JOHN 11
11
1Mary le a unau nu Marta umnâk Bethani khua ah mi zaw pakhat Lazaruh a um. 2Mizaw Lazaruh cu Mary ṭapa a si, Mary cu hlan i Bawipa ke i rimhmui sathau a rak thuh i a samin a hnawh piaktu kha a si. 3Cucaah a far le hna nih, “Bawipa, ngaihhmanh, na dawtmi kha a zaw, tiah va chim dingin mi an thlah. 4Jesuh nih cucu a theih tikah, “Hi zawtnâk hi thihnâk ding a si lo, Pathian sunparnâk dingtu a si, Pathian Fapa cu hiruangah hin thangṭhat i a um khawh nâkhnga,” tiah a ti. 5Jesuh nih Marta le a nau Mary le Lazaruh kha a dawt hna. 6Cuticun a zaw ti a theih hnu ah a umnâk hmunah ni hnih a um rih. 7Cuhnuah a lamkaltu sinah, “Judia ramah kal u sih,” tiah a ti. 8Lamkaltu hna nih, “Rabbi, tuanah Judah mi hna nih lungin cheh an in timh kha; cubu in maw na kal ko rih lai?” tiah an ti. 9Jesuh nih, “Nikhat ah suimilam hleihnih a ceu lo maw? Chun ceu i mi a kal ahcun vawlei ceu kha a hmuh caah â chuih bal lo. 10Asinain zanah mi a lên ahcun amah ah ceunâk a um lo ca ah a sawn tawn,” tiah a leh hna.. 11Cubia cu a chim dih in, “Kan hawi Lazaruh â hngilh, a hlauh awkah ka kal lai,” tiah a ti. 12A lamkaltu hna nih, “Bawipa, â hngilh ahcun, â hlau te ko lai,” tiah an ti. 13Asinain, Jesuh nih a thihnâk kong a chimmi a sinain annih nih â hngilh i â dinmi ah an ruah. 14Cuticun Jesuh nih fiang tein, “Lazaruh a thi.” 15Cuka i ka rak um lo cu nanmah ruah ah kâ lawm ko, nan zumh khawh nâkhnga. Zeasihmanh ah a sinah kal u sih,” tiah a ti. 16Thomos, Faphir tiah kawhmi nih, “A sin i kan thih khawh nâkhnga, kal tuah u sih,” tiah a ti. 17Jesuh a va phâk tikah, thlân ah nili a rak um cang. 18Bethani khua cu Jerusalem pawngah a si i meng hnih hrawng lawng a si. 19An ṭapa ruangah Mary le Marta cu nu tampi nih an rak ṭhutpi hna. 20Marta nih Jesuh a ra ti a theih tikah chikkhat te ah Amah don awkah a tho i a kal. Mary tu cu inah a ṭhu ko rih. 21Marta nih Jesuh sinah, “Bawipa hika ah rak um law ka ṭapa a thi hnga lo. 22Asinain atu zongah Pathian sin i na halmi pauh an pêk ko lai tiah ka zumh,” tiah a ti. 23Jesuh nih, “Na ṭapa a tho ṭhân lai,” tiah a ti. 24Marta nih a sinah, “Nidongh ni i thawhṭhannâk ah a thoṭhân lai ti cu ka hngalh,” tiah a ti. 25Jesuh nih, “Thawhṭhannâk le nunnâk cu keimah hi ka si: Aka zummi pauh cu thi hmanhsehlaw, a nung lai. 26Nungin aka zummi pauh cu, a thi ti lai lo. Hi bia hi na zum maw?” tiah a ti. 27Anih nih, “Ka zumh, Bawipa, Krih Pathian Fapa, vawlei i a ra dingmi na si kha ka zumh,” tiah a ti. 28Cu bia a chim dih in a kal i a nau Mary cu a thli in a va kawh, “Cawnpiaktu a rak phân i an kawh dah kaw,” tiah a va ti. 29Anih nih a theih le cângkâ a tho cawlh i a sinah a kal. 30Jesuh cu khua ah a lut rih lo, Marta nih a va hmuh nâkah khan a um ko rih. 31Cun a ṭhutpitu, in chung i a ummi Judah mi hna nih, Mary a thawh i lêng i a chuah an hmuh tikah, “Thlân ah ṭap dingin a kal” tiah an ruah i an zulh. 32Cuticun Mary cu Jesuh umnâk a va phân i a hmuh tikah, A ke hramah a bawk i, “Bawipa hika ah rak um law, ka ṭapa a thi hnga lo,” tiah a ti. 33Jesuh nih Mary le a zultu Judah mi an ṭah kha a hmuh tikah, a thlarau ngaihchia in a hrum ai. 34“Amah cu khuazeiahdah nan phum?” tiah a ti. Annih nih, “Ra law, zohhmanh,” tiah an ti. 35Jesuh a ṭap. 36Judah mi nih, “Zohmanh u, zeitlukindah a dawt!” tiah an ti. 37Mi cheukhat nih, “Mit caw, deiter khotu pa nih hin hi pa zong hi thi loin a kilveng kho lo maw? tiah an ti. 38Jesuh cu a hrum ai thlauhmah i thlân cu a phân. Lungkua a si i lung in kharmi a si. 39Jesuh nih, “Lung hi ṭhial u,” tiah a ti. A thimi farnu Marta nih, “Bawipa, atu ah cun a thunam tuk cang lai, a thihnâk nili a si cang” tiah a ti. 40Jesuh nih, “Na zumh ahcun Pathian liannganâk nahmuh lai, kan ti lo maw?” tiah a ti. 41Cuticun mithi an chiahnâk hmun i lung cu an lak i Jesuh cu vanlei zoh in, “Ka Pa, ka bia na ngaih ruangah na cungah kâ lawm. 42Ka bia na ngaih zungzal ti ka theih ca zongah kâ lawm. Hika i a dirmi mizapi hna ruangah cucu ka chim, Naka thlah tiah an zumh khawh nâkhnga,” tiah a ti. 43Cubia cu a chim dih in, aw thang ngaiin a au i “Lazaruh, rak chuak tuah,” tiah a ti. 44Mithi cu akut le ake thlânpuan i tuambu in a rak chuak, a hmai zong puan i tuam a si. Jesuh nih, “Phoih ulaw, kalter u,” tiah a ti. 45Cuticun Mary ṭhutpitu, Jesuh tuahmi a hmutu Judah mi tampi nih Jesuh cu an zumh. 46Asinain cheukhat cu Farasih hna sinah an kal i Jesuh tuahmi thil kha an va chimh hna. 47Cuticun tlângbawi le Farasih hna nih biaceihtu kha an auh hna i, “Zeitindah kan tuah lai?” Hi pa nih hin hmelchunhnâk tampi a tuah cang. 48Hibangin kan zohsawh ko ahcun, mi vialte nih Amah an zumh lai, Rommi an ra lai i kan hmun le kan miphun hi an kan lâkpiak ko lai,” tiah an ti. 49An lakah mi pakhat Kaiafas, cu kum i tlângbawi nganbik nih, “Zeihmanh nan hngal lo. 50Kan miphun dihlak a rawhral nâkhnga lo mi vialte caah mi pakhat thih kan caah a ṭha timi zong nan ruat fawn lo,” tiah a ti. 51Cubia cu amah lungchuak chimmi zong a si lo, tlângbawi nganbik a si kum a si, cucaah an miphun dihlak ca i Jesuh a thihnâk ding a rak chimchungnâk tu a si, 52Cu miphun hna ca lawng ah a si lo Pathian fale vawlei khuazakip i â ṭhekmi vialte bukhat i pumh an si lainâk ca zongah a si. 53Cucaah cu ni thawk in Amah thahnâk dingah khua an khâng leng mang. 54Cuticun Jesuh cu Judah mi hna sinah langhngan in a tlonglêng ti lo, cuka hmun in ramcar pawng i a ummi Efraim khua an timi ah a kal, cuka ah a lamkaltu hna he sau nawn an um. 55Cun Judah mi Lanhtâk Thô a nai cang i Lanhtâk Thô hlanah i thenh dingin mi tampi khuate lei in Jerusalem ah an kal. 56Cuticun Jesuh an kawl i ṭempal vêlchum ah a ummi hna nih, “Thô lio ah hin a ra ko lai lo maw? zeitindah nan ruah? tiah an i ceih. 57Tlângbawi hna le Farasih hna nih Amah cu an tlaih khawh nâkhnga a umnâk a hngaltu pauh nih, an sinah an chim zau lai, tiah nawlpêk an chuah cang.
اکنون انتخاب شده:
JOHN 11: HAKABSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
