahcun, mithluachuak nan si lai. 18Nan dihlak kong ka chim lo. Ka thimmi cu ka hngalh. Asinain cathiang nih, “Ka changreu â hrawmmi nih, a kedil ka cungah a chuan, tiah a chimmi tlinnâk ding caah a si. 19A cân a phâk hlan in kan chimh hna, a phâk tikah keimah hrimhrim ka si tiah nan zumh khawh nâkhnga. 20Biataktein, biataktein, kan chimh hna, ka thlahmi a rak cohlangtu pauh cu keimah cohlangtu a si. Aka cohlangtu pauh cu aka thlahtu cohlangtu a si.” tiah a ti. 21Jesuh nih cu bia a chim dih in thlarau in a ngaih a chia ngaingai i, “Biataktein, biataktein, kan chimh hna, “Nanlak i mi pakhat nih a ka rawi lai,” tiah a ti. 22Lamkaltu hna nih a ho kong dah a chim ti zong hngal loin, anmah le anmah an i zoh. 23A lamkaltu lakah pakhat, Jesuh nih a dawtmi kha Jesuh ṭang hngatchan in a ṭhu. 24Simon Peter nih Amah kha a ho kong dah a chim van hal tuah, tiah mithmai in a fial. 25Cuticun anih cu Jesuh ṭâng leiah a hei sawn i “Bawipa, ahodah a si lai? tiah a ti. 26Jesuh nih a leh i “Changreu pel ka ciah lai i ka pêkmi a si lai” tiah a ti. Cuticun changreu pel cu a lâk i a ciah hnuah Simon fapa Judas Iskariot kha a pêk. 27Cubangin changreu pel a pêk hnu ah a chungah Satan a lut cawlh. Jesuh nih a sinah, “Na tuah ding cu khulrangin tuah,” tiah a ti. 28Asinain cabuai kulhtu midang nih a chimmi sullam cu an hngal lo. 29Zeitintiah cheukhat nih Judas cu phaisa bawm kengtu a si ruangah, Jesuh nih Thô ca i a herhmi cawk le, mi sifak hna sinah thil zei maw pêk a fial tiah an ruah. 30Anih cu changreu pel a co hnu in a chuak cawlh. Cu cân cu zân a si cang. 31A chuah hnu ah Jesuh nih, “Atu ah Mi Fapa hi thangṭhat in a um, Amah ah hin Pathian zong thangṭhat in a um. 32Amah in Pathian kha thangṭhat in a um ahcun, Pathian zong nih Amah hrimhrim in a thangṭhat lai, cun chikkhat te ah a thangṭhat lai. 33Nau le hna, cân tawite nan sinah ka um rih lai. Nannih nih nan ka kawl lai; Judah mi hna sinah, ‘Ka kalnâk ah nan ra kho lai lo,’ tiah ka rak chim cang bang khan, atu zongah kan chimh ṭhân hna. 34Nawlpêk thar kan pêk hna; pakhat le pakhat i daw u, keimah nih kan dawt hna bantukin pakhat le pakhat i daw u. 35Pakhat le pakhat nan i dawt ahcun, mi vialte nih aka zultu nan si kha an hngalh lai,” tiah a ti. 36Simon Peter nih, “Bawipa, khuazeiahdah na kal lai?” tiah a ti. Jesuh nih, “Atu ah cun ka kalnâk ah naka zul kho lai lo, hnu deuh ah naka zulh khawh te lai,” tiah a ti. 37Peter nih, “Bawipa, zeiruangahdah atu zongah kan zulh khawh lai lo? Nangmah ruangah ka nunnâk zong ka pêk lai,” tiah a ti. 38Jesuh nih, “Keimah ruangah na nunnâk na pêk lai maw? Biataktein, biataktein, kan chimh, voithum naka hlawt hlan ah cun ar a khuang lai lo,” tiah a ti.
اکنون انتخاب شده:
JOHN 13: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
